އެމެރިކާއެއްކަމަކު އީރާނަށް ބިރުދައްކައި އިންޒާރުދީގެން ނުވާނެ: ރަޝިއާ

އެމެރިކާއެއްކަމަކު އީރާނަށް ބިރުދައްކައި އިންޒާރުދިނުމަކީ ބަލައިގަނެވޭނެ ކަމެއް ނޫންކަމަށް ރަޝިއާގެ ހާރިޖީ ވުޒާރާގެ ނައިބު ސާރޖީ ރިޔާބްކޯ ވިދާޅުވެއްޖެއެވެ.

ރަޝިއާގެ ޖާނަލްއަކަށް ދެއްވި ބަސްދީގަތުމެއްގައި ސާރޖީ ވިދާޅުވީ، އީރާނުން ނިއުކްލިއާ ހަތިޔާރު އުފައްދާކަމަށް ތުހުމަތުކޮށް އެމެރިކާއިން އެޤައުމަށް ބިރުދައްކައި އިންޒާރުދޭދިނުން ބަލައެއް ނުގަނެވޭނެކަމަށާއި އެކަން ނިހާޔަތަށް ކުށްވެރިކުރާ ކަމަށެވެ. އޭނާ ވިދާޅުވީ ފަނާކުރަނިވި ހަތިޔާރު އުފައްދާކަމަށް ތުހުމަތުކޮށް ތެހެރާނަށް ހަމަލާއެއް ދީފިނަމަ އެމެރިކާއަށް އެކަމުގެ ނަތީޖާ އެހާ ރަނގަޅު ނުވާނޭކަމަށެވެ.

އީރާނާ ރަޝިއާ އާ ދެމެދު ހޫނު ބަހުގެ ހަމަލާތަކެއް ބަދަލުކުރަން ފަށާފައިވާއިރު، ދެ ޤައުމުގެ އިސް ފަރާތްތަކުގެ ވާހަކަތައް ހުންނަ ގޮތުން ހީވަނީ ދެންމެ ދެންމެ ހަމަލާތައް ބަދަލުކޮށްފާނެހެންކަމަށް މެދުއިރުމަތީގެ ބައެއް ނޫސްތަކުން ވަނީ ފާހަގަކޮށްފައެވެ. މީޑިއާގެ ބައެއް ހަބަރުތައް ބުނާގޮތުގައި އެމެރިކާއިން މިހާރުދަނީ މެދުއިރުމައްޗާއި އޭޝިއާ ސަރަހައްދުގައި ޤާއިމްކޮށްފައިވާ އެޤައުމުގެ މިލިޓަރީ ބޭސްތައް ވަރުގަަ ކުރަމުންނެވެ. އޭގެ އެއް ބޭނުނަމީ ދީފާނެ ހަމަލާއަކުން ނުވަތަ ހަމަލާއެއް ދޭން ޖެހިއްޖެނަމަ އެކަމަށް ތައްޔާރުވެފައި އޮތުމެވެ.

އެމެރިކާއިން އީރާނަށް އިންޒާރުދީފައި ވަނިކޮށް އީރާނުން ވަނީ، އެޤައުމުންދޭ އިންޒާރަށް ނުސިހޭނޭކަމަށް ބުނެފައެވެ. މީގެ އިތުރުން ހަމަލާދޭން ޖެހިއްޖެނަމަ އެކަންވެސް ކުރާނޭކަމަށް އީރާނުން ވަނީ ބުނެފައެވެ. އީރާނާ އެމެރިކާއާ ދެޤައުމުގެ ކޯޅުންތައް މީގެ ކުރިންވެސް އެކި ފަހަރުމަތިން ފެނިގެން ގޮސްފައިވާއިރު، އެމެރިކާއިން ބޮޑު ހަނގުރާމައެއްގެ ތެރެއަށް ވަނުމަކީ އެޤައުމުގެ ރައްޔިތުންގެ މެޖޯރިޓީ ބޭނުންވާގޮތް ނޫންކަމަށް ދިރާސާކުރާ ފަރާތްތަކުން ބުނެއެވެ.