މުޒާހަރާގެ ތެރެއިން ޔަގީނުން ވެސް 6 މީހަކު ހައްޔަރުކުރި، ވަކީލެއްގެ ޙައްޤުވެސް ދީފައިނުވޭ: އެމްޑީޕީ

ރޭ އިދިކޮޅު އެމްޑީޕީން މާލޭގައި ކުރިޔަށްގެންދިޔަ އެއްވުމުގެ ތެރެއިން 6 މީހަކު ހައްޔަރުކުރި ކަމަށާއި، ވަކީލެއްގެ ޙައްގު ދީފައިނުވުމުން ދެން ހައްޔަރުކުރި މީހުންގެ އަދަދު އަދިވެސް ކަށަވަރުވެފައިނުވާ ކަމަށް އެ ޕާޓީން ބުނެފިއެވެ.

އާޓިފިޝަލް ބީޗުން ފެށި އެ އެއްވުން ހޫނުވީ، އެ އެއްވުމުގެ ބައިވެރިން މާޖީދީމަގުން ކުރިއަށްދާން އުޅުމުން ފުލުހުން އެ މަގު ބަންދުކުރުމުންނެވެ. ފުލުހުން ރޭ ބުނި ގޮތުގައި އެއީ އެމްޑީޕީއާއެކު ފުލުހުން އެއްބަސްވެފައިވާ ރޫޓްއެއް ނޫނެވެ.

އެއާއެކު ޕެޕާ ސްޕްރޭ އާއި އެލްރާޑް ބޭނުންކޮށް، ޢާންމުންގެ ސަފުތައް ރޫޅުވަން ފުލުހުން ވަނީ މަސައްކަތްކޮށްފައެވެ. އެކަމުގެ ތެރެއިން ފުލުހުން ވާޖިބަށް ހުރަސްއެޅިކަމަށް ބުނެ ބައެއް ބައިވެރިން، ފުލުހުން ވަނީ ހައްޔަރުކޮށްފައެވެ.

އެކަމާ ގުޅިގެން އެމްޑީޕީން މިއަދު ނެރުނު ބަޔާނެއްގައި ވަނީ، ރޭގެ މުޒާހަރާގެ ތެރޭގައި ސުލްހަވެރި އާންމުންނާ ދެކޮޅަށް ބާރުގެ ބޭނުންކުރުން ހަރުކަށި އިބާރާތުން ކުށްވެރިކޮށްފައެވެ.

އެގޮތުން ރައީސް މުއިއްޒުގެ އިސްތިއުފާއަށް ގޮވާލައި އެތައް ހާސް ބަޔަކު މުޒާހަރާ ކުރިއިރު، ސުލްހަވެރިކަމާއެކު އެއްވެ އުޅުމުގެ ހައްގު ނިގުޅައިގަތުމަށް ފުލުހުން ހުރަސްއަޅައިފައިވާ ކަަމަށް އެޕާޓީން ބުންޏެވެ. އަދި މުޒާހަރާގެ ބައިވެރިންނާއި ނޫސްވެރިންނާ ދެކޮޅަށް ފުލުހުން ޕެޕާ ސްޕްރޭ އާއި ރަޔަޓް ޝީލްޑް ބޭނުންކުރުމުގެ ސަބަބުން މުޒާހަރާގެ ބައިވެރިންނަށް އަނިޔާވެފައިވާ ކަމަށާއި، އެ މުޒާހަރާގެ ތެރެއިން މަދުވެގެން ހަ މީހަކު ހައްޔަރުކޮށްފައިވާ ކަމަށް އެމްޑީޕީން ބުންޏެވެ.

މިހާތަނަށް ހަ މީހަކު ހައްޔަރު ކޮށްފައިވާ އިރު، ފުލުހުން ހައްޔަރު ކުރި ހުރިހާ އާންމުން ވަގުތުން ދޫކޮށްލުމަށް އެމްޑީޕީން ގޮވާލަމެވެ. އަދި ފުލުހުން ހައްޔަރު ކުރި މީހުންގެ ސީދާ އަދަދެއް އަދި ސާފު ނުވި ނަމަވެސް، ގާނޫނު އަސާސީން ހިމާޔަތްކޮށްފައިވާ ހިޔާލުފާޅުކުރުމުގެ މިނިވަންކަމުގެ ހައްގު ބޭނުން ކުރުން އެއްވެސް ޝަރުތެއް ނެތި ދޫކޮށްލުމަށް ގޮވާލަމެވެ.

އެމްޑީޕީގެ ބަޔާން

އެމްޑީޕީން ވަނީ އެ ފަރާތްތަކަށް ޤާނޫނީ ވަކީލެއްގެ ހައްގު ނުދިނުމުގެ ކަންބޮޑުވުން ވެސް ފާޅުކޮށްފައެވެ. އަދި ހައްޔަރުކުރި ފަރާތްތަކުގެ އަދަދުތައް ޔަގީންވެފައިނުވަނީ އެކަމުގެ ސަބަބުން ކަމަށް އެމްޑީޕީގެ ބަޔާނުގައި ބުންޏެވެ.

އެމްޑީޕީން ވަނީ ރޭ ފުލުހުން ޢަމަލުކުރި ގޮތަކީ ސީދާ ޚިޔާލު ފާޅުކުރުމުގެ މިނިވަންކަމަށް ހުރަސްއެޅުންކަން ފާހަގަކޮށް، ޤާނޫނު އަސާސީން ލިބިފައިވާ ޙައްޤު ހަނިކުރާ ފަރާތްތަކާއި މެދު ޤާނޫނީ ފިޔަވަޅު އަޅާނެ ކަމަށް ވެސް ބުނެފައެވެ.

ފާހަގަކުރެވޭ ގޮތުގައި ރޭގެ އެމްޑީޕީގެ ރައްޔިތުންގެ މަޖިލީހުގެ ކުރީގެ ދެ މެންބަރުންނާއި އެ ޕާޓީގެ ކ. މާފުށީ ކައުންސިލުގެ ރައީސް ވެސް ހައްޔަރުކޮށްފައެވެ. އެ މީހުން ދޫކުރި ކަމެއް އަދި ސާފުވެފައެއްނުވެއެވެ.