ސިޓީ ކައުންސިލްގެ އިހުމާލުން ހަލާކުވި ޕަމްޕްސްޓޭޝަން އަލުން އޮޕަރޭޝަނަށް ގެނެސްފި
ލިޔުންތެރިޔާ
އަބްދުﷲ ހުސައިން
މާލެސިޓީ ކައުންސިލްގެ އިހުމާލުން ހަލާކުވި ޕަމްޕް ސްޓޭޝަން މަރާމާތުކުރުމަށްފަހު އަލުން އޮޕަރޭޝަނަށް ގެނެސްފައިވާކަމަށް އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން ބުނެފިއެވެ.
ވިއްސާރަވެހުމާއި ގުޅިގެން މާލޭގެ މާފަންނުކޮޅުގައި ފެންބޮޑުވާތީ، ކޮންސްޓްރަކްޝަން މިނިސްޓްރީން ވަނީ އެހިސާބުގެ އެކި ސަރަހައްދުތަކުގައި ފެން ހިންދުމަށް ޕަމްޕް ސްޓޭޝަންތައް ގާއިމްކޮށްފައެވެ. މާލެސިޓީ ކައުންސިލުން މާފަންނު ސަހަރާ ކޮނުމުގެ މަސައްކަތް ކުރަނިކޮށް އެތަނުގައި ހުރި ޕަމްޕް ސްޓޭޝަން ވަނީ ހަލާކުވެފައެވެ. މިކަމާ ގުޅިގެން މިއަދު ސޯޝަލް މީޑިއާގައި ކޮންސްޓްރަކްޝަން މިނިސްޓަރު މުއްތަލިބާއި، މާލެސިޓީގެ މޭޔަރު އާދަމް އާޒިމާ ދެމެދު ވަނީ ބަހުގެ ހަމަލާތަކެއް ބަދަލުކޮށްފައެވެ.
މި މައްސަލާގައި މޭޔަރު ވިދާޅުވީ، ޕަމްޕް ސްޓޭޝަން ހަލާކުވެގެން އެކަމުގެ ޝަކުވާ މިނިސްޓްރީއާ ހިއްސާކޮށްފައިވާނޭކަމަށެވެ. ނަމަވެސް މިނިސްޓަރު މުއްތަލިބު ވިދާޅުވެފައިވަނީ މާފަންނު ސަހަރާގައި ޕަމްޕް ސްޓޭޝަން ގާއިމްކޮށްފައިވާނީ އެތަނުގައި ހުރި ގަބުރުތައް ނަގައި ސާފުކުރުމަށްފަހު ކަމަށެވެ. އެހެންކަމުން މާލެސިޓީ ކައުންސިލުން އެތަން ކޮނުމުގެ އެއްވެސް މާނައެއް ނެތްކަމަށް މިނިސްޓަރު ވިދާޅުވިއެވެ. އަދި އެ ޕަމްޕް ސްޓޭޝަން މިދިޔަ ހަފްތާގައިވެސް ރަނގަޅުކަމަށާއި، އެތަން ގަވާއިދުން ބަލާ ޗެކްކުރަމުންދާކަމަށް މިނިސްޓަރު ވަނީ ވިދާޅުވެފައެވެ.
މި މައްސަލާގައި މީގެ ކުޑައިރުކޮޅެއްކުރިން ކޮންސްޓްރަކްޝަން މިނިސްޓްރީން ނެރުނު ބަޔާނުގައި ބުނީ މާލޭގައި ކޮންމެ ފަހަރަކުވެސް ފެންބޮޑުވުމުން ޕަމްޕް ސްޓޭޝަންތައް އިންސްޕެކްޓްކޮށް ބަލަމުންދާކަމަށާއި، މިގޮތުން ބެލިއިރު މާފަންނު ސަހަރާގައި ގާއިމްކޮށްފައިހުރި ޕަމްޕް ސްޓޭޝަނާއި އެ ސްޓޭޝަނަށް ގުޅާފައިވާ ހޮޅިތައް ބޭނުންނުކުރެވޭ ވަރަށް ހަލާކުވެފައި ހުރިކަމަށެވެ.
އެތަނަށް ގެއްލުން ލިބިފައިވަނީ، ސްޓޭޝަނަށް ލިބިދާނެ އެއްވެސް ގެއްލުމަކަށް ބެލުމެއްނެތި، އެ ސަރަހައްދު ކޮނުމުންކަށް މިނިސްޓްރީން ވަނީ ބުނެފައެވެ. އަދި މަސައްކަތް ކުރަމުްނދިޔައިރު، މިނިސްޓްރީއާ އެއްވެސް ވަރަކަށް މަޝްވަރާވެސް ކޮށްފައި ނުވާކަމަށެވެ.
ކޮންސްޓްރަކްޝަން މިނިސްޓްރީްނ ބުނީ، ޕަމްޕް ސްޓޭޝަން ނެޓްވަރކް ޗެކްކޮށް ރޯޑް ކޯޕަރޭޝަނާއި، އަދި ސްޓެލްކޯގެ އެހީތެރިކަމާއެކު މާފަންނު ސަހަރާގައި ހުރި ޕަމްޕް ސްޓޭޝަން ވަގުތީގޮތުން މިހާރު އޮޕަރޭޝަނަށް ގެނެސްފައިވާކަމަށެވެ.
މާލޭގެ މާފަންނު ސަރަހައްދަކީ ވާރޭ ވެހިއްޖެނަމަ އެންމެބޮޑަށް ފެންބޮޑުވާ އަވަށެވެ. މާފަންނު ސަރަހައްދަށް ބޮޑުވާ ފެންގަނޑު ހިންދުމަށް މީގެކުރިން އެތައް މަސައްކަތްތަކެއް ކުރިނަމަވެސް ހާއްސަ ގޮތެއްގައި މާފަންނު ސަރަހައްދު ފެންބޮޑުވުމުގެ މައްސަލައަށް ހައްލެއް އައިސްފައެއް ނުވެއެވެ
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
