ބާޒާރުމަތީ މަގު ދެކޮޅަށް ދުއްވޭ ގޮތަށް ހަދައި އާންމުންނަށް ހުޅުވާލައިފި
ލިޔުންތެރިޔާ
ޚަދީޖާ އަރުފާ
މާލޭގެ އުތުރުފަރާތު ބޮޑުތަކުރުފާނުމަގު ފުޅާކޮށް ތަރައްޤީކުރުމުގެ މަޝްރޫޢުގެ ދަށުން، ބާޒާރުމަތީގެ މަގު ދެކޮޅަށް ދުއްވޭ ގޮތަށް ހަދައި ރޭ ފަތިހު އާންމުންނަށް ހުޅުވާލައިފިއެވެ.
އެމްޓީސީސީން ހާމަކޮށްފައިވާ ގޮތުގައި، މި މަޝްރޫޢުގެ ދެވަނަ ސެގްމެންޓްގެ މަސައްކަތް ކުރިއަށް ގެންގޮސްފައިވަނީ މާލޭ މަސްމާރުކޭޓުން ފެށިގެން ނޯތު ހާބަރު ނިމޭ ހިސާބަށްވާ ސަރަހައްދަށެވެ. މި ސަރަހައްދުގައި ތާރު އަޅައި، މަގު ފުޅާކުރުމުގެ މަސައްކަތް ނިންމުމަށްފަހު، މިހާރު ވަނީ އުޅަނދުފަހަރަށް ދެކޮޅަށް ދުއްވޭ ގޮތަށް ހުޅުވާލާފައެވެ.
މި މަޝްރޫޢުގެ ދެވަނަ ފިޔަވަހީގެ ދަށުން 254 މީޓަރުގެ މަގެއް ހަދައި، 260 މީޓަރުގެ ސަރަހައްދެއްގައި ޝީޓް ޕައިލް ކޮށްފައިވެއެވެ. މީގެ އިތުރުން ސަބްބޭސް އާއި އޭބީސީ ތައްޔާރުކޮށް ތާރު އެޅުމާއި، ހިނގާ މީހުންނަށް ވަކި ލޭނެއް ކަނޑައެޅުމާއި، ފެންހިންދާ ނިޒާމެއް ޤާއިމުކުރުން ހިމެނެއެވެ. އަދި ޑްރޭއިނޭޖް ސަރވިސް ލައިން އެޅުމާއި، މަގު ބައްތި ހަރުކުރުމުގެ އިތުރުން މަގުމަތީގެ ނިޝާންތައް ކުރެހުމުގެ މަސައްކަތްވެސް ވަނީ ނިންމާފައެވެ.
ޖުމްލަ 55.95 މިލިއަން ރުފިޔާގެ މި މަޝްރޫޢަކީ 210 ދުވަސް ތެރޭގައި ނިންމުމަށް އެމްޓީސީސީއާ ހަވާލުކުރި މަސައްކަތެކެވެ. ނަމަވެސް، އެމްޓީސީސީގެ މުވައްޒަފުންގެ ބުރަ މަސައްކަތުން މި މަޝްރޫޢު ވަނީ ކަނޑައެޅިފައިވާ މުއްދަތަށްވުރެ މާ ކުރިން ނިންމާލާފައެވެ.
މީގެ ކުރިން، 8 ޑިސެންބަރު ދުވަހު ވަނީ މި މަޝްރޫޢުގެ ފުރަތަމަ ފިޔަވަހީގެ ދަށުން 830 މީޓަރުގެ ސަރަހައްދެއް ތަރައްޤީކޮށް ހުޅުވާލާފައެވެ. އެ ފިޔަވަހީގައި 144.50 މިލިއަން ރުފިޔާ ޚަރަދުކޮށްފައިވެއެވެ.
އެމްޓީސީސީގެ މެނޭޖިންގ ޑައިރެކްޓަރ ވިދާޅުވި ގޮތުގައި، މި މަސައްކަތް މިހާ އަވަހަށް ނިންމާލެވުނީ ކޮންސްޓްރަކްޝަން މިނިސްޓްރީއާއި ސަރުކާރުގެ އެހެނިހެން ކުންފުނިތަކުން ލިބުނު ފުރިހަމަ އެއްބާރުލުމާ އެކުގައެވެ.
މި މަގު ހުޅުވާލުމަކީ ބާޒާރުމަތީގެ ޓްރެފިކަށް ބޮޑު ލުޔެއް ލިބިގެންދާނެ ކަމެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
