އަޅުގަނޑު ދަންނަ މައުރޫފެއް، ބަސްނުވިކޭ އޮޑިއެއްގައި ނުހުންނަވާނެ: ރައީސް ޔާމިން
ލިޔުންތެރިޔާ
އަބްދުﷲ ހުސައިން
އެޗްޑީސީގެ އައު މެނޭޖިންގ ޑިރެކްޓަރުކަމަށް މިއަދު ސަރުކާރުން ހަމަޖެއްސެވި މައުރޫފް ޖަމީލަކީ އެމަޤާމަށް ވަރަށް އެކަށޭނެ ބޭފުޅެއްކަމަށް ކުރީގެ ރައީސް ޔާމީނު ވިދާޅުވެއްޖެއެވެ.
ޕީއެންއެފުން މިރޭ ބޭއްވި ޖަލްސާގައި ވާހަކަދައްކަވަމުން ރައީސް ޔާމީނު ވިދާޅުވީ މައުރޫފް ޖަމީލަކީ ކްރެޑިބަލް ބޭފުޅެއްކަމަށެވެ. މިގޮތުން މައުރޫފަކީ ވަރަށް ނަޒާހަތްތެރިވާނެ ބޭފުޅެއްގެ ގޮތުގައި ރައީސް ޔާމީނު ސިފަކުރެއްވިއެވެ. އަދި އެމަނިކުފާނު ދަންނަ މައުރޫފް، ބަސްނުވިކޭ އޮޑީގެ ދިރުނބާކޮޅަށް ނާރުއްވާނެ ކަމަށްވެސް ރައީސް ޔާމީނު ވިދާޅުވިއެވެ.
މައުރޫފް ޖަމީލާ ގުޅޭގޮތުން ރައީސް ޔާމީން ވިދާޅުވީ، އެމަނިކުފާނު ކުރައްވަންޖެހޭ ވަރަށް މުހިއްމު މަސައްކަތްތަކެއް އެބަހުރި ކަމަށާއި، މިގޮތުން ރައީސް ނަޝީދުގެ ދައުރުން ފެށިގެން ރައީސް ޔާމީނު ދައުރުވެސް ހިމެނޭހެން އެޗްޑީސީން ބިންތައް އަދާހަމަޔަށް ދޫކޮށްފައިހުރި ގޮތުގެ މިނިވަން އޮޑިޓެއް ހެއްދެވުން މިވަގުތަށް ވަރަށް މުހިއްމުކަމަށް ރައީސް ޔާމީނު ވިދާޅުވިއެވެ. މިގޮތުން މިކަން ކުރައްވަން މައުރޫފް ޖަމީލަކީ އެންމެ އެކަށީގެންވާ އެއް ބޭފުޅާކަންވެސް ރައީސް ޔާމިނުގެ ވާހަކަފުޅުގައި ވަނީ ފާހަގަކުރައްވާފައެވެ.
އަޅުގަނޑު އުއްމީދުކުރަން މައުރޫފް އެކަން ކުރައްވާނެ ކަމަށް. އެހެންނޫނީ މައުރޫފުގެ ބޮލުގައި އެ އެޅެނީ ވަރަށް ވަރުގަދަ އިލްޒާމެއް. ތުހުމަތުތަކެއް. އެއީ ވަކިކަމެއް ހިމާޔަތްކުރަން ވަކިކަހަލަ ގޯސްތަކެއް ފޮރުވަން ކުރާ މަސައްކަތެއް. އެކަމް އެކަމެއް މައުރޫފެއް ނުކުރާނެ. އެގޮތަކަށް ހިމާޔަތެއް ނުކުރާނެ.
ރައީސް ޔާމީން ވިދާޅުވިއެވެ
އެޗްޑީސީގެ މެނޭޖިންގ ޑިރެކްޓަރުގެ މަގާމަށް މައުރޫފް ޖަމީލް އައްޔަނުކުރައްވާފައިމިވަނީ މިހާތަނަށް އެމަގާމުގައި ހުންނެވި ފަޒުލް ރަޝީދު އިސްތިއުފާ ދިނުމާ ގުޅިގެންނެވެ.
މައުރޫފް ޖަމީލަކީ ރާއްޖޭގެ އުމްރާނީ ތަރައްޤީގައި ވަރަށް ހިދުމަތްތެރި ބޭފުޅެކެވެ. މައުރޫފް ޖަމީލަކީ ރައީސް މައުމޫނު ދައުރުގައި ކޮންސްޓްރަކްޝަން މިނިސްޓަރުކަމުގެ މަގާމު ފުރުއްވި ބޭފުޅެކެވެ. މައުރޫފް ޖަމީލަކީ ހުޅުމާލޭ ފުރަތަމަ ފިޔަވަހި ތަރައްޤީކުރުމުގައި ވަރަށް އިސްކޮށް ހަރަކާތްތެރިވި ބޭފުޅެކެވެ. އަދި އެމަނިކުފާނަކީ ކުޅަދާނަ އާކިޓެކްޗަރެކެވެ
އެޗްޑީސީގެ މެނޭޖިންގ ޑިރެކްޓަރުކަމުގެ މަގާމަށް މައުރޫފް ޖަމީލް އައްޔަނުކުރުމާ ގުޅިގެން، ކުރީގެ ރައީސް މައުމޫނާއި އިދިކޮޅު ބައެއް ފަރާތްތަކުންވެސް ވަނީ ރައީސް ޑރ.މުއިއްޒުގެ މި ނިންމެވުމަށް މަރުހަބާ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
