ބަންޑާރަ މިސްކިތަށް ގޮތެއް ހެދުމުގެ ކުރިން ރައްޔިތުންނާ މަޝްވަރާކުރާނަން: ޝަހީމް

ބަންޑާރަ މިސްކިތް ހުރި ތަނުގައި އާ މިސްކިތެއް އަޅާނީ ރައްޔިތުންނާ މަޝްވަރާކޮށްފައިކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް ވިދާޅުވެއްޖެއެވެ.

ބަންޑާރަ މިސްކިތް ތަޅާލުމަށްފަހު އެތަނުގައި އާ މިސްކިތެއް އެޅުމަށް ނިންމުމުން ރައްޔިތުންގެ ތެރެއިން ބައެއް މީހުން ވަނީ އެކަމާމެދު ކަންބޮޑުވުން ފާޅުކޮށްފައެވެ. އެގޮތުން ބަންޑާރަ މިސްކިތަކީ ތާރީހީ ބިނާއެއްކަމަށް ހިޔާލްފާޅުކުރި ފަރާތްތަކުން ވަނީ ފާހަގަކޮށްފައވެެ.

މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި އިސްލާމިކް މިނިސްޓަރު ޑރ.ޝަހީމް ވިދާޅުވީ، މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފައި، ރައްޔިތުންގެ ހިޔާލާއި އެއްގޮތަށް ކަމަށެވެ. އެގޮތުން އެތަނުގައި އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުންވާކަމަށް ވަޒީރު ވިދާޅުވިއވެެ.

މިނިސްޓަރުގެ ޕޯސްޓްގައި ވިދާޅުވީ ބަންޑާރަ މިސްކިތް ހުރި ތަނުގައި އާ މިސްކިތެއް އިމާރާތްކުރުމަށް ނިންމީ، އެ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފަ އޮންނަ މިސްކިތެއް ނޫންވީމައި ކަމަށެވެ.

ބަންޑާރަ މިސްކިތް ހުރި ތަނުގައި ބޮޑު މިސްކިތެއް އެޅުމަށް ނިންމުމާ ގުޅިގެން އެކަމާ ދެކޮޅަށް ހިޔާލްފާޅުކުރި ބައެއް މީހުން ބުނެފައިވަނީ، އެ މިސްކިތަކީ މީގެ ގަރުނެއްކުރިން ބިނާކޮށްފައިވާ ތާރީހީ މިސްކިތެއް ކަމަށެވެ. އަދި އެ މިސްކިތަކީ ދިވެހި ތާރީހުގެ ވަރަށް ގިނަ ހަނދާންތަކާ ގުޅިފައިވާ މިސްކިތެއްކަމަށްވެސް އެފަރާތްތަކުން ވަނީ ފާހަގަކޮށްފައެވެ.