ޕީކޭ ފުޓްސަލް އެކަޑަމީގައި ބައިވެރިވުމުގެ ފުރުސަތު ހުޅުވާލައިފި

ރާއްޖޭގައި މިހާރު ހިންގަމުން އަންނަ އެންމެ ބޮޑު އެއް ފުޓްސަލް އެކަޑަމީ "ޕީކޭ ފުޓްސަލް އެކަޑަމީ" ގައި ބައިވެރިވުމުގެ ފުރުސަތު އަލުން ހުޅުވާލައިފިއެވެ.

ޕީކޭ އެކަޑަމީގެ ފަރާތުން އަބްދުﷲ ނަސީރު (އަބޯ) ކޯޗު ވޮއިސް ސްޕޯޓްސްއަށް މައުލޫމާތުދިން ގޮތުގައި މިއެކަޑަމީއަކީ ރާއްޖޭގައި ހުނަރުވެރި ފުޓްސަލް ޖީލެއް ބިނާކުރުމުގެ މަގުސަދުގައި މިއަހަރުގެ ޖުލައި މަހު ފެށި މަސައްކަތެކެވެ.

އެކަޑަމީގެ އެންމެ ބޮޑު މަގުސަދަކީ ޒުވާން ކުޅުންތެރިންނަށް ރަނގަޅު ތަމްރީނުތަކަކާއެކު ވާދަވެރި ފުރުސަތުތަކެއް ތަނަވަސްކޮށްދިނުމުވެ. އެގޮތުން ވިލިމާލޭގައި އެންމެ ފަހުން ބޭއްވި 21 އަހަރުން ދަށުގެ ފުޓްސަލް މުބާރާތުގައި ވެސް މިއެކަޑަމީގެ ޓީމެއް ވަނީ ބައިވެރިވެފައެވެ. އަދި މީގެ އިތުރުން ރާއްޖެއާއި ރާއްޖެއިން ބޭރުގެ މުބާރާތްތަކުގައި ވެސް އެކަޑަމީގެ ޓީމުތައް ބައިވެރިކުރުމަށް ވަނީ ހަމަޖެހިފައެވެ.

އިތުރަށް ވާހަކަދައްކަމުން އަބޯ ކޯޗު ބުނީ އެކަޑަމީގައި ބައިވެރިވުމުގެ ފުރުސަތު އަލުން މި ހުޅުވާލީ ގިނަ ބެލެނެވެރިންތަކެއް އެކަމަށް އެދެމުންދާތީ ކަމަށެވެ.

އެގޮތުން މިހާރުވެސް މިއެކަޑަމީގައި 100 އަށްވުރެ ގިނަ ކުދިން ތަމްރީނު ހަދަމުން އަންނައިރު، އެކަޑަމީގެ ޓްރޭނިން ސެޝަންތައް ކުރިއަށް ދަނީ ހޮނިހިރު، ހޯމަ އަދި ބުދަ މިތިން ދުވަހުގެ ވެސް ކޮންމެ ދެވަހެއްގެ ހަވީރު 16:00 އިން 18:00 އަށެވެ.

މީގެ އިތުރުން އެކަޑަމީގެ ތަމްރީނުތައް ދެ އުމުރުފުރައަކަށް ބަހާލައިގެން ކުރިއަށްދާއިރު، އޭގެތެރޭގައި ހިމެނެނީ 16 އަހަރުންދަށް އަދި 16 އަހަރުން މަތީގެ އުމުރުފުރާއެވެ. އެގޮތުން 16 އަހަރުން ދަށުގެ އުމުރު ފުރާގައި ހިމެނެނީ 14 އަހަރުފުރި 16 އަހަރު ނުފުރޭ ކުދިންނެވެ. އަދި 16 އަހަރުން މަތީގެ އުމުރުފުރާގައި ހިމެނެނީ 16 އަހަރު ފުރި 24 އަހަރުނުފުރޭ ކުދިންނެވެ.

މީގެ އިތުރުން އެކަޑަމީގައި ބައިވެރިވުމަށް ޝައުގުވެރިވެލައްވާ ފަރާތްތަކުން އިތުރު މައުލޫމަތު ހޯއްދެވުމަށް 7921313، 9681012 ނަންބަރު ފޯނަށް ގުޅުއްވުމަށް ވަނީ އެދިލައްވާފައެވެ.