އަންނަ އަހަރު ރާއްޖޭގެ އިގުތިސާދު އިޔާދަވާން ފަށާނެ ކަމަށް އައިއެމްއެފުން ލަފާކޮށްފި

މެދުއިރުމަތީގެ ހަމަނުޖެހުންތަކާއި ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކުގެ ސަބަބުން ރާއްޖޭގެ އިގުތިސާދީ ދުވެލި މިއަހަރު މަޑުޖެހުނު ނަމަވެސް، އަންނަ 2027 ވަނަ އަހަރުން ފެށިގެން އިގުތިސާދު އިޔާދަވާން ފަށާނެ ކަމަށް އިންޓަރނޭޝަނަލް މަނިޓަރީ ފަންޑް (އައިއެމްއެފް) އިން ލަފާކޮށްފިއެވެ.

މިކަން ހާމަކޮށްފައިވަނީ އައިއެމްއެފްގެ މިޝަން ޓީމަކުން ޖޫން 4 އިން 14 އަށް ރާއްޖެއަށް ކުރި ޒިޔާރަތަށްފަހު ނެރުނު ބަޔާނެއްގައެވެ. މި ޓީމުގެ އިސްވެރިއެއްގެ ގޮތުގައި މަސައްކަތް ކުރެއްވީ ޕިޔަޕޯން ސޮޑްސްރިވިބޫން އެވެ.

އައިއެމްއެފްގެ ރިޕޯޓުގައި ފާހަގަކޮށްފައިވާ ގޮތުގައި، މެދުއިރުމަތީގެ ހަމަނުޖެހުންތަކުގެ އަސަރު ރާއްޖޭގެ ފަތުރުވެރިކަމަށް ކޮށްފައިވާތީ، 2026 ވަނަ އަހަރު ރާއްޖޭގެ އުފެއްދުންތެރިކަން ނުވަތަ ޖީޑީޕީ ކުރިއަރާނެ ކަމަށް ލަފާކުރެވެނީ ގާތްގަނޑަކަށް 1 އިންސައްތައަށެވެ. ނަމަވެސް، 2027 ވަނަ އަހަރުން ފެށިގެން އިގުތިސާދު ރަނގަޅުވާން ފަށައި، މެދު ރާސްތާގައި އިގުތިސާދީ ދުވެލި 4 އިންސައްތައިގައި ހުންނާނެ ކަމަށް ވަނީ އަންދާޒާކޮށްފައެވެ.

ރާއްޖޭގެ މާލީ ހާލަތާ ގުޅޭގޮތުން އައިއެމްއެފުން ބުނީ، ދާދި ފަހުން ދަރަނި އަދާކުރުމުގެ ސަބަބުން ވަގުތީ ލުޔެއް ލިބުނު ނަމަވެސް، ޖުމްލަ ފިސްކަލް ޑެފިސިޓާއި ދައުލަތުގެ ދަރަނި އަދިވެސް ހުރީ މަތީ މިންވަރެއްގައި ކަމަށެވެ. އަދި ބޭރުގެ ދަރަނި ދެއްކުމުގައި ހުރި ނުރައްކާ އަދިވެސް ބޮޑުކަން އެ އިދާރާއިން ފާހަގަކުރިއެވެ.

މި ހާލަތުން އަރައިގަތުމަށްޓަކައި ސަރުކާރުން ހަރަދު ކުޑަކުރުމުގެ އިތުރުން، އާމްދަނީ އިތުރުކުރުމަށް އިތުރު މަސައްކަތްތަކެއް ކުރަންޖެހޭ ކަމަށް އައިއެމްއެފުން ލަފާދެއެވެ. ޚާއްޞަކޮށް، ސަބްސިޑީގެ ނިޒާމު މުރާޖާކޮށް، އެންމެ ބޭނުންޖެހިފައިވާ ފަރާތްތަކަށް އެހީތެރިކަން ފޯރުކޮށްދިނުމާއި، އިއާދަކުރަނިވި ހަކަތައަށް ބަދަލުވުން އަވަސްކުރުމަކީ މުހިންމު ކަމެއްގެ ގޮތުގައި ވަނީ ފާހަގަކޮށްފައެވެ.

މީގެ އިތުރުން، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އޯޕަން މާކެޓް އޮޕަރޭޝަންތައް އަލުން ފެށުމާއި، ފޮރިން އެކްސްޗޭންޖް ރިޒާވް ބިނާކުރުމަށް އަޅަމުންދާ ފިޔަވަޅުތަކަށް އައިއެމްއެފުން ވަނީ މަރުހަބާ ކިޔާފައެވެ.