އެމްއެމްއޭގެ ދިރާސާ ފަންޑުން ފަސް މިލިއަން ރުފިޔާގެ ހިލޭ އެހީއަށް ކުރިމަތިލާން ހުޅުވާލައިފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރިސާޗް ފަންޑުގެ ދަށުން މި އަހަރު ދޫކުރާ ގްރާންޓަށް ޝައުޤުވެރިވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުޞަތު މިއަދު ހުޅުވާލައިފިއެވެ.

އެމްއެމްއޭއިްނ ބުނީ ޖުމްލަ ފަސް މިލިއަން ރުފިޔާ ކަނޑައަޅާފައިވާ މި ފަންޑުން ދެ ބާވަތެއްގެ ގްރާންޓަކަށް ހުށަހެޅޭނެ ކަމަށެވެ. އެއީ ވަކި ފަރާތެއްގެ ބެލުމުގެ ދަށުން ހިންގާ މިނިވަން ދިރާސާ ގްރާންޓާއި ފޮތް ލިޔުމުގެ ގްރާންޓެވެ. އަމިއްލަ ފަރުދުންނާއި ތަޢުލީމީ މުއައްސަސާތަކާއި ތިންކް ޓޭންކުތަކަށް މި ފުރުޞަތުގައި ބައިވެރިވެވޭނެއެވެ.

ގްރާންޓަށް ހުށަހަޅާ ޓީމެއްގެ އިސް ފަރާތެއްގެ ގޮތުގައި ހުންނަން ޖެހޭނީ މާސްޓާސް ޑިގްރީ ނުވަތަ އެއަށް ވުރެ މަތީ ސަނަދެއް އޮތް މީހެއް ކަމަށް އެ އޮތޯރިޓީން ބުނެފައިވެއެވެ. އޭގެ އިތުރުން ޕީއެޗްޑީ ޙާޞިލުކޮށްފައިވާ ފަރާތްތަކުން ކުރިމަތިލުމަށް އެ އޮތޯރިޓީން ޚާއްޞަ ގޮތެއްގައި ބާރު އަޅައެވެ. ގްރާންޓް ދިނުމުގައި އެންމެ ބޮޑު އިސްކަމެއް ދެނީ އެމްއެމްއޭގެ ލަނޑުދަނޑިތަކާ ގުޅުން ހުރި ޤައުމަށް އެންމެ ބޭނުންތެރި ދާއިރާތަކުގެ ދިރާސާތަކަށް ކަމަށް ވިޔަސް އެ ނޫން ދާއިރާތަކުން ވެސް ޕްރޮޕޯސަލް ބަލައިގަންނާނެއެވެ. އިސްކަންދޭ ދާއިރާތަކުގެ ތެރޭގައި އިޤްތިޞާދީ ހަމަޖެހުމާއި މަނިޓަރީ ސިޔާސަތު މާލީ ދާއިރާގެ ވިލުންވެރިކަމާއި ޤާނޫނީ ނިޒާމު ޑިޖިޓަލައިޒޭޝަނާއި ފިންޓެކް ފަތުރުވެރިކަމާއި ދެމެހެއްޓެނިވި އިޤްތިޞާދު އިސްލާމީ މާލިއްޔަތު ވަޒީފާގެ ބާޒާރާއި ތަޢުލީމީ ދާއިރާ ބޯހިޔާވަހިކަން އަދި ޞިއްޙީ ދާއިރާއާއި ދައުލަތުގެ ޚަރަދާއި އިޖުތިމާޢީ ރައްކާތެރިކަން ހިމެނެއެވެ.

މި ފަންޑަކީ ޢިލްމީ ހެކީގެ މައްޗަށް ބިނާކޮށް ސިޔާސަތު ބައްޓަންކުރުމަށް ބާރުއެޅުމާ އެކު ރާއްޖޭގެ އިޤްތިޞާދީ އަދި މާލީ ހަމަޖެހުމަށް މަގުދައްކާ ފެންވަރު ރަނގަޅު ދިރާސާ ކުރިއެރުވުމުގެ މަޤުޞަދުގައި ޤާއިމުކޮށްފައިވާ ފަންޑެކެވެ.

2024 ވަނަ އަހަރުގެ ޑިސެމްބަރު މަހު އެމްއެމްއޭގެ ރިސާޗް ކޮންފަރެންސްގައި މި ފަންޑު ރަސްމީކޮށް ތަޢާރަފުކޮށް 2025 ވަނަ އަހަރު ހިންގި ފުރަތަމަ ބުރުގައި ހަ ދިރާސާ ޕްރޮޕޯސަލަކާއި އެއް ފޮތް ގްރާންޓެއް ދީފައިވެއެވެ. މި އަހަރުގެ ގްރާންޓަށް ޕްރޮޕޯސަލް ހުށަހެޅޭނީ އެމްއެމްއޭގެ ރިސާޗް ފަންޑް ޕޯޓަލް މެދުވެރިކޮށް 13 އޮކްޓޫބަރު 2026 ގެ ނިޔަލަށެވެ.