އިސްލާމީ މަރުކަޒު ބަންދެއްނުކުރޭ. ޖަމާއަތަށް މީހުން ހާޒިރުވި: އިމާމް
ލިޔުންތެރިޔާ
އަބްދުﷲ ހުސައިން
އިސްލާމީ މަރުކަޒު އިއްޔެ ބަންދުކުރިކަމަށް ދެކެވެމުންދާ ވާހަކަތައް، އެ މިސްކިތުގެ އިމާމް އައްޝައިހް އިބްރާހިމް ރަޝީދު ހަސަން ދޮގުކުރައްވައިފިއެވެ.
އިންޑިއާގެ ބޮޑުވަޒީރު ނަރެންދްރަ މޯދީ އިއްޔެ މާލެސިޓީއަށް ވަޑައިގަތުމާ ދިމާކޮށް، އަސްރު ނަމާދު ވަގުތަށް އިސްލާމީ މަރުކަޒު ބަންދުކުރިކަމަށް ބައެއް ފަރާތްތަކުން ސޯޝަލް މީޑިއާގައި ވަނީ އެވާހަކަ ދައްކާފައެވެ. މިކަމާ ގުޅޭގޮތުން ފޭސްބުކްގައި ކުރެއްވި ޕޯސްޓެއްގައި ޝެއިހް އިބްރާހިމް ރަޝީދު ވިދާޅުވީ، އިސްލާމީ މަރުކަޒު ބަންދު ނުކުރާކަމަށެވެ.
އެގޮތުން އިއްޔެ އިސްލާމީ މަރުކަޒު ސަރަޙައްދު ވަކި ވަގުތަކަށް ވެހިކަލް ވަނުމާއި ޕާކުކުރުން މަނާކުރުމުގެ ސަބަބުން، އިސްލާމީ މަރުކަޒަށް ނަމާދަށް އާއްމުކޮށް އަންނަމީހުން، މަދުވިކަމަށް ޝެއިހް ވިދާޅުވިއެވެ. އެހެންއެވީ ދުރުސަރަޙައްދުގައި ޕާކުކުރަންޖެހޭތިީކަމަށް ފާހަގަކުރެއްވިއެވެ.
ޝެއިހްގެ ޕޯސްޓްގައި ވިދާޅުވީ، ބަންގި ގޮވިއިރު ވެސް މިސްކިތުގައި ހުރީ އެންމެ މީހެއް ކަމަށާއި، އަދި ނަމާދުގެ ޖަމާޢަތަށް ވެސް ހާޒިރުވީ ފަންސަވީހަކަށް މީހުން ކަމަށެވެ. އެއްވެސް ޙާލެއްގައި އިސްލާމީ މަރުކަޒު ނަމާދު ނުކުރެވޭ ގޮތަށް ބަންދެއް ނުކުރާކަމަށް އިމާމް ވިދާޅުވިއެވެ.
މޯދީ އިއްޔެ މާލެސިޓީއަށް ވަޑައިގަތުމާ ގުޅިގެން އިސްލާމީ މަރުކަޒު ހިމެނޭ ގްރީން ޒޯން ބަންދުކުރިއިރު، ބައެއް ފަރާތްތަކުން ވަނީ، މިސްކިތަށް ދިއުމަށް ދަތިތަކެއް ކުރިމަތިވިކަން ސޯޝަލް މީޑިއާގައި ފާހަގަކޮށް ޝަކުވާކޮށްފައެވެ.
މޯދީގެ ދަތުރުފުޅާ ދިމާކޮށް ޖުމްހޫރީ މައިދާން ހިމެނޭ ސަރަހައްދު ވަނީ އިއްޔެ ހެދުނު 11 އިން ފެށިގެން އިރުއޮއްސި 6 ޖެހުމާ ހަމައަށް ބަންދުކޮށްފައެވެ. އެކަން ސަލާމަތީބާރުތަކުން ވަނީ ކުރިން އާއްމުކޮށް އަންގައި ކުރިމަތިވެދާނޭ ދަތިތަކަށް މައާފަށްވެސް އެދިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
