ބައެއް ޓަވަރުތަކުން ކަރަންޓް ކެނޑުނީ މައި ކޭބަލަކަށް ގެއްލުންވުމުން: ސްޓެލްކޯ
ލިޔުންތެރިޔާ
އަބްދުﷲ ހުސައިން
ހުޅުމާލޭގެ ދެވަނަ ފިޔަވަހީގެ ބައެއް ޓަވަރުތަކުން މިއަދު ހަވީރުން ފެށިގެން ކަރަންޓް ކެނޑުމުގެ މައްސަލަ ދިމާވީ ދެވަނަ ފިޔަވައްސަށް ކަރަންޓް ދިނުމަށް ބޭނުންކުރާ ކޭބަލްތަކުގެ ތެރެއިން މައި ކޭބަލަކަށް ގެއްލުންވުމުންކަމަށް ސްޓެލްކޯއިން ބުނެފިއެވެ.
މިއަދު ހަވީރު ހަތަރެއްގެ ފަހުން ހުޅުމާލެ ފޭސް ދޭއްގެ ބައެއް ޓަވަރުތަކުން ވަނީ ކަރަންޓް ކަނޑައިގެން ގޮސްފައެވެ. ބައެއް ޓަވަރުތަކުން ދެފަހަރެއްގެ މަތިން ކަރަންޓް ގޮސްފައިވާއިރު، އަނެއްބައި ޓަވަރުތަކަށް ކަރަންޓް ފޯރުކޮށްދިނުމުގައި އަދިވެސް މައްސަލަތަކެއް ކުރިމަތިވަމުން ދާކަމަށް ސްޓެލްކޯއިން ބުންޏެވެ. ކަރަންޓް ކަނޑައިގެން ދިޔަ ޓަވަރުތަކުގެ ތެރޭގައި ވިނަރެސް އަދި ހިޔާގެ ޓަވަރުތައް ހިމެނެއެވެ.
މިކަމާ ގުޅޭގޮތުން ސްޓެލްކޯއިން މިރޭ ބުނެފައިވަނީ، ހުޅުމާލޭގެ ދެވަނަ ފިޔަވަހީގެ ބައެއް ޓަވަރުތަކުން ކަރަންޓުގެ ޚިދުމަތް މެދުކެނޑެން ދިމާވީ، ދެވަނަ ފިޔަވައްސަށް ކަރަންޓު ފޯރުކޮށްދިނުމަށް އަޅާފައިވާ މައި ހަތަރު ކޭބަލްގެ ތެރެއިން އެއް ކޭބަލަށް ގެއްލުންވުމާ ގުޅިގެން ކަމަށެވެ. މި ކޭބަލަށް ގެއްލުން ލިބިފައިވަނީ، ކޮނުމުގެ މަސައްކަތުގެ ތެރެއިންކަމަށް ބެލެވޭކަމަށް ސްޓެލްކޯއިން ވަނީ ބުނެފައެވެ.
ސްޓެލްކޯއިން ބުނީ، މިވަގުތު ދެވަނަ ފިޔަވަހީގެ ކަރަންޓު ވިއުގައާއި ލޯޑު ހުރިގޮތުން، ބާކީ ހުރި ތިން ކޭބަލް މެދުވެރިކޮށް މުޅި ދެވަނަ ފިޔަވައްސަށް ފުރިހަމައަށް ކަރަންޓު ފޯރުކޮށްދިނުމުގައި ދަތިތަކެއް ދިމާވެފައިވާކަމަށެވެ. ސްޓެލްކޯގެ ޓެކްނިކަލް ޓީމުން މިހާރުވެސް ދަނީ ދިމާވި މައްސަލަ ހައްލުކުރުމުގެ މަސައްކަތް ކުރަމުންނެވެ.
ސްޓެލްކޯއިން ބުނީ ޚިދުމަތް މެދުކެނޑިފައިވާ ހުރިހާ ސަރަހައްދަކަށް އަލުން ކަރަންޓު ދިނުމަށްޓަކައި، އެ ކޭބަލްގެ ލޯޑު ބާކީ ހުރި ތިން ކޭބަލަށް ބަހާލުމުގެ މަސައްކަތް ކުރަމުންދާކަމަށެވެ.
ކޮނުމުގެ ތެރެއިން ކަރަންޓް ކޭބަލަށް ގެއްލުންވެ ކަރަންޓް ކެނޑުމުގެ މައްސަލައަކީ ދޭތެރެއަކުން ދިމާވާ މައްސަލައެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
