ޕެނަލްޓީގައި ގޯޓް އެފްސީ ބަލިކޮށް ލާސްޓު މިނެޓުން ޗެންޕިއަންކަން ހޯދައިފި

"ދަ އަރައިވަލް އޭއާރުއާރުސީ ފުޓްސަލް ކަޕް 2024" ގެ ފިރިހެން ޑިވިޝަން ސެމީ ފައިނަލް ދެވަނަ މެޗުގައި ގޯޓް އެފްސީ އާއި ލާސްޓް މިނެޓް ވާދަކުރި މެޗު 3-3 ގެ ނަތީޖާއަކުން އެއްވަރުވެ، ނަތީޖާ ނެރުމަށްޓަކައި ޖެހި ޕެނަލްޓީގައި 6-7 ގެ ނަތީޖާއަކުން މޮޅުވެ ލާސްޓް މިނެޓުން މުބާރާތުގެ ޗެންޕިއަންކަން ހޯދައިފިއެވެ.

ގޯޓް އެފްސީ މުބާރާތުގެ  ފައިނަލުން ޖާގަ ހޯދީ ސެމީފައިނަކުގައި ކެހެޝާއި ދެކޮޅަށް ކުޅުނު މެޗު 1-1 ގެ ނަތީޖާއަކުން އެއްވަރުވެ، ނަތީޖާ ނެރުމަށްޓަކައި ޖެހި ޕެނަލްޓީގައި 5-3 ގެ ނަތީޖާއަކުން ކުރިހޯދައިގެންނެވެ. އަދި އެފްސީ ލާސްޓް މިނެޓުން ފައިނަލުގެ ޖާގަ ހޯދީ ސެމީފައިނަލުގައި ފަހަތުން އަރައި 4-3 ގެ ނަތީޖާއަކުން އިންކޮގްނިޓޯ ބަލިކުރުމަށްފަހުއެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ކުރެ ކޮންމެ ޓީމަކުން ވެސް ވަނީ ދެލަނޑު ކާމިޔާބުކޮށްފައެވެ. އަދި ދެވަނަ ހާފުގައި ދެޓީމުން ކުރެ ކޮންމެ ޓީމަކުން އިތުރު އެއްލަނޑު ކާމިޔާބުކުރިއިރު، މެޗުގެ ފުރިހަމަ ވަގުތުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

އެގޮތުން މިމެޗުގައި އެފްސީ ލާސްޓް މިނެޓުގެ އަހުމަދު ހުނައިފު ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ މުހައްމަދު އާއިޝް އެވެ. އަދި މީގެ އިތުރުން ގޯޓް އެފްސީގެ އަހުމަދު ސުހައިލް، ތޮލްހަތު މުހައްމަދު ފުޅު އަދި  އީމާން އިލްޔާސް މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި ފައިނަލް މެޗުގެ މޮޅު ކުޅުންތެރިއަކަށް ހޮވުނީ އެފްސީ ލާސްޓް މިނެޓުގެޱއަހުމަދު ހުނައިފް އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ އަހުމަދު ހުނައިފް (ލާސްޓް މިނެޓް)، މުހައްމަދު އާއިޝް (ލާސްޓް މިނެޓް)، ނާޝިދު އަހުމަދު (ލާސްޓް މިނެޓް)، އީމާން އިލްޔާސް (ގޯޓް އެފްސީ) އަދި އިބްރާހިމް އަބްދުއް ސައްތާރު (ގޯޓް އެފްސީ) އެވެ.

މުބާރާތުގެ ފެއާ ޕްލޭ ޓީމަކަށް އެފްސީ ރެޑްވިންގްސް ހޮވުނުއިރު، އެންމެ މޮޅު ކޯޗަކީ އެފްސީ ލާސްޓް މިނެޓުގެ އަފޫ އެވެ. އަދި މުބާރާތުގެ އެންމެ ގިނަ ލަނޑުޖެހި ކުޅުންތެރިއާގެ މަގާމަށް ދެކުޅުންތެރިއަކު ވަނީ ހޮވިފައެވެ. އެއީ އަހުމަދު ހުނައިފް (ލާސްޓް މިނެޓް) އަދި މުހައްމަދު އާއިޝް (ލާސްޓް މިނެޓް) އެވެ. މިދެކުޅުންތެރިން ވެސް ވަނީ މުބާރާތުގައި 10 ލަނޑު ކާމިޔާބުކޮށްފަ އެވެ.

މީގެ އިތުރުން މުބާރާތުގެ އެންމެ މޮޅު ކުޅުންތެރިއަކަށް ހޮވުނީ އެފްސީ ލާސްޓް މިނެޓުގެ އަހުމަދު ހުނައިފް އެވެ.

ޖޫން 01-15 އަށް ކުރިއަށް ގެންދާ މިމުބާރާތުގެ ފިރިހެން ޑިވިޝަންގައި ޖުމްލަ 12 ޓީމު ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމު ކުއާޓާ ފައިނަލަށް ހޮވޭއިރު، ތިން ގުރޫޕުން ތިންވަނަ ހޯދާ ތިން ޓީމުގެ ތެރެއިން އެންމެ ނަތީޖާ ރަނގަޅު ނަތީޖާއެއް ހޯދި ދެޓީމަށް ވެސް ވަނީ ކުއާޓާ ފައިނަލުން ފުރުސަތު ވަނީ ލިބިފައެވެ.

މިއަހަރުގެ މުބާރާތުގެ ޓައިޓަލް ސްޕޮންސަރ އަކީ ދަ އެރައިވަލް ޓްރެވަލް ޓެބްލޮއިޑް އެވެ. އަދި މުބާރާތުގެ ގޯލްޑް ސްޕޮންސަރ އަކަށް އަލްޝާލީ މެރިން މޯލްޑިވްސް ހަމަޖައްސާފައިވާއިރު، މުބާރާތުގެ ޑިޖިޓަލް ޕާޓްނަރަކީ ދިރާގެވެ.

މީގެ އިތުރުން މުބާރާތުގެ ކިޓްސް ޕާޓްނަރަކަށް މެނީ މޯލްޑިވްސް ހަމަޖައްސާފައިވާއިރު، މީޑިއާ ޕާޓްނަރަކީ ވޮއިސް ސްޕޯޓްސް އެވެ.