ޕްރިމިއާ ލީގް ތަށި ނެގުމަށް އާސެނަލް ދެން ބޭނުންވަނީ އެންމެ ޕޮއިންޓެއް

ބާންލީ ބަލިކޮށް އިނގިރޭސި ޕްރިމިއާ ލީގް ހޯދުމާ ގާތަށް އާސެނަލް ޖެހިލައިފިއެވެ.

ޕްރިމިއާ ލީގްގައި ރޭ އާސެނަލް އާއި ބާންލީ ބައްދަލުކުރިމެޗް 1-0 ގެ ނަތިޖާއަކުން ކާމިޔާބުކުރީ އާސެނަލްއެވެ. އެމިރޭޓްސް ސްޓޭޑިއަމްގައި ކުޅުނު މިމެޗްގައި އާސެނަލުން ވަނީ މޮޅަށް ކުޅެ ބާންލީގެ ޑިފެންސްލައިނަށް ބާރުބޮޑުކޮށްފައެވެ.

މެޗްގައި ފެނިގެންދިޔަ ހަމައެކަނި ލަނޑު އާސެނަލަށް ކާމިޔާބުކޮށްދިނީ، 37 ވަނަ މިނެޓް ތެރޭގައި ސަކާ ތަނަވަސްކޮށްދިން ފުރުސަތެއްގައި ހާވާޓްޒް އެވެ. ޕްރިމިއާ ލީގް ކާމިޔާބުކުރަން ދެން އާސެނަލް ބޭނުންވަނީ އެންމެ ޕޮއިންޓެވެ. ލީގްގައި އާސެނަލްއަށް ދެން އޮތީ އެންމެ މެޗެކެވެ. އެއީ މިމަހުގެ 24 ވަނަ ދުވަހު ރަށުން ބޭރުގައި ކްއީން ޕާކް ރޭންޖާސް އާ ދެކޮޅަށް ނިކުންނަ މެޗެވެ. މި މެޗް ކުޅޭނީ ކިއުޕީއާރުގެ ދަނޑުގައެވެ. މިމެޗް އެއްވަރުކޮށްލައިގެންވެސް އާސެނަލްއަށް ޗެމްޕިއަންކަން ލިބޭނެއެވެ.

ޕްރިމިއާ ލީގް ޕޮއިންޓް ތާވަލް މިހާރު އޮތްގޮތަށް ބަލާއިރު ތާވަލްގެ އެއްވަނާގައި އާސެނަލް މިވަގުތު އޮތީ ފަސް ޕޮއިންޓްގެ ލީޑަކާއެކުގައެވެ. އާސެނަލްއަށްވުރެ އެއްމެޗް މަދުން ކުޅެ، މެންޗެސްޓަރ ސިޓީ ދެވަނާގައި އުޅެނީ 77 ޕޮއިންޓާއެކުގައެވެ.

އިނގިރޭސި ޕްރިމިއާ ލީގްގައި މިރޭ މެންޗެސްޓަރ ސިޓީ ނިކުންނާނީ، ބޯންމައުތާ ދެކޮޅަށެވެ.