ޝާދިޔާ އާއި ޝަޒުރާ ދޫކޮށްލައިފި
ރާއްޖޭގައި ހުރި ބައެއް އެމްބަސީތައް ކައިރިއަށް ގޮސް އިޒްރޭލާ ދެކޮޅަށް އަޑު އުފުލަމުންދިޔަ ދެ އަންހެނުން ދޫކޮށްލައިފިއެވެ.
ކޯޓު އަމުރެއްގެ ދަށުން މިދިޔަ މަހުގެ 28 ވަނަ ދުވަހު މި މައްސަލައގައި ހައްޔަރުކޮށްފައިވަނީ ގދ. ރަތަފަންދޫ، ލިލީގެ ޑރ ޝަޒްރާ އިބްރާހިމް (36އ) އާއި މ. ބަޑިކުޅިމާގެ، އައިޝަތު ޝާދިޔާ(47އ) އެވެ.
މި މައްސަލައާއި ގުޅިގެން ފުލުހުން ބުނީ އެ ދެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރުތުކޮށް ދޫކޮށްލުމަށް ގާޒީ އަމުރު ކޮށްފައިވާ ކަމަށެވެ.
ފުލހުން ބުނިގޮތުގައި، ޝާދިޔާ އާއި ޝަޒްރާ ހައްޔަރުކުރެވުނު އެއް ސަބަބަކީ ޑިޕްލޮމެޓިކް މިޝަންތަކުގެ ކައިރީގައި ތަކުރާރުކޮށް އެއްވުމެވެ. މީގެ އިތުރުން އަޑުގަދަކުރާ ބޭނުންކޮށްގެން ހަޅޭއްލެވުމާއި މުޖުތަމައުއަށް އެކަށީގެން ނުވާ ބަހުރުވައިން މުޢާމަލާތްކުރުން ހިމެނެއެވެ.
ވަކި ސަފީރަކަށް އުނދަގޫކުރުމުގެ އަމަލުތަކެއް އެ ދެމީހުން ހިންގިކަމަށާ އެމީހުން ފުލުހުންގެ އިރުޝާދުތަކަށްވެސް ތަބައުވެފައި ނުވާ ކަމަށް ފުލުހުން ބުނެއެވެ.
ފުލުހުން އިތުރަށް ބުނެފައިވާ ގޮތުން، މި އަމަލުތަކަކީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނާ ޚިލާފު ކަންތައްތަކެކެވެ. އަދި މީގެ ކުރިންވެސް މި ދެ އަންހެނުންނަށް ވަނީ މިފަދަ އަމަލުތައް ނުކުރުމަށް ނަސޭހަތްތެރިވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
