ކައުންސިލު މެންބަރުންގެ މުސާރަ ބޮޑުކުރަން ހުށައަޅައިފި؛ ރައީސަށް 45،000ރ، ނާއިބަށް 35،000ރ
ލިޔުންތެރިޔާ
އަހުމަދު ހަމީދު އާދަމް
ކައުންސިލްތަކުގެ މެންބަރުންގެ މުސާރަ ބޮޑުކުރަން ރައްޔިތުންގެ މަޖިލީހަށް ހުށައަޅައިިފި އެވެ.
އަންހެނުންގެ ތަރައްގީއަށް މަަސައްކަތްކުރާ ކޮމެޓީތަކުގެ މެންބަރުންގެ މުސާރައަށް ބޮޑު ބަދަލެއް ގެނެސްފައިވަނިކޮށް ކައުންސިލްތަކުގެ މެންބަރުންގެ މުސާރަ ބޮޑުކުރަން ހުށައެޅީ އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމެވެ.
އެ ހުށައެޅުން ފާހަގަކޮށް މެންބަރު މުހައްމަދު އިބްރާހިމް މަޖިލީހުގެ ރައީސަށް ފޮނުއްވެވި ސިޓީގައި ވަނީ އެކަން ކަމާގުޅޭ ކޮމެޓީގައި ކުރިއަށް ގެންގޮސް ދެއްވުމަށް އެދިފަ އެވެ. އެގޮތުން ކައުންސިލްތަކުގެ ރައީސުންގެ މުސާރަ 45,000ރ އަަށް ބޮޑުކުރުމަށާއި ނާއިބު ރައީސުންގެ މުސާރަ 35,000ރ އަށް ހަމަޖެއްސުމަށް އެދިފައިވެ އެވެ.
އަދި ކައުންސިލް މެންބަރުންގެ މުސާރައަކީ 25,000ރ ކަމަށް ކަނޑައަޅަން އޭނާ އެދިފައިވެ އެވެ.
ކައުންސިލަރުންްގެ މުސާރަ އެ މިންވަރަށް ބޮޑުކުރަން ޖެހޭ ސަބަބުތައްވެސް އޭނާ ފާހަގަކޮށްފައިވެ އެވެ. ސިޓީގައި ވިދާޅުވެފައި ވަނީ ކައުންސިލްތަކުގެ ރައީސުންގެ މުސާރަ ސެކްރެޓަރީ ޖެނެރަލުންގެ މުސާރައަށް ވުރެ ކުޑަ ކަމަށެވެ. އަދި ކައުންސިލަރުންގެ މުސާރަ, ކައުންސިލްގެ ބައެއް އިދާރީ މުވައްޒިފުންނަށް ވުރެ ކުޑަ ކަމަށެވެ.
އެހެން ކަމުން މިއީ ނިޒާމާއި ބީރައްޓެހި އިންތިހާބީ އޮފިސަލުންގެ ބާރުވެރިކަމަށް އުނިކަން އަންނާނެ ކަމެއް ކަމަށް ފާހަގަކޮށްފައިވެ އެވެ.
ކައުންސިލްތަކުގެ މެންބަރުންގެ މުސާރަ ބޮޑުކުރަން ރައްޔިތުންގެ މަޖިލީހަށް ހުށައަޅާފައިވާއިރު އަންހެނުންގެ ތަރައްގީއަށް މަަސައްކަތްކުރާ ކޮމެޓީތަކުގެ ސިޓީތަކުގެ ރައީސުންގެ މުސާރަ 41,000ރ އަށް އަދި ރަށްރަށުގެ ރައީސުންގެ މުސާރަ 21,000ރ ވަނީ ބޮޑުކުރަން ނިންމާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
