ދިގުމުއްދަތަށް ރިހެބިލިޓޭޝަނަށް ގެންދާ ކުދިން ސިފައިންނާއި ފުލުހުންގެ ޚިދުމަތަށް ނެރެވޭނެ: ވަޒީރު އިހުސާން

ދިގުމުއްދަތަށް ރިހެބިލިޓޭޝަން މަރުކަޒަށް ގެންދެވޭ ކުދިން 18 އަހަރުވުމުން ސިފައިންގެ އަދިި ފުލުހުންގެ މުއައްސަސާގެ ޚިދުމަތަށް 3 ނުވަތަ 5 އަހަރުގެ މުއްދަތަށް ނެރެވޭނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ.

ވަޒީރު އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، މިހާރު ޤާނޫނު އޮތްގޮތުން ކުށުގެ ވެށީގައި އުޅޭ ނުވަތަ ކުށަށް އަރައިގަންނަ ކުދިންނަށް ދޭންޖެހޭ ރިހެބިލިޓޭޝަން އަދި ސައިކޮލޯޖިކަލް ފަރުވާ މަރުކަޒުކޮށްގެން ދެވެނީ 15 އަހަރު ވީމަ ކޯޓު ހުކުމެއްގެ ދަށުންކަމަށެވެ.

ރާއްޖޭގައި ކުށުގެ ވެށީގައި އުޅޭ އަދި ކުށަށް އަރައިގަންނަ 12، 13 އަދި 14 އަހަރުގެ ކުދިން ނިސްބަތުން ވަރަށްގިނަކަން ފާހަގަކުރައްވާ ވަޒީރު ވިދާޅުވީ، މީގެތެރެއިން ގިނަކުދިންނަކީ ހަރުދަނާ ބެލެހެޓުންތެރިކަމާއި ރައްކާތެރިކަން ފޯރުކޮށްނުދެވޭ އާއިލާތަކުގެ ކުދިން ކަމަށެވެ. މިކުދިންނަށް މުޖުތަމައުގައި ބައިތިއްބައިގެން ނުވަތަ އާއިލާ ކައިރީގައި ބައިތިއްބައިގެން ރިހެބިލިޓޭޓްކުރުމަކީ އެހާ ކާމިޔާބުކޮށް ކުރެވޭކަމެއް ކަމަކަށް ތަފާސްހިސާބުތަކުން ނުދައްކާއިރު މީގެ ނަތީޖާއެއްގެ ގޮތުން މިފަދަ ކުދިންގެ ސަބަބުން މުޖުތަމަޢުއަށް ނުރައްކާވެ އެކުދިން ކުށްވެރިންނަށް ވެގެން ދިޔުމުގރ އިތުރުނ އއެތަކެއް މައުސޫމު ކުދިންނާއި މުޅި މުޖުތަމަޢުއަށް މީގެ ނޭދެވޭ ގިނަ އަސަރުތަކެއް ކުރާނެ ކަމަށް ވެސް ވަޒީރު އިހުސާން ވިދާޅުވިއެވެ.

މި ސަރުކާރުން  ޤާނޫނުގައި ބަޔާންކުރާ 15 އަހަރުގެ ލިމިޓް 12 އަހަރަށް ދަށް ކުރަން ނިންމާފައިވާ ކަމަށާއި، މި ނިންމުމުގެ ސަބަބުން ކުއްޖަކު ކުށުގެ މާހައުލަށް ހުށެހެޅި ކުށްވެރިއަކަށް ނުވަނީސް އެކުއްޖާ ކޯޓުއަމުރެއްގެދަށުން މަރުކަޒަކަށް ގެންދެވި ރިހެބިލިޓޭޓް ކުރެވި މުޖުތަމަޢުއަށް ބޭނުންތެރި ޒުވާނަކަށް ހެދޭނެ ކަމަށް ވެސް ވަޒީރު އިހުސާން ވިދާޅުވިއެވެ.

ވަޒީރު އިހުސާން ވިދާޅުވީ، އޭގެ ސަބަބުން، ކުށަށް އަރައިގަންނަ މި ކުދިންނަށް ދީނީ ތައުލީމާއި ތަރުބިއްޔަތު،މަސައްކަތްތެރިކަން، ޤައުމިއްޔަތު ފަދަ އެތައް ކަމެއް ހިމެނޭ ރެޖިމެންޓެޑް ސިސްޓަމެއްގެ ތެރެއިން ފަރުވާދީ، އެކުދިން ސަލާމަތް ކުރެވި، ހިތްވަރުގަދަ، ކެރޭ، ޤައުމަށް ފައިދާހުރި ޒުވާނުންނަށް ބަދަލުކުރެވޭނެކަމަށެވެ.

މީގެ އިތުރުންވެސް ވަޒީރު އިހުސާން ވަނީ، ދިގުމުއްދަތަށް އަދި ދެމެހެއްޓެނިވި ގޮތަކަށް މިކަން ކުރުމަށްޓަކައި ސަރުކާރުގެ ވިސްނުމަކީ މިކަމަށް ޚާއްސަ ރަށެއް “ހޯޕް އައިލެންޑް” ކަނޑައަޅައިތަރައްގީކޮށް މިމައްސަލައަށް ދާއިމީ ހައްލެއް ގެނައުން ކަމަށާއި، މިރަށުގައި ޗުއްޓީ ދުވަސްވަރު އެކުދިންގެ އާއިލާ ތަކަށް ޒިޔާރަތްކުރެވި އާއިލާއާއި އެކު ގުޅުންބަދަހި ކުރެވޭނެ ފެސިލިޓީތައް ޤާއިމު ކުރިގެންދާނެ ކަމަށް ވިދާޅުވެފައެވެ.

ކުރިއަށް އޮތް ހަފްތާގެ ތެރޭގައި، ހއ.ހޯރަފުށީގައި ހުރި ކުޑަކުދިންގެ ރީހެބިލިޓޭޝަން ސެންޓަރ ހުޅުވައި، ހިދުމަތްދޭން ފަށާނެ ކަމަށް ވެސް ރޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު އިހުސާން ވަނީ ވިދާޅުވެފައެވެ.

ހަމައެއާއެކު، ޖިނާޢީ ކުށުގެ ޒިންމާ އުފުލަން ޖެހޭ ޢުމުރު 15 އަހަރުން، 12 އަހަރަށް ދަށްކުރުމަށް ސަރުކާރުން ނިންމާފައިވާކަން ރޭގައި އިއުލާންކޮށްފައިވާއިރު، ބަންޑާރަ ނައިބު އަލްއުސްތާޛު އަހުމަދު އުޝާމް ވަނީ އީދު ބަންދު ނިންމާފައި، ހަފްތާއެއް ތެރޭ ގާނޫނަށް ގެންނަން ޖެހޭ މުހިންމު އިސްލާހުތައް ޑްރާފްޓު ކުރުމަށް ފަހު މަޖިލީހަށް ހުށައަޅާނެ ކަމަށް ވެސް ވިދާޅުވެފައެވެ.