ނޮވެންބަރު އެކަކުން ފެށިގެން މިޔަރު މަސްވެރިކަމަށް ހުއްދަ ދެނީ
ލިޔުންތެރިޔާ
އަހުމަދު ހަމީދު އާދަމް
މިޔަރުގެ މަސްވެރިކަމަށް މި އަހަރު ހުއްދަ ދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ ވިދާޅުވެއްޖެ އެވެ.
އެމަނިކުފާނު އެކަން އިއުލާނު ކުރެއްވީ މިޔަރުގެ މަސްވެރިކަމުން ކުރީން ބޮޑު މަންފާއެއް ހޯދަމުން އައި އަދި އެ މަސްވެރިކަމަށް އަލުން ހުއްދަދޭން އެންމެ ބޮޑު ޑިމާންޑެއް ކުރަމުން އަންނަ ކުޅުދުއްފުށި ސިޓީގެ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުންނެވެ.
މިޔަރުގެ މަސްވެރިކަމަށް ހުއްދަ ދިނުމާމެދު ގޮތް ނިންމާނެ ކަމަށް ސަރުކާރުން ކުރީން ވަނީ ބުނެފަ އެވެ. މިރޭގެ ޖަލްސާގައި ރައީސުލްޖުމްހޫރިއްޔާ ވިދާޅުވީ ކަށިމިޔަރުގެ މަސްވެރި ކަމަށް ހުއްދަ ދިނުމާއި ގުޅޭގޮތުން ކަމާގުޅޭ ދެ މިނިސްޓްރީ ކަމަށްވާ ފިޝަރީޒް މިނިސްޓްރީއާ އެންވަޔަރމަންޓް މިނިސްޓްރީން ގިނަ މަސަައްކަތްތަކެއް ކޮށްފައިވާ ކަމަށެވެ.
އަދި އެކަމާއި ގުޅޭގޮތުން މެނޭޖްމަންޓް ޕްލޭނެއް އެކުލަވާލާފައިވާ ކަމަށެވެ. ރައީސް ވަނީ ކަށިމިޔަރު މަސްވެރިކަމަށް ހުއްދަ ދޭނެ ތާރީޚުވެސް މިރޭ އިއުލާނު ކުރައްވާފަ އެވެ.
"މި މެނޭޖްމަންޓް ޕްލޭންގެ ދަށުން 1 ނޮވެންބަރުން ފެށިގެން ކަށިމިޔަރުގެ މަސްވެރިކަން ކުރަން ހުޅުވާލާނަން," ރައީސް ވިދާޅުވި އެވެ.
އެމަނިކުފާނު ވަނީ ނޮވެންބަރު އެކަކުން ފެށިގެން މިޔަަރުގެ މަސްވެރި ކަމަށް ހުރިހާ އެންމެނަށް ފުރުސަތު އޮންނާނެތީ އެކަމަށް ތައްޔާރުވުމަށް އެދިވަޑައިގެންފަ އެވެ. އަދި ވިދާޅުވީ މިއީ ހުޅުވާލެވޭ ވަރަށް މުހިންމު ދޮރެއް ކަމަށެވެ.
ރާއްޖޭގެ ކަނޑުގެ ސަރަހައްދުގައި މިޔަރު ގިނަވެ މަސްވެރިންގެ ޝަކުވާ ވަނީ ބޮޑުވެފަ އެވެ. މިޔަރު މަސްވެރިކަމަށް ހުއްދަ ދޭން މަސްވެރީން ވެސް ގޮވާލަ އެވެ. ނަމަވެސް އެއީ ދިވެހި ފަތުރުވެރިކަމަށް ގެއްލުން ވާނެ ކަމަށް ކަމަށް ބުނެ ބައެއް ޖަމިއްޔާތަކުން އެކަމަށް ވަރަށް ދެކޮޅު ހަދަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
