ހުކުރު މިސްކިތުގެ މުންނާރު މަސައްކަތް ރައީސް ފައްޓަވައިދެއްވައިފި
މާލޭގެ ހުކުރު މިސްކިތު މުންނާރުގެ އާބާތުރަ ފިލުވުމުގެ މަސައްކަތް، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފައްޓަވައި ދެއްވައިފި އެވެ.
ހުކުރު މިސްކިތުގެ މުންނާރުގެ އާބާތުރަ ފިލުވުމުގެ މަސައްކަތް ރަސްމީކޮށް ފެށުމުގެ ހަފްލާގައި ރައީސް ސޯލިހުގެ އިތުރުން ހެރިޓޭޖު މިނިސްޓަރު ޔުމްނާ މައުމޫނާއި ސްޓެލްކޯގެ އިސްވެރިން ބައިވެރިވެވަޑައިގެންނެވިއެވެ.
ސްޓެލްކޯއާއި ހަވާލުކޮށްފައިވާ އެމަސައްކަތް ނުފެށި ލަސްވެފައިވަނީ މޫސުން ތަން ނުދިނުމުގެ ސަބަބުން ކަމަށް ހެރިޓޭޖު މިނިސްޓްރީން ވަނީ ބުނެފައެވެ.
ހިރި ގަލާއި އުވައިން ބިނާކޮށްފައިވާ މުންނާރަކީ މާލޭގެ އެންމެ މަޝްހޫރު، އެންމެ ދުވަސްވީ އެއް ބިނާ އެވެ. މުންނާރު ވަރަށް ބޮޑަށް ހަލާކުވެފައިވާތީ އެކަމަށް އާންމުންގެ ވަރަށް ބޮޑު ފާޑިކިޔުން ސަރުކާރަށް އަމާޒުވެފައި ވެއެވެ.
މާލޭ ހުކުރު މިސްކިތުގެ މުންނާރަކީ މީލާދީން 1675 ވަނަ އަހަރު އިސްކަންދަރު ރަސްގެފާނު ބިނާކުރެއްވި މުންނާރެކެވެ. މުންނާރު ހަދައިފައިވަނީ ހިރިގާ ކޮށައި، މަށައިގެން ދެބުރިއަށެވެ. ފުރަތަމަ ބަޔަށްވުރެ މަތީބައި ހިމަކޮށެވެ. މުންނާރު ހަދައި ނިމުނީ ހިޖުރައިން 1085 ވަނަ އަހަރު، އަދި މީލާދީން 1675 ވަނަ އަހަރުއެވެ. އަދި ހިޖުރައިން 1324 ވަނަ އަހަރު، މީލާދީން 1906 އާއި 1907 ވަނަ އަހަރު އައްސުލްޠާން މުހައްމަދު ޝަމްސުއްދީންގެ ރަސްކަމުގައި މުންނާރު އާކުރެއްވިއެވެ.
އެ ގޮތުން ކުރެއްވި ކަންތައްތަކުގެ ތެރޭގައި، މުންނާރުގައި އޮޅައިފައި ހުރި ރޯނު ބަންދުތައް ބާވެގެން އެ ރޯނުތައް ނަގައި މުންނާރުގެ ވަށައިގެން ލޯ އިން މަތީ ބުރީގައި ދެ ބަންދު، އަދި ތިރީބައިގައި ހަ ބަންދު އެޅުވިއެވެ. އަދި ލިޔުންތައް އާކުރައްވައި ލިޔުންތަކުގައި ނޫކުލައިގެ ދަވާދު ލުމުގެ އިތުރުން 6 އޭޕްރިލް 1964 ގައި މުންނާރުގައި އަޑުގަދަކުރާ ބެހެއްޓިއެވެ.
މާލޭ ހުކުރު މިސްކިތް ވޯލްޑް ހެރިޓޭޖް ޓެންޓެޓިވް ލިސްޓުގައި ހިމެނުނީ 12 ފެބްރުއަރީ 2008 ގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
