ޑިންގީ ފެނިއްޖެ. ޒަކަރިއްޔާ އަދިވެސް ނުފެނޭ
ލިޔުންތެރިޔާ
އަބްދުﷲ ހުސައިން
ކުޑަ ޑިންގީއެއްގައި އެކަނި ދަތުރުކުރަމުން ދަނިކޮށް ގެއްލިގެން ހޯދަމުން އަންނަ ގދ.ގައްދޫ ކޯޒީރައުންޑް, ޒަކަރިއްޔާ މުޙައްމަދު ދުއްވި ޑިންގީ ފެނިއްޖެކަމަށް އެމްއެންޑިއެފްގެ ކޯސްޓްގާޑުން ހާމަކޮށްފިއެވެ.
އެމްއެންޑީއެފުން އެކްސްގައި ކުރި ޕޯސްޓެއްގައި ބުނެފައިވަނީ، ޒަކަރިއްޔާ މުޙައްމަދު ހޯދުމުގެ އޮޕަރޭޝަންގައި މިއަދު ހެނދުނު ކުރި ދެވަނަ ޑައިވްގައި އޭނާ ދުއްވި ޑިންގީ ފެނިފައިވާކަމަށެވެ. ޑިންގީ ފެނުނީ ގދ.ގައްދޫއާއި ގަމުގެ ދެމެދުން އޮންނަ ކަނޑުއޮޅީގެ 10 މީޓަރ އަޑިން ކަމަށްވެސް އެމްއެންޑީއެފުން ބުންޏެވެ. އެމްއެންޑީއެފުން ޑައިވްކޮށްފައިވަނީ ފުލުހުންނާ ގުޅިގެންނެވެ.
ވޮއިސްއަށް މައުލޫމާތު ލިބިފައިވާ ގޮތުގައި ޒަކަރިއްޔާ ގައްދޫން ފުރާފައިވަނީ ބްރާސްފަތިދުވަހުގެ ހެނދުނު 9:30 ހާއިރުއެވެ. އޭގެ ފަހުން އެންމެފަހުން ލިބުނީ އޭނާ 11:15 ގައި ގަމުން ފުރި ހަބަރެވެ. ނަމަވެސް އޭގެ ފަހުން ޒަކަރިއްޔާގެ ހަބަރެއް ނުވުމުން ހޯދުމުގެ މަސައްކަތް ފަށާފައިވަނީ އެދުވަހުގެ ހަވީރުއެވެ.
އެމްއެންޑީއެފުން ޒަކަރިއްޔާ ހޯދުމުގެ އޮޕަރޭޝަންގައި، ކަނޑުމަގުންނާއި ވައިގެމަގުން އެމްއެންޑީއެފް ސަދަން އޭރިއާ ކޮމާންޑް، ކޯސްޓްގާޑް ފޯތު ސްކޮޑްރަނުން ކުރިއަށްގެންދިޔަ މަސައްކަތުގައި އިއްޔެވެސް ވަނީ ބޮޑު ސަރަހައްދެއް ބަލާފައެވެ. މިހާތަނަށް ކުރި މަސައްކަތުން ޑިންގީ އަދި އޭގެ ނަގިލި ވަނީ ފެނިފައެވެ.
ޒަކަރިއްޔާ އެންމެ ފަހުން ފެނުނު އިރު ލައިގެން ހުރީ ނޫ ކުލައިގެ ޓީޝާޓަކާއި ކަޅު ސޯޓެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
