އާޓިފިޝަލް ބީޗްގައި ހަމަނުޖެހުން ހިންގި 3 ބިދޭސީން ޑީޕޯޓްކުރަނީ!
ލިޔުންތެރިޔާ
އަބްދުﷲ ހުސައިން
އާޓިފިޝަލް ބީޗް ސަރަހައްދުގައި ރޭ ހިންގި ހަމަނުޖެހުންތަކުގައި ފުލުހުންގެ ބެލުމުގެ ދަށަށް ގެންދިޔަ ބިދޭސީންތައް ޑީޕޯޓްކުރުމަށް މަސައްކަތް އިމިގްރޭޝަނުން ފަށައިފިއެވެ.
މިކަމާ ގުޅޭގޮތުން އިމިގްރޭޝަނުން ބުނީ އާޓިފިޝަލް ބީޗްގައި ރޭ ބިދޭސީންތަކެއްގެ މެދުގައި ކުރިއަށްދިޔަ މާރާމާރީގައި ފުލުހުންގެ ބެލުމުގެ ދަށަށް ގެންދެވުނު 3 މީހުން ޑީޕޯޓްކުރުމުގެ މަސައްކަތް ފަށާފައިވާކަމަށެވެ. އެމީހުން މިހާރު ތިބީ އިމިގްރޭޝަނުގެ ބެލުމުގެ ދަށުގައެވެ.
އިމިގްރޭޝަނުން ބުނީ އެމީހުން ޑީޕޯޓްކުރުމަށް ކުރަންޖެހޭ މަސައްކަތް ކުރިއަށްދާއިރު، އާންމު މަސްލަހަތަށް ނުރައްކާވާ ގޮތަށް، މިފަދަ އަމަލުތައް ހިންގާ ބިދޭސީންނަށް އިތުރު ފުރުސަތެއް ނުދޭނޭ ކަމަށެވެ.
އާޓިފިޝަލް ބީޗްގައި ރޭ ހިންގި މާރާމާރީގެ ރިޕޯޓް 20:30 ގައި ފުލުހުންނަށް ލިބިގެން ފުލުހުން ވަނީ އެ ސަރަހައްދަށްގޮސް އެކަމުގައި ޝާމިލްވި 3 މީހަކު ފުލުހުންގެ ބެލުމުގެ ދަށަށް ގެންގޮސްފައެވެ. އެ ތިން މީހުންވެސް ނިސްބަތްވަނީ އިންޑިއާއަށެވެ. އާޓިވިޝަލް ބީޗްގައި އެމީހުން މާރާމާރީ ހިންގިއިރު، އިއްޔެއަކީ ބަންދު ދުވަހެއްކަމުން އެ ސަރަހައްދަށް ހިތްއުފާކޮށްލުމަށްގޮސް ގިނަ އަދަދެއްގެ ކުދިންނާއި ކުދިންގެ ބެލެނިވެރިންވެސް ތިއްބެވެ.
ބިދޭސީން މީގެ ކުރިންވެސް ބަންދުދުވަސްދުވަހު އިރުއޮއްސޭގަޑީގައި އެ ސަރަހައްދަށް ޖަމާވެ މާރާމާރީ ހިންގަމުންގެންގޮސްފައިވާކަން ފާހަގަކޮށްލެވެއެވެ. މިގޮތުން މިދިޔަ ޑިސެމްބަރުމަހުގެ 6 ވަނަ ދުވަހު އާޓިފިޝަލް ބީޗްގައި މާރާމާރީގައި އިސްކޮށްހުރި އަމްރިތް ސިންގު ނަމަކަށް ކިޔާ މީހަކު ވަނީ އިމިގްރޭޝަނުން ޑީޕޯޓްކޮށްފައެވެ. އެދުވަހު ހިންގި މާރާމާރީގައި ކުޑަކުއްޖަކަށްވެސް ވަނީ އަނިޔާވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
