ފުލުހުން އެލް-ރާޑް" ބޭނުންކުރުމާއި ގުޅިގެން ހުށަހެޅި ކުއްލި މައްސަލަ މަޖިލީހުން ބަލައިނުގަތް
މި މަހުގެ 3 ވަނަ ދުވަހު އިދިކޮޅު އެމްޑީޕީން މާލޭގައި ބޭއްވި މުޒާހަރާގެ ތެރެއިން ފުލުހުން ބޭނުންކުރި ތޫނު އަޑު ފޮނުވާ ހަތިޔާރު ނުވަތަ އެލްރާޑް ބޭނުންކުރި މައްސަލައިގައި މަޖިލީހަށް ހުށަހެޅި ކުއްލި މައްސަލަ، މަޖިލީހުން ބޭރުކޮށްލައިފިއެވެ.
އެލްރާޑް ބޭނުންކުރި ކުއްލި މައްސަލަ މަޖިލީހަށް ހުށަހެޅުއްވީ އެމްޑީޕީގެ ގަލޮޅު ދެކުނު ދާއިރާގެ މެންބަރު މީކާއިލް ނަސީމްއެވެ. މެންބަރު މީކާއިލް ހުށަހެޅުއްވި އެ މައްސަލައިގައި ވަނީ ފުލުހުން އެލްރާޑް ބޭނުންކުރުމުގެ ސަބަބުން އެ ދުވަހުގެ މުޒާހަރާގައި ބައިވެރިވި ފަރާތްތަކަށާއި އެ ސަރަޙައްދުގައި ދިރިއުޅޭ ޢާންމުންނަށް ސިއްޚީ ގެއްލުންތަކެއް ލިބުނު ކަމަށް ފާހަގަކޮށްފައެވެ.
އެގޮތުން އެ މައްސަލަ މަޖިލީހަށް ހުށަހެޅުއްވުމާ މެދު ގޮތެއް ނިންމުމަށް މިއަދު ނެގި ވޯޓުގައި ބައިވެރިވެވަޑައިގެންނެވި 52 މެންބަރުންގެ ތެރެއިން 40 މެންބަރުން ވޯޓު ދެއްވީ އެ ބިލު ބަލައިގަތުމާއި ދެކޮޅަށެވެ. އެ ބިލު ބަލައިގަންނަން ވޯޓު ދެއްވީ 12 މެންބަރުންނެވެ.
އެ މައްސަލަ މަޖިލީހުން ބޭރުކުރި ނަމަވެސް، ފާހަގަކުރެވޭ ގޮތުގައި "އެލް-ރާޑް" އަކީ ރާއްޖޭގައި މީގެ ކުރިން މުޒާހަރާތައް ކޮންޓްރޯލްކުރަން ބޭނުންނުކުރާ ހަތިޔާރެކެވެ.
"އެލް-ރާޑް" ނުވަތަ ލޯންގް ރޭންޖް އެކޯސްޓިކް ޑިވައިސްއަކީ ތަންފީޒީ އިދާރާތަކުން ފޯރު ކޮށްދޭންޖެހޭ މުހިންމު މައުލޫމާތުތައް ދުރު ސަރަހައްދަކަށް ފޯރުކޮށްދިނުމަށްޓަކައި ބޭނުންކުރާ މުވާސަލާތީ ވަސީލަތެކެވެ. އެ ވަސީލަތަކީ ލައުޑްސްޕީކަރުން އަޑު ފޯރާ މިންވަރަށްވުރެ ދުރަށް އަޑު ފޯރާނެކަންޔަގީންކުރެވޭ ފަދަ، ބާރުގަދަ ވަސީލަތެކެވެ.
މި ޑިވައިސްގެ ބޭނުން ހިފައި، އެރޭ އެމްޑީޕީން ބޭއްވި މުޒާހަރާގައި ފުލުހުން ވަނީ ފުރަތަމަ ފަހަރަށް ރާއްޖޭގައި "ހައި ޕިޗް" އޯޑިއޯތަކެއް ބޭނުންކޮށްފައެވެ. އެ އަޑުތަކާއި ގުޅިގެން ވަރަށް ގިނަ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
އެގޮތުން އެ އަޑާއި ގުޅިގެން ރޭ ފުލުހުން ދިން އިންޒާރުތައް އަޑުނީވުމާއި އަދި ކަންފަތުގައި ރިއްސުން ފަދަ ކަންކަން ކުރިމަތިވިކަމަށް އެރޭގެ މުޒާހަރާގެ ބައިވެރިން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
