އިލެކްޝަން ކޮމިޝަނުން ރިޔާސީ އިންތިހާބުގެ ދާއިމީ ނަތީޖާ އިއުލާން ކޮށްފި

23 ސެޕްޓެންބަރ ގައި ބޭއްވުނު ރިޔާސީ އިންތިހާބް 2018 ގެ ދާއިމީ ނަތީޖާ އިއުލާން ކޮށްފިއެވެ.

ރަސްމީ ނަތީޖާއަށް ބަލާއިރު ވަގުތީ ނަތީޖާއާއި މާބޮޑު ތަފާތެއް ނެތެވެ. ރަސްމީ ނަތީޖާ އަށް ބަލާއިރު އިންތިހާބުގައި އިދިކޮޅު ކެންޑިޑޭޓެއްގެ ގޮތުގައި ވާދަކުރެއްވި އިބްރާހީމް މުހައްމަދު ސޯލިހު (އިބޫ) އަށް ލިބިވަޑައިގެންނެވީ 134،706 ވޯޓެވެ. އެއީ 58.4 އިންސައްތައެވެ. ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީނަށް ލިބިވަޑައިގެންނެވީ 96،501 ވޯޓެވެ. އެއީ 41.6 އިންސައްތައެވެ.

" މި އިންތިހާބުގެ ރަސްމީ ނަތީޖާގައިވާ ގޮތުން ދިވެހި ރައްޔިތުންގެ ޑިމޮކްރެޓިކް ޕާޓީގެ ފަރާތުން ރިޔާސީ އިންތިހާބަށް ކުރިމަތިލި ޅ. ހިންނަވަރު ނޫރާނީއާގެ އިބްރާހިމް މުހައްމަދު ސޯލިހު ދިވެހި ރާއްޖޭގެ ރައީސުލްޖުމްހޫރިއްޔާ ކަމުގެ މަގާމަށް ވަނީ އިންތިހާބުވެފަ " އިލެކްޝަންސް ކޮމިޝަނުން މިއަދު އިއުލާނުކުރިއެވެ.

އީސީން ވޯޓުގެ ރަސްމީ ނަތީޖާ އިއުލާންކޮށްފައި މިވަނީ އިދިކޮޅުން އެކަމާއި ގުޅިގެން ކަންބޮޑުވުން ފާޅުކޮށް ތަފާތު ވާހަކަތައް ދައްކަމުން ދަނިކޮށެވެ. އިންތިހާބުގެ ރަސްމީ ނަތީޖާ އިއުލާން ކުރަން ގާނޫނުގައި ބުނާ ފަހު ދުވަހަކީ މާދަމާއެވެ.