އިންޑިޔާގައި، ލިފްޓެއްގެ ތެރޭގައި ގޭސް އަޅާފައިހުރި ފުއްޕާހަންތަކެއް ގޮވައިފި

އިންޑިއާގެ މުމްބާއީގެ ގޯރެގާއޯންގައި ހުރި އިމާރާތެއްގެ ލިފްޓް ތެރޭގައި، ގޭސް އަޅާފައި ހުރި ގިނަ އަދަދެއްގެ ފުއްޕާހަންތަކެއް ގޮވައި ދެ މީހަކަށް ބޮޑެތި އަނިޔާތަކެއް ވެއްޖެއެވެ.

މިދިޔަ އަންގާރަ ދުވަހުގެ ހަވީރު ހިނގި މި ހާދިސާގެ ބިރުވެރި މަންޒަރުތައް އެ އިމާރާތުގެ ސީސީޓީވީ ކެމެރާތަކަށް ވަނީ އަރާފައެވެ.

ފުލުހުން މަޢުލޫމާތު ދޭ ގޮތުގައި، މި ހާދިސާގައި އަނިޔާވެފައިވަނީ ފިރިހެނަކަށާއި އަންހެނަކަށެވެ. މި ދެ މީހުންގެ ހަށިގަނޑުގެ އެކި ތަންތަން ފިހިފައިވާތީ، މިހާރު ދަނީ ހޮސްޕިޓަލުގައި ފަރުވާ ދެމުންނެވެ. މި ހާދިސާއާ ގުޅިގެން، ފުއްޕާހަންތައް ވިއްކި މީހާގެ މައްޗަށް އިހުމާލުގެ މައްސަލައެއް ހުށަހަޅައި، ފުލުހުން ވަނީ މައްސަލަ ތަޙުޤީޤު ކުރަން ފަށާފައެވެ.

ސީސީޓީވީ ފުޓޭޖުން ފެންނަ ގޮތުގައި، އެންމެ ފުރަތަމަ ލިފްޓަށް އަރަނީ ކުޑަ ދަބަހެއް ހިފައިގެން ހުރި އަންހެނެކެވެ. އޭނާގެ ފަހަތުން ބޮޑު ޕްލާސްޓިކް ކޮތަޅަކަށް އަޅާފައި ހުރި ގިނަ އަދަދެއްގެ ފުއްޕާހަންތަކެއް ހިފައިގެން ފިރިހެނަކު ލިފްޓަށް އަރައެވެ. ލިފްޓުގެ ދޮރު ލެއްޕެން އުޅެނިކޮށް، ތިންވަނަ މީހަކު ލިފްޓަށް އަރަން މަސައްކަތް ކުރި ވަގުތު، ކުއްލިއަކަށް އެ ފުއްޕާހަންތަކުގައި އަލިފާން ހިފައި މުޅި ލިފްޓު ތެރެ އަލިފާންގަނޑަކަށް ބަދަލުވެގެންދެއެވެ.

މި ގޮވުމާއެކު މުޅި ލިފްޓު ތެރެ ދުމާއި އަލިފާނުން ފުރިގެން ދިޔަ ނަމަވެސް، ލިފްޓުގައި ތިބި ތިން މީހުން ވަނީ ވަގުތުން ބޭރަށް ނިކުމެފައެވެ. ވީޑިއޯއިން ފެންނަ ގޮތުގައި ފުއްޕާހަންތައް ހިފައިގެން ހުރި ފިރިހެންމީހާ ލިފްޓުން ނިކުތް ގޮތަށް ބިންމައްޗަށް ވެއްޓެއެވެ.

މި ހާދިސާ ހިނގަން މެދުވެރިވި ސީދާ ސަބަބެއް ފުލުހުން އަދި ހާމައެއް ނުކުރެއެވެ. ނަމަވެސް، ފުއްޕާހަންތަކަށް އަޅާފައި ހުރި ގޭހުގެ ބާވަތުން މިފަދަ ނުރައްކާތެރި ހާދިސާތައް ހިނގުމަކީ އެކަށީގެންވާ ކަމެއް ކަމަށް ކަމާބެހޭ ފަރާތްތަކުން ފާހަގަކުރެއެވެ.