ހުރިހާ ދިވެހިން ތެލިސީމިއާއަށް ޓެސްޓްކުރުމަށް އަމާޒުކޮށް ޕަރޮގްރާމެއް ފަށައިފި

ހުރިހާ ދިވެހިން ތެލިސީމިއާ އަށް ޓެސްޓްކުރުމަށް އަމާޒުހިފާ، ތެލިސީމިއާއަށް ހޭލުންތެރި ކުރުވުމުގެ ވަރުގަދަ ޤައުމީ ކެންޕެއިނެއް މިއަދު ފަށައިފިއެވެ.

މިނިސްޓްރީ އޮފް ހެލްތުގައި އޮތް ރަސްމިއްޔާތެއްގައި މިކެންޕެއިން ފަށްޓަވައި ދެއްވީ ސިއްޙަތާއި ބެހޭ ވަޒީރު ޑރ. އަބްދުﷲ ހަލީލެވެ.

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޙަލީލު ވިދާޅުވީ މިއަދު މި ފެށުނު ކެންޕެއިނަކީ ރަނގަޅަށް ކުރިއަށް ގެންދެވިއްޖެ ނަމަ ވަރަށް ފައިދާހުރި ކެންޕެއިނަކަށް ވެގެންދާނެ ކަމަށެވެ.

ސިއްހަތާއި ބެހޭ ވަޒީރު ވިދާޅުވީ މި ސަރުކާރުން މަސައްކަތް މިފަށަނީ ކުރިއަށް އޮތް 10 އަހަރަށް އަމާޒުކޮށް ރާއްޖޭގައި ތެލިސީމީއާ އަށް އުފަންވާ ކުދިންގެ ރޭޓް 50 އިންސައްތައަށް ދަށްކުރުމުގެ ވަރުގަދަ އަޒުމާއިއެކުގައި ކަމަށެވެ.

މިއަދު މިފެށުނު ޕްރޮގްރާމުގެ ދަށުން ރާއްޖޭގެ ހުރިހާ މުއައްސަސާއެއްގައި މަސައްކަތް ކުރައްވާ އެންމެހައި ފަރާތްތަކަށް ތެލިސީމިއާ އާއި ގުޅޭ މައުލުމާތު ފުޅާ ދާއިރާއެއްގައި ދިނުމުގެ އިތުރުން ގްރޭޑް 10 ގައި ކިޔަވަމުން ގެންދާ ހުރިހާ ދަރިވަރުން ތެލިސީމިއާއަށް ޓެސްޓް ކުރެވިގެންދާނެއެވެ.

"ރާއްޖޭގައި މި ފެށޭ ކެމްޕެއިންގެ ތެރެއިން މާތްﷲ އިރާދަކުރެއްވިއްޔާ ރާއްޖޭގެ ހުރިހާ ފަރާތްތަކެއް ތެލެސީމިއާ އަށް ޓެސްޓު ކުރެވިގެން ދާނެ. ރާއްޖޭގައި ތެލެސީމިއާ ބައްޔަށް ބަލާއިރު، ރާއްޖޭގެ އާބާދީގެ 17 އިންސައްތަ އަކީ ތެލެސީމިއާ ބަލީގެ ބޭފުޅުން އަދި އޭގެ އަލާމާތްތައް ހުރި ބޭފުޅުން،"

ހަލީލް ވިދާޅުވި އެވެ.

މިއަދު މި ފެށުނު ޕްރޮގްރާމްގެ ދަށުން ކުރިއަށް އޮތް 4 މަސް ދުވަހުގެ ތެރޭގައި މާލޭ ކައިރި ސަރަހައްދުގެ ދަރިވަރުންނަށް ހޭލުންތެރިކަމުގެ ޕްރޮގްރާމުތައް ހިންގާ ނިންމަވާލެވޭނެ ކަމަށް ސިއްޙަތާއި ބެހޭ ވުޒާރާއިން މަޢުލޫމާތު ދެއްވައެވެ.

މިއަދުގެ ރަސްމިއްޔާތުގައި ވާހަކަ ދައްކަވަމުން ޑރ.ހަލިލު ވިދާޅުވީ މިވަގުތުވެސް ތެލިސީމިއާ ބަލީގެ 650 ކުދިން  އެބަތިބިކަމަށާއި އެކުދިންނަށް ފަރުވާ ދިނުމުގައި ދަތިތަކެއް ހުރިކަމަށް ޤަބޫލްކުރައްވާ ކަމަށެވެ.

މި ސަރުކާރުން ނިންމާފައި ވަނީ ދުނިޔޭގެ ފެންވަރުގެ، ޚިދުމަތްތަކާއިއެކު ފެންވަރު ރަނގަޅު ހޮސްޕިޓަލެއް ތެލިސީމިއާ އަށް ހާއްސަކޮށްގެން ހުޅުމާލޭގައި ޢިމާރާތްކުރުމަށެވެ.