ކޮބާ ތައްޔާރު! ސަލަފުގެ ރޯދަ ހަދިޔާ އިވެންޓް މިރޭ، 101 އިނާމު ދޭނެ
ލިޔުންތެރިޔާ
އަހުމަދު ހަމީދު އާދަމް
ޖަމްޢިއްޔަތުއްސަލަފުގެ ފަރާތުން ކުރިއަށް ގެންދާ "ސަލަފު ރޯދަ ހަދިޔާ" ހަރަކާތް މިރޭ ބޭއްވުމަށް ނިންމައިފި އެވެ.
މި ޙަރަކާތް ކުރީން ބާއްވަން އޮތީ ރޯދަ މަހުގެ ކުރީންނެވެ. ނަމަވެސް އެ ހަރަކާތް ބާއްވަން އޮތް ރޭ މޫސުން ގޯސްވެ ކުރިއަށް ގެންދެވޭ ގޮތް ނުވީ އެވެ.
ސަލަފުން ބުނީ އެ ހަރަކާތް މިރޭ ބޭއްވުމަށް މިހާރު ނިންމާފައިވާ ކަމަށެވެ. މި އިވެންޓް އޮންނާނީ މިރޭ 9:30 ގައި ހުޅުމާލޭ ސެންޓްރަލް ޕާކުގައެވެ. މި އިވެންޓް ގައި ގުރުއަތުން ހޮވޭ ފަރާތްތަކަށް 101 އިނާމު ދިނުމަށް ވަނީ ހަމަޖެހިފައެވެ.
މިރޭގެ އިވެންޓް ގައި ދެވޭ 101 އިނާމުގެ ތެރޭގައި އަގުހުރި ތަފާތު އެތައް އިނާމެއް ވެއެވެ. އެލިއާއިން ހަދިޔާކޮށްފައިވާ ސައިކަލަކާއި، އެސްޓީއޯ އިންހަދިޔާކޮށްފައިވާ ފުރިޖަކާއި އަވަނަކާއި ބްލެންޑަރއަކާއި، އެލްވަން ހާޑްވެއާ އިން ހަދިޔާކޮށްފައިވާ ދޮންނަ މެޝިނަކަށާއި، ޢުމުރާ ދަތުރަކާއި، އިސާހުއަޙްމަދުޑޮޓްކޮމް އިން ހަދިޔާކޮށްފައިވާ ލެޕްޓޮޕަކާއި، މެރިން އިކުއިޕްމަންޓްސް އިންހަދިޔާކޮށްފައިވާ 12 ހާސް ބީޓީޔޫގެ އެއާކޯން އަކާއި، ރެޑްވޭވުން ހަދިޔާކޮށްފައިވާސޯފާއަކާއި، ފަރުމާ ފަރުނީޗަރސް އިން ހަދިޔާކޮށްފައިވާ އެނދެއް ހިމެނެއެވެ.
މި ހަރަކާތަށް ހާޒިރުވާ މީހުންނަށް ދެވޭ 101 އިނާމުގެ އިތުރުން، އޮންލައިންކޮށް މި ހަރަކާތް ބަލާ މީހުންނަށް ހާއްސަ އިނާމުތަކެއް ދޭގޮތަށް ވަނީ ހަމަޖެހިފައެވެ. އެހެންކަމުން، ވީހާވެސް ގިނަ ބަޔަކު މި ޙަރަކާތުގައި ބައިވެރިވެ، ރޯދަމަހާގުޅޭ ދީނީ މަޢުލޫމާތުތައް މުއްސަނދިކޮށްލުމަކީ ޖަމްޢިއްޔަތުއްސަލަފުގެ އެދުމެއް ކަމަށް އެ ޖަމިއްޔާ އިން ބުންޏެވެ.
މި ހަރަކާތުގެ އިތުރުން، ޖަމްޢިއްޔަތުއްސަލަފުގެ ފަރާތުން ރަމަޟާންމަހަށް ދީނީ ތަފާތު އެކިޙަރަކާތްތައް ރާއްޖޭގެ އެކި ހިސާބުތަކުގައި އަންނަނީ ކުރިއަށް ގެންދަމުންނެވެ. އޭގެ ތެރޭގައި ރަމަޟާންމަހަށް ޚާއްސަ ދަރުސްތަކާއި، ވޯކްޝޮޕްތަކާއި، ޓީވީޕްރޮގްރާމްތައް ހިމެނެއެވެ. އަދި ރޯދަމަހުގެ ކޮންމެ ދުވަހެއްގައި ކުރިއަށް ގެންދާ މިސްކިތު ދަރުސް ޕްރޮގްރާމްތަކާއި، ހޮސްޕިޓަލްތަކުގައި ތިބޭ ބަލިމީހުންނަށާއި އެހީތެރިންނަށާއި ހޮސްޕިޓަލްތަކުގެ ސްޓާފުންނަށް ރޯދަ ވިއްލުމަށްދޭ ހަދިޔާ ދިނުމުގެ ހަރަކާތް ދަނީ ހިންގަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
