މެމްބަރުންގެ އިންޝުއަރަންސާމެދު ރައްޔިތުން ކުރަނީ ކުށްހީއެއް: ކޮމިޓީގެ މުގައްރިރު
ލިޔުންތެރިޔާ
އަބްދުﷲ ހުސައިން
ރައްޔިތުން މަޖިލީހުގެ މެމްބަރުންނަށް ލިބިދޭ ހެލްތު އިންޝުއަރަންސާމެދު ރައްޔިތުންނަށް ވިސްނިފައި އޮންނަގޮތް ރަނގަޅު ނޫންކަމަށް މަޖިލީހުގެ އާންމު ކޮމިތީގެ މުގައްރިރު ހުޅުދޫ ދާއިރާގެ މެންބަރު މުޙައްމަދު ޝާހިދު ވިދާޅުވެއްޖެއެވެ.
ކޮމިޓީގައި މިއަދު މެމްބަރުންގެ ހެލްތު އިންޝުއަރަންސާ ގުޅޭގޮތުން ވާހަކަދައްކަވަމުން މުގައްރިރު ވިދާޅުވީ، މެމްބަރުންގެ ހެލްތު އިންޝުއަރަންސާ ގުޅޭގޮތުން ރައްޔިތުން ކުރަނީ ކުށްހީއެއް ކަމަށެވެ. އެގޮތުން މެމްބަރުންނަށްވެސް ހެލްތު އިންޝުއަރަންސް ލިބެނީ ރައްޔިތު މީހާ އެކޭ އެއްބީދައިން އާސަންދައިގެ ތެރެއިންކަމަށް ވިދާޅުވިއެވެ.
އެގޮތުން ހެލްތު އިންޝުއަރަންސްގެ ހިދުމަތް ހޯއްދެވުމަށް މެމްބަރުންވެސް އުޅުއްވަނީ ވަރަށް ދަތިކޮށްކަން ކޮމިޓީގެ މުގައްރިރުގެ ވާހަކާގައި ވަނީ ފާހަގަކުރައްވާފައެވެ.
މެންބަރުންގެ އިންޝުއަރެންސޭ ބުނީމަ ޚާއްޞަގޮތެއްގަ މީ... އާންމު ރައްޔިތުންނަށް ހަމަ އެއްގޮތްވެސް ހަމަ އިންނަނީ ވަރަށް ހިތްކަށިގޮތަކަށް. އެއީ މީ... މެންބަރެކޭ ބުނީމަ ހަމަ ބޭނުން ކޮންމެ ތަނަކުން ބޭނުން ވަރަކަށް އެއްވެސް ކަހަލަ ލިމިޓެއް ނެތި ބޭސްކުރެވޭނެކަމަށް އާންމުންގެ، ރައްޔިތުންނަށް އެނގިފަ މި އިންނަނީ. އެހެންވެ އެއްވެސް ވަރަށް ގޯސް ޚަބަރުތަކެއް މީ ފެތުރިގެން މިދަނީ. އަޅުގަނޑުމެންނަށްވެސް އިންނަނީ ހަމަ ލިމިޓެއް އިނގޭތޯ. ވަރަށް، ވަރަށް ކުޑަކުޑަ އެއްޗެއް އޭގެ ފަހުން ހަމަ މީ އިންނަނީ. ޚާއްޞަކޮށް ބޭރުން ބޭސްފަރުވާ ކުރެވޭ ގޮނާ... ބުނުމަކީވެސް އެއީ މުޅިން ސީދާ ތެދު ޚަބަރެއް ނޫން
ކޮމިޓީގެ މުގައްރިރު ޝާހިދު
މަޖިލީހުގެ ކޮމިޓީގައި މިއަދު އިންޝުއަރަންސްގެ ވާހަކަ ދެކެވުނީ މިހާރު މެމްބަރުންނަށް އިންޝުއަރަންސްގެ ހިދުމަތްދޭ ކުންފުނިން މެމްބަރުން ހިތްޕުޅު ހަމަޖެހޭ ގޮތަށް އެ ހިދުމަތް ނުދެވޭތީކަމަށް ކޮމިޓީގައި ވާހަކަދެއްކެވި މެމްބަރުންގެ ވާހަކައިން ދޭހަވެއެވެ. އެގޮތުން ރާއްޖެއިން ބޭރުން ބޭސްފަރުވާ ކުރުމަށްފަހު ކުރަންޖެހޭ މުއާމަލާތްތަކުގެ އިތުރުން ޕެކޭޖް ކުޑަކަން ބައެއް މެމްބަރުން ފާހަގަކުރިއެވެ.
ހެލްތު އިންޝުއަރަންސް ހިދުމަތް ހޯދުމުގައި މެމްބަރުންނަށް ދަތިވާކަމަށް މެމްބަރުން ފާހަގަކުރިއިރު، އެންސްޕާ އަދި އާސަންދައިން މެމްބަރުންނަށް ހިދުމަތް ދިނުމަށް ހާއްސަ ގޮތްތަކެއް ބަހައްޓާކަމަށް ބައެއް ރައްޔިތުން ފާހަގަކުރެއެވެ.
މީގެ އިތުރުން ސަރުކާރު ހޮސްޕިޓަލުން އެނދު ހޯދުމަށް ދަތިވާފަހަރުތަކުގއި މެމްބަރުން މެދުވެރިކޮށް އެކަންކަން ފަސޭހަކަމާއެކު ހަމަޖެހުމާއި، އާސަންދައިގެ އެހީ ހޯދުމަށް މެމްބަރުންގެ ފަރާތުން އެދުމުން އެކަންކަން އަވަހަށް ނިމިގެންދާކަމަށްވެސް ފާހަގަކޮށްލެވެއެވެ. މިކަންކަން މިގޮތަށް ހުރުމުން މެމްބަރުންގެ ކިބައިން އެބާވަތުގެ ކަންކަމުގައި އެދުމަކީ ރާއްޖޭގައި އަށަގަނެފައި އޮތް ސަގާފަތެއްކަން ވަރަށް ގިނަ ފަރާތްތަކުން ފާހަގަކުރެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
