ރައްޔިތުންގެ މަޖިލިސްގެ މެމްބަރުންނާއި ކަޅުފައިސާ؟؟

ރާއްޖޭ ޕާލަމެންޓްގެ މާލޭގެ ދާއިރާއަކަށް ނިސްބަތްވާ ރައްޔިތުންގެ މަޖިލީހުގެ މެމްބަރަކަށް ކުރީގެ ބާރުގަދަ ނާއިބް ރައީސް އަހުމަދު އަދިބު ކަޅު ފައިސާއިން ރިލޯޑްކޮށްދީގެން އެވާހަކަދެކެވި، އެކަމާގުޅޭ އަދީބުގެ ފޯނުގެ ޗެޓްލޮގެއް ލީކުވެގެން އުޅުނެވެ. އޭގެ ދުވަސްތަކެއްފަހުން އަދީބު ނާއިބް ރައީސްކަމުން ވަކިކުރަން އެމެމްބަރުގެ ވޯޓް ހޯދަން ސަރުކާރަށް ނިސްބަތްވާ ފަރާތަކުން ދިއުމުން ލައްކައިން އަގު ކިޔެވެ.

ވޯޓާއިހަމައަށްދިޔައިރު ތިން ފަހަރުމަތިން އަގުބޮޑުކޮށް އެއްމިލިޔަން ރުފިޔާއަށް ވޯޓްވިއްކަން ނިންމައި ފައިސާލިބުމުން ބޮލީވުޑަށް ޒިޔާރަތްކޮށްލާފައި ޔޫރަޕަށްވެސް ދަތުރެއް އަޅާލިއެވެ. ދަތުރުކުރެއްވިތަން އެގެނީ ސޯޝަލް މީޑިއާގައި ޝެއަރކުރައްވާ ފޮޓޯތަކުންނެވެ.

ޓޫރިޒަމް މިނިސްޓަރުކަމުގައި އަދީބު ހުރިއިރު އޭނާގެ އެޕޮއިންޓްމަންޓް ހޯދަން މެމްބަރުން ދިއުމަކީ އާދައެކެވެ. މެމްބަރުންގެ ކަންކަން ދަންނަ އިސްބޭފުޅަކު ވިދާޅުވިގޮތުގައި ގިނަފަހަރަށް އެމެމްބަރުންނާ ބައްދަލުނުކޮށް 50 ހާހުން، އެއްލައްކަ ރުފިޔާއިން ފައިސާދީފައި ފޮނުވާލައެވެ. މެމްބަރުންދަނީ ކޮންމެހެން އަދީބު ދެކިލާހިތަކުން ނޫނެވެ. އަދީބަށްވެސް އެކަން އެގެއެވެ. ފައިސާގެ ބޮނޑިވަރުގެ ދަހިވެތި ކަމުގައެވެ.

މެމްބަރަކު ރައްޔިތުންގެ މަޖިލީހުގައި ވާހަކަދައްކަމުންގޮސް ފައިސާ ގޯނިހިފައިގެން ރިޝްވަތުދޭން މެމްބަރުންކައިރިއަށް ހިގާފައިވާ ކަމަށް އިއުތިރާފްވެފައިވެއެވެ. އެކަމަކު އެއީ ރައްޔިތުންގެ މަޖިލީހުގެ މެމްބަރެއްވީމާ ކުށެއް ނޫންތާއެވެ.

ފުލުހުން ޕެޕަރސްޕްރޭޖަހާތީ މާސްކުއަޅައިގެންވެސް ކުރިމަތިލާން މީހުން އެއްކުރުމަކީ ކުށެއްކަމަށް ދަށު ކޯޓުން ނިންމުމުން ރައްޔިތުންގެ މަޖިލީހުގެ މެމްބަރެއްގެ ކޮންމެވެސް އިމްތިޔާޒެކޭ ބުނެ މަތީ ކޯޓުން ދޫކޮށްލީއެވެ. އެހެންވީމާ ވައްކަން ކުރިޔަސް، ދޮގުހެދިޔަސް، ކޮރަޕްޝަންގެ އަމަލުތައް ހިންގިޔަސް ރައްޔިތުންގެ މަޖިލިސް ވީމާ އެއީ އިމްތިޔާޒު ލިބިގެންވާ ބައެކެވެ.

ޕީޕީއެމްގެ މެމްބަރެއް އެމްޑީޕީގެ މެމްބަރެއް ކިޔާނެކަމެއްނެތެވެ. ވޯޓަކާދިމާކޮށް ފައިސާ އަޅާލީމާ އެނިމުނީއެވެ. މަޖިލީހުގައި ހުރެގެން ކަރޮޕްޝަނޭ އެންމެ ބާރަށް ވިދާޅުވާ މެމްބަރުގެ ފަސްބައި ހާވާލީމާ ފެންނާނީ ކަޅުފައިސާއާއި އެފަދަ ވިޔާނުދާ އަމަލުތައް ފިޔަވައި ދެން ކޯއްޗެއްތޯއެވެ. މުހައްމާކަލޯއަށް ދިންވަރު މުހައްމާކަލޯއަށް އެގޭނެތާއެވެ.

ކޮންމެއަކަސް ދިވެހި ރާއްޖޭގައި އޮތް ކަރަޕްޝަނާއި ފަސާދައިގެ ހާއްޔަކީ ރައްޔިތުން މަޖިލިސްކަމުގައި ވާހަކަ ދެކެވެއެވެ. ދައުލަތުގެ ފައިސާއިން ވައްކަންކޮށްފިކަމަށް ރައްޔިތުންގެ މަޖިލީހުގެ ޖަލްސާތަކުގައި ތިބެގެން ވާހަކަފުޅު ދައްކަވާ ބައެއް މެމްބަރުން އެމީހުން އަމިއްލައަށް ހޯދާފައިވާ މުއްސަނދިކަމާއި ލިބުނު ރިސޯޓްތައް، ނަހަމަގޮތުން ހޯދި ޕްރޮޖެކްޓްތަކުން ލިބުނު ތަނަވަސްކަން ރައްޔިތކަށް އެނގިއްޖެނަމަ ހައިރާންވާނެއެވެ.

މިފަހަކަށް އައިސް ޕީޕީއެމްގެ ޕާލަމެންޓް މެމްބަރުންގެތެރޭގައި އުފެދުނު ހަމަނުޖެހުމަކީ، ޕާލަމެންޓް އިސްމެމްބަރަކު ވިދާޅުވިގޮތުގައި ސަރުކާރުގެ މެމްބަރުންގެ ގޮތުގައި ތިބެ ސަރުކާރުގެ ޕްރޮޖެކްޓްތައް އަމިއްލަ ނުފޫޒު ބޭނުންކޮށްގެން ހޯދައިގެން މިލިޔުނަރުންނަށްވުމުން، އަދީބު ހުރިއިރު ލިބުނުވަރަށް ނުލިބޭތީ ސަރުކާރަށް ދަތިކޮށް ޕްރެޝަރކުރަން ހިގައިދިޔަ ހަމަނުޖެހުންތަކެކެވެ.

ރައީސް އަބްދުﷲ ޔާމީން އެމީހުންދެކެ ކޯފާވީއެވެ. އަވަސްއަރުވާލައިގެން އެންޓި ޑިފެކްޝަންގެ ގާނޫނެއްހެދީ ޕާޓީއަށް ޣައްދާރުވި ކަމަށް ރައީސް ޔާމީން ދެކެވަޑައިގެންނެވި މެމްބަރުންނަށް އަމާޒުކޮށްގެން އެމީހުންނަށް ފިލާވަޅެއް ދެއްވުމަށެވެ.

އެންޓި ޑިފެކްޝަންގެ ގާނޫނަކީ މިދެންނެވި ހާލަތު އައުމުން ތައާރަފްކުރި ގާނޫނަކަށްވިޔަސް އެގާނޫނުން ހުއްޓުވައިދެނީ ރައްޔިތުންގެ މަޖިލީހުގެތެރޭގައި އަށަގެންފައިވާ ކޮރަޕްޝަނާއި ފަސާދައެވެ.

ރައީސް އަބްދުﷲ ޔާމީންގެ ސަރުކާރު ނިމޭތީ މިހާރު އެތިއްބެވީ ކަޅުފައިސާއަށް ޕާޓީ ބަދަލުކުރުމަށް ފޫގަޅައިގެންނެވެ. ދެރަކަމަކީ ކަރޮޕްޝަނާއި ފަސާދަ ނައްތާލަން އައި ސަރުކާރުން އެންމެ ފުރަތަމަ ކުރިކަމަކަށް ކަޅުފައިސާއަށް މެމްބަރުން ގަތުމުގެ ރޭހެއް މަޖިލިސްތެރޭގައި ފަށަން ފުރުސަތު ތަނަވަސްކޮށްދިނުމެވެ.

ކުރިއަށް އޮތްތާގައި އެންމެ ގިނަ މެމްބަރުން ގުޅޭނެކަމަށް ފެންނަނީ ﷲ އަށްޓަކައި ހުސްއަތާ ރައްޔިތުންނަށް އޮތް އިންތިހާއީ ލޯތްބެއްގެ ބޮޑުކަމުން އެމްޑީޕީއަށާއި ޖުމްހޫރީ ޕާޓީއަށެވެ. އިހަށް ދުވަހު ޕީޕީއެމްގެ އަޑުގަދަ މެމްބަރަކު މަޖީދީމަގުގައި ހުރި އޭނާގެ ފިހާރައިގައި އިންތިޚާބީ ރައީސްއާއި ކުރީގެ ރައީސް މުހައްމަދު ނަޝީދުގެ ބޮޑު ޕޯސްޓަރެއް ތަތްކުރިއެވެ. މިހާރު ނަގައިފިއެވެ. އޭނާއަށްވެސް ރިސޯޓް ހަދާނެ ރަށެއް މިނިމުނު ފަސްއަހަރުތެރޭ ލިބުނެވެ. އެހެންވީމާ ކޮންމެވެސް ގޮތެއް ހަދަން އެބަޖެހޭ ނޫންތޯއެވެ.

މެޖޯރިޓީ ލިބުނީމާ އެންޓި ޑިފެކްޝަންގެ ގާނޫނެއް މުހިއްމުވާނެ

އެންޓި ޑިފެކްޝަންގެ ގާނޫން އުވާލަންވެގެން ހަރުއަޑުން ވާހަކަދެއްކެވި ގިނަ މެމްބަރުން ވިދާޅުވީ އެގާނޫން ގާނޫން އަސާސީ އާއި ފުށުއަރާ ކަމަށެވެ. ކަޅުފައިސާގައި ހިފަން ގާނޫން އަސާސީގައި އޮވޭތޯއެވެ. އެކަމަކު ހިފަންވީމާ ކަޅުފައިސާ ހުދު ކާފޫރަށްވުރެވެސް ހުދެވެ. މިހާރު އެންމެ ބޮޑަށް އިވެނީ ޖަލަށްލާފައިވާ އަދީބުދެކެ ހަމްދަރުދީވެގެން މެމްބަރުން ވާހަކަދައްކާ އަޑެވެ. ރިލޯޑްކޮށްދިންކަމަށް ބުނާ މެމްބަރުވެސް އެހަމްދަރުދީ ފާޅުކޮށްފިއެވެ. ކޮންމެއަކަސް ކަރޮޕްޝަނާއި ފަސާދައިގެ އިނގިލި އެންމެ ބޮޑަށް ދިއްކުރެވެން އޮތް ތަނަކީ ރައްޔިތުންގެ މަޖިލީހެވެ. އެމަޖިލީހަށް ނިސްބަތްވާ ބައެއް މެމްބަރުންނެވެ. ހައްޔަރުކުރަންވީ މަޖިލިސްގައި ތިބި ރައްޔިތުންގެ ފައިސާޖެހި ކޮރޮޕްޓްވެފައިވާ މެމްބަރުންނެވެ.

ކޮންމެއަކަސް އެންޓި ޑިފެކްޝަންގެ ގާނޫނެއް އޮންނަންޖެހޭކަމަށް އަންނަންއުޅޭ ސަރުކާރުގެ މެމްބަރުންވެސް ގަބޫލުކުރައްވައެވެ. ފަހަރުގައި ކުރިއަށް އޮތް ރައްޔިތުންގެ މަޖިލިސްގެ އިންތިޚާބު ނިމި މެމްބަރުންނަށް ލާރިދީގެން އެމެމްބަރުން ގެންގޮސް މެޖޯރިޓީ ހޯދަންބޭނުންވާ ޕާޓީއަކަށް މެޖޯރިޓީ ލިބިއްޖެނަމަ އަލުން އެންޓި ޑިފެކްޝަންގެ ގާނޫނެއް ހަދަން ސަރުކާރުން މަސައްކަތްކޮށްފާނެއެވެ.