ހުއްދަ ނެތް ތަންތާ ބާއްވާ އެއްވުންތައް ރޫޅާލާ ގާނޫނީ ފިޔަވަޅު އަޅާނެ ކަމުގެ އިންޒާރު ފުލުހުން ދީފި
ލިޔުންތެރިޔާ
އަހުމަދު ހަމީދު އާދަމް
ހުއްދަ ނެތް ތަންތާ ބާއްވާ އެއްވުންތައް ރޫޅާލާ ގާނޫނީ ފިޔަވަޅު އަޅާނެ ކަމުގެ އިންޒާރު ފުލުހުން ދީފި އެވެ.
ފުލުހުން ވަނީ ބަޔާނެއް ނެރެ އެކަން ހާމަކޮށްފަ އެވެ. ފުލުހުން އެކަން ހާމަކުރީ ހުއްދަ ހޯދުމަކާ ނުލައި އެއްވެވޭނެ ތަންތަން އިތުރުކޮށް ގަވާއިދު އަލުން ގެޒެޓްކުރުމާއި ގުޅިގެންނެވެ.
އެ ބަޔާނުގައި ބުނެފައި ވަނީ ހުއްދަ ހޯދުމަކާ ނުލައި ސުލްހަވެރިކަމާއެކު އެއްވެއުޅުން ހުއްދަ ސަރަހައްދުތައް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ކަނޑައަޅާ އާންމުކޮށްފައިވާ ކަމަށެވެ.
އެހެން ކަމުން އާންމު ރައްޔިތުންގެ އަސާސީ އެހެނިހެން ހައްގުތަކަށް އުނިކަން އަންނަ ގޮތަށް ބާއްވާ އެއްވުންތަކަށް ފުރުސަތު ނުދޭނެ ކަމަށް ފުލުހުން ވަނީ ބުނެފަ އެވެ.
އަދި ބުނީ ގާނޫނާއި ހިލާފަށް ބާއްވާ އެއްވުންތައް ރޫޅާލުމުގައި ގާނޫނީ ބާރުގެ ބޭނުންކޮށް އެއްވުން އިންތިޒާމުކުރާ ފަރާތްތަކާމެދު ގާާނޫނީ ފިޔަވަޅު އަޅައި އާންމު މަސްލަހަތު ރައްކާތެރިކުރުމަށް އަޅަންޖެހޭ ފިޔަވަޅުތައް އަޅާނެ ކަމަށެވެ.
މީގެ އިތުރުން ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާއި އެއްގޮތްވާ ގޮތުގެ މަތީން ސުލްހަވެރި އެއްވުންތަކަށް ބޭނުންވާ ސަލާމަތާއި ރައްކާތެރިކަން ފޯރުކޮށްދޭނެ ކަމަށާ އެފަދަ އެއްވުންތައް ބާއްވާ ސަރަޙައްދުތަކުގެ މަގުތަކާއި އެއްވުން ނުވަތަ ހިނގާލުން ކުރިއަށް ގެންދިއުމަށް ބޭނުންވާނެ ސަލާމަތީ ކަންކަން ބެލެހެއްޓުމުގެ އިންތިޒާމު ފުލުހުން ހަމަޖައްސައިދޭނެ ކަމުގެ ޔަގީންކަން ވެސް ވަނީ ދީފަ އެވެ.
ހުއްދަ ހޯދުމަކާ ނުލައި އެއްވެވޭނެ ތަންތަން އިތުރުކުރުން
މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އިން މިއަދު ގެޒެޓް ކުރި ގަވާއިދުގައި ބުނެފައި ވަނީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނުގެ 24 ވަނަ މާއްދާގެ (ޅ) ގެ ދަށުން މިހާރު ކަނޑައަޅާފައިވަނީ އެންމެ ސަރަހައްދެއް ކަމުގައިވާތީ އެ ނިންމުމަށް ބަދަލު ގެނެސްފައިވާ ކަމަށެވެ.
އެގޮތުން މާލޭގައި ސުލްހަވެރިކަމާއެކު އެއްވެއުޅުމުގެ ފުރުސަތު އިތުރަށް ފަހިކުރުމުގެ ގޮތުން، ދިވެހި ފުލުހުންގެ ހިދުމަތުން ލިޔުމުން ދޭ ހުއްދައަކާއެކު ފިޔަވައި، ދިވެހިރާއްޖޭގެ ވެރިކަންކުރާ ރަށް ކަމުގައިވާ މާލޭގައި އެއްވެސް ބާވަތެއްގެ އެއްވުމެއް ނުވަތަ ހިނގާލުމެއް ނުވަތަ އުޅަނދުބުރެއް ބޭއްވޭނެ ސަރަހައްދުތަކުގެ ގޮތުގައި އިތުރު ތަންތަން ކަނޑައަޅާ އިއުލާނު ކުރާ ކަމަށެވެ.
އެގޮތުން މިހާރު ކަނޑައަޅާފައިވަނީ ހަތަރު ސަރަހައްދެކެވެ.
* ހެންވޭރު ކާނިވާ ސަރަހައްދު
* ރަސްފަންނު ސަރަހައްދު
* މާލޭ ހުޅަނގު ދެކުނު ހިއްކި ސަރަހައްދު (އިންޑަސްޓްރިއަލް ޒޯނުގެ ގޮތުގައި ކަނޑައެޅި)
* އުސްފަސްގަނޑު ސަރަހައްދު
ހުއްދަ ހޯދުމަކާ ނުލައި އެއްވެވޭނެ ތަންތަން ކަނޑައެޅީ ކުރީގެ ރައީސް ޔާމީންގެ ސަރުކާރުގަ އެވެ. އެ ގާާނޫނަށް ބަދަލު ގެންނަން ކުރީގެ ރައީސް ސޯލިހްގެ ސަރުކާރުން ވެސް ދެކޮޅު ހެދި އެވެ.
ބޭނުންވަގުތަކު ބޭނުން ތަނަކު މުޒާހަރާ ކުރުން ހުއްދަ ކުރަން އަބަދުވެސް ވަކާލާތު ކުރަނީ އެބަޔަކު އިދިކޮޅުގައި ތިބޭ ވަގުތު އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
