މޮރޯކޯ ކައިރިން ބްރެޒިލްއަށް ފުއްދާލަން ޖެހުނީ އެންމެ ޕޮއިންޓަކުން

ވަރލްޑްކަޕް ފުޓްބޯޅަ މުބާރާތުގައި ވަރުގަދަ ބްރެޒިލް އާއި މޮރޯކޯ ބައްދަލުކުރިމެޗް އެއްވަރުވެގެން ނިމިއްޖެއެވެ.

އެމެރިކާގެ ނިއު ޖާޒީގައި ކުޅުނު މިމެޗް ނިމުނީ 1-1 ގެ ނަތީޖާއިންނެވެ. ކުރިން ހީކުރި ގޮތާ ހިލާފަށް މެޗްގައި ލީޑް ނެގީ މޮރޯކޯއިންނެވެ. އެއީ ފުރަތަމަ ހާފްގެ 21 ވަނަ މިނެޓް ތެރޭގައި ޑިއާޒް ތަނަވަސްކޮށްދިން ފުރުސަތެއްގައި ސައިބާރީއެވެ.

މިއީ ވަރލްޑްކަޕް ތާރީހުގައިވެސް ދެކުނު އެމެރިކާގެޓީމަކާ ދެކޮޅަށް ކުޅެ މޮރޯކޯއިން ގޯލެއް ޖެހި ފުރަތަމަ ފަހަރެވެ. މީގެ ކުރިން 1970 ވަނަ އަހަރު ޕެރޫއާ ދެކޮޅަށް އަދި 1998 ވަނަ އަހަރު ބްރެޒިލާ ދެކޮޅަށް ކުޅުނު މެޗުތަކުގައި މޮރޮކޯއަށް ލަނޑެއް ކާމިޔާބު ކުރެވިފައެއް ނުވެއެވެ.

މެޗްގައި މޮރޯކޯގެ ފަރާތުން މޮޅުކުލުމެއް ފެނިގެންދިޔައިރު، އެޓީމްގެ ތަރި ހަކީމީ ވަނީ ބްރެޒިލްގެ ޑިފެންސް ލައިނަށް ބާރުބޮޑުކޮށް ޕްރެޝަރަށް ވައްޓާލާފައެވެ. އެގޮތުން މެޗުގެ ކުރީކޮޅު މޮރޮކޯއިން ވަރަށް ބޮޑަށް ޑޮމިނޭޓް ކުރިއިރު، ފުރަތަމަ 30 މިނެޓުގެ ތެރޭގައި އެޓީމުން ވަނީ ބްރެޒިލްގެ ގޯލަށް 12 ހަމަލާ އަމާޒުކޮށްފައެވެ. މިއީ 2018 ވަނަ އަހަރު މެކްސިކޯއާ ދެކޮޅަށް ކުޅުނު މެޗަށް ފަހު، ވޯލްޑް ކަޕްގެ މެޗެއްގައި ބްރެޒިލާ ދެކޮޅަށް މިހާ ގިނަ ހަމަލާ އުފެއްދި ފުރަތަމަ ފަހަރެވެ.

މޮރޯކޯއިން ލަނޑެއް ޖެހިތާ މާ ގިނައިރެއް ނުވެ، ބްރެޒިލުން ވަނީ މެޗް އެއްވަރުކޮށްފައެވެ. މި ލަނޑު ޖަހައިދިނީ، ވިނީޝިއަސް ޖޫނިއާ އެވެ. މި ލަނޑުގެ އިތުރުންވެސް ފުރަތަމަ ހާފުގެ އިތުރު ވަގުތުގައި ވެސް ބްރެޒިލަށް ލީޑު ނެގުމަށް ރަނގަޅު ފުރުސަތެއް ލިބުނެވެ. ލޫކަސް ޕަކޭޓާ ފޮނުވާލި ހިތްގައިމު ހަމަލާ މޮރޮކޯގެ ކީޕަރު ވަނީ ވަރަށް ހުށިޔާރުކަމާއެކު ދިފާއުކޮށް ވަނީ ކޯނަރަކަށް ބޭރުކޮށްލާފައެވެ.

ބްރެޒިލް މޮރޯކޯއާ ދެކޮޅަށް މި މެޗް ކުލެމުން ދިޔައިރު، ބްރެޒިލަށް 2002 ވަނަ އަހަރުގެ ވޯލްޑް ކަޕް ކާމިޔާބުކޮށްދިން ރޮނާލްޑޯ، ކަކާ އަދި ރޮބާޓޯ ކާލޮސް ފަދަ މަޝްހޫރު ލެޖެންޑުން ސްޓޭޑިއަމްގައި ކުޅިބަލަން ތިބިކަން ފާަހަގަކޮށްލެވެއެވެ.