އެމްޑީޕީ މުޒާހަރާގައި ހިންގާފައިވަނީ އަނިޔާވެރި އަމަލުތަކެއް: ޕީއެންސީ
މާލޭގައި އެމްޑީޕީން ބޭއްވި މުޒާހަރާގައި ހިންގާފައިވަނީ އަނިޔާވެރި ޢަމަލުތަކެއް ކަމަށާއި، އެކަން ޕީޕަލްސް ނޭޝަނަލް ކޮންގްރެސް (ޕީއެންސީ) އިން ހަރުކަށި އިބާރާތުން ކުށްވެރިކުރާކަމަށް އެޕާޓީން ބުނެފިއެވެ.
ޕީއެންސީން ރޭ ނެރުނު ބަޔާނެއްގައި ބުނީ މުޒާހަރާގެ ބައިވެރިން ހިންގި ޢަމަލުތަކަކީ ޤާނޫނާ ޚިލާފު އަނިޔާވެރި ޢަމަލުތަކެއް ކަމަށެވެ.
ޕީއެންސީން ފާހަގަކުރި ގޮތުގައި އެމްޑީޕީން ވަނީ އެއްބަސްވެފައިވާ މުޒާހަރާގެ ރޫޓުން ބޭރުވެފައެވެ. އަދި މުޒާހަރާގެ ބައިވެރިން ވަނީ މަނާ ސަރަހައްދުތަކަށް ވަދެ، ފުލުހުންގެ ބެރިކޭޑްތައް ފަޅާލައި، ފުލުހުންނާއި ދިމާލަށް ފުޅިއާއި ގާތައް އުކައި، ފުލުހުންގެ ޝީލްޑްތައް އަތުލަން މަސައްކަތްކޮށްފައެވެ.
މިއީ ގަސްތުގައި ރާވައިގެން ހިންގި އަނިޔާވެރި ޢަމަލުތަކެއް ކަމަށާއި، ޤައުމުގެ ހަމަޖެހުމަށް ލޮޅުން އެރުވުމަށް ކުރި މަސައްކަތެއް ކަމަށް އެ ޕާޓީން ބުންޏެވެ.
މީގެއިތުރުން، އެމްޑީޕީން އެހެން ރަށްރަށުން މުޒާހަރާއަށް މީހުން ގެނެސް، އެ މީހުންނަށް ކާންބޯން އަދި ތިބޭނެ ތަނެއް ނުދީ ދޫކޮށްލާފައިވާ ކަމަށް ޕީއެންސީން ވަނީ ތުހުމަތުކޮށްފައެވެ. މިކަމުގެ ސަބަބުން ގިނަ ބަޔަކު މާލޭގައި ހާލުގައި ޖެހުނު ކަމަށާއި، މިއީ އެމްޑީޕީން ތަމްސީލުކުރަން ބުނާ ރައްޔިތުންގެ ދޭތެރޭ އެއްވެސް ވިސްނުމެއް ނެތި ކުރި ކަމެއް ކަމަށް ޕީއެންސީން ބުންޏެވެ.
އަދި ސުލްހަވެރިކަމާއެކު އެއްވެއުޅުމުގެ ޙައްޤަކީ ޤާނޫނު އަސާސީން ލިބިދޭ ޙައްޤެއް ނަމަވެސް، އެ ޙައްޤުގެ ބޭނުން އަނިޔާވެރި ގޮތުގައި ހިފައި، ފުލުހުންނަށް ހަމަލާދިނުމަކީ ހުއްދަ ކަމެއް ނޫން ކަމަށް ވެސް އެ ބަޔާނުގައި ޕީއެންސީން ބުންޏެވެ.
މުޒާހަރާ ކޮންޓްރޯލް ކުރުމުގައި ފުލުހުން ދެއްކި ޕްރޮފެޝަނަލްކަމާއި ކެތްތެރިކަން ޕީއެންސީން ފާހަގަކޮށް، ފުލުހުންގެ ޢަމަލުތައް ހުރީ ޤާނޫނީ އިމުގެ ތެރޭގައި ކަމަށް ބުންޏެވެ. އަދި މި ހާދިސާގައި އަނިޔާވެރި ޢަމަލުތައް ހިންގި ފަރާތްތަކާމެދު ހަރުކަށި ޤާނޫނީ ފިޔަވަޅު އެޅުމަށް ކަމާބެހޭ ފަރާތްތަކަށް ގޮވާލައި، އެ ޕާޓީން ދެމިހުންނާނީ ޤާނޫނީ ވެރިކަމާއި ޑިމޮކްރަސީގެ އަސްލުތައް ދެމެހެއްޓުމުގެ މަގުގައި ކަމަށް އެ ޕާޓީން ބުންޏެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
