ވޯޓުލާ ދުވަސް ހޫނުގަދަ ދުވަހަކަށް؛ މާލެއަށް އިހްސާސް ކުރެވޭ ހޫނުމިން 44 ޑިގްރީ ސެލްސިއަސްގައި
ލިޔުންތެރިޔާ
ޚަދީޖާ އަރުފާ
ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް މިއަދު ވޯޓުލަމުން އަންނައިރު، މާލެ ސަރަހައްދަށް އިހުސާސްކުރެވޭ ހޫނުމިން ހުރީ 44 ޑިގުރީގައި ކަމަށް މޫސުމާ ބެހޭ ގައުމީ އިދާރާ (މެޓު) އޮފީހުން މިއަދު ބުނެފިއެވެ.
މަޖިލީހުގެ ވޯޓުލުން މިއަދު 8:00 އިން ފެށިގެން ކުރިއަށްދާއިރު، ރާއްޖޭގެ ގިނަ ރަށްތަކަށް މިއަދު މެންދުރު ފަހާ ޖެހެންދެން ވަރަށް ހޫނު ގަދަވާނެ ކަމަށް މެޓް އޮފީހުން ލަފާކުރެއެވެ.
މެޓް އޮފީހުން ލަފާކޮށްފައިވާ ގޮތުން މިއަދު އެންމެ ހޫނުގަދަވާނީ މާލެ ސަރައްހައްދަށެވެ. އެގޮތުން، 11:00ގައި ހުޅުލެއަށް ހޫނުމިން ހުރީ 32.7 ޑިގުރީގައި ކަމަށާ ހޫނުމިން އެވަރަށް ހުރި ނަމަވެސް މާލެ ސަރަހައްދަށް އިހުސާސްކުރެވޭ ހޫނުމިން ހުރީ 44.2 ޑިގުރީގައި ކަމަށް އެ އޮފީހުން ބުންޏެވެ.
އަދި، އުތުރުގެ ރަށްތަކަށް އިހުސާސްކުރެވޭ ހޫނުމިން 43.7 ޑިގްރީގައި ހުރިއިރު ދެކުނުގެ އެ ރަށްތަކުގެ ހޫނުމިން ހުރީ 42.8 ޑިގުރީގައި ކަމަށް ބުނެފައިވެއެވެ.
މިއަދުގެ މެންދުރު ފަހުން ހޫނު މަޑުވާން ފަށާނެ ކަމަށް މެޓް އޮފީހުން ލަފާކޮށްފައިވާއިރު މަޖިލީހުގެ ވޯޓުލުން ހަވީރު 5:30 އާ ހަމައަށް ކުރިއަށް ދާނެ ކަމަށް އީސީން ބުނެފައިވެއެވެ.
މިއަދަކީ ރާއްޖެއަށް ހޫނު ގަދަ ދުވަހެއް ނަމަވެސް، މެންދުރު 13:00 އާ ހަމައަށް އެއް ލައްކަ މީހުން ވޯޓުލާފައިވާ ކަމަށް އީސީގެ ތަފާސް ހިސާބުތަކުން ދައްކައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
