އޭޕްރީލް މަހު ޢާއިލާއާ ބެހޭ ވުޒާރާގެ ހެލްޕްލައިނަށް ހުށަހެޅި މައްސަލަތައް 2000 އިން މަތީގައި!
ލިޔުންތެރިޔާ
ޚަދީޖާ އަރުފާ
މި އަހަރުގެ އޭޕްރީލް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ހެލްޕްލައިނަށް ޖުމްލަ 2150 މައްސަލަ ހުށަހަޅާފައިވާ ކަމަށް އެ ވުޒާރާއިން ބުނެފިއެވެ.
މީގެ ތެރޭގައި ހިމެނެނީ ޗައިލްޑް ހެލްޕްލައިން 1412 އަށް ހުށަހެޅުނު 1778 މައްސަލައާއި، ސޯޝަލް ސަރވިސް ހެލްޕްލައިން 1421 އަށް ހުށަހެޅުނު 280 މައްސަލައެވެ.
އިޖުތިމާޢީ ތަރައްޤީއާބެހޭ ވުޒާރާގެ ތަފާސް ހިސާބުތައް ދައްކާގޮތުން، ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 98 މައްސަލަ ވަނީ ހުށަހެޅިފައެވެ. މީގެ ތެރެއިން އެންމެ ގިނައީ އިހުމާލުވުމުގެ މައްސަލައެވެ. އެފަދަ 32 މައްސަލަ ވަނީ ހުށަހެޅިފައެވެ. ދެން ހުށަހެޅިފައިވަނީ ޖިންސީ ހާނިކައިގެ 21 މައްސަލައާއި ޖިސްމާނީ ހާނިކައިގެ 18 މައްސަލައެވެ.
އާއިލީ މައްސަލަތަކުގެ ގޮތުގައި 32 މައްސަލަ ހުށަހެޅިފައިވާއިރު، މީގެ ތެރެއިން އެންމެ ގިނައީ ކުދިން ބެލުމުގައި ޖެހޭ 13 މައްސަލައެވެ. ކުދިންގެ އަޚްލާޤީ މައްސަލަތަކުގެ ގޮތުގައި 21 މައްސަލަ ހުށަހެޅިފައިވެއެވެ.
މީގެ އިތުރުން، އަމިއްލަ ނަފްސަށް ގެއްލުން ދިނުމާއި އަމިއްލައަށް މަރުވާން އުޅުމާ ގުޅޭ 35 މައްސަލައާއި، އަންހެނުންނާއި ފިރިހެނުންނަށް ކުރާ އަނިޔާގެ 44 މައްސަލަ ވެސް ހުށަހެޅިފައިވާ ކަމަށް ތަފާސް ހިސާބުތަކުން ދައްކައެވެ.
މިދިޔަ އޭޕްރީލް މަހު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ކުޑަކުދިންގެ އަޚްލާގީ މައްސަލަތަކާ ގުޅޭ 21 މައްސަލައެއް ހުށަހެޅިފައިވާއިރު، މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ގެއިން ނިކުމެގެން ދިއުމުގެ މައްސަލައެވެ. އެގޮތުން މި ބާވަތުގެ 7 މައްސަލައެއްވަނީ ރިޕޯޓުކޮށްފައެވެ.
ހަމައެހެންމެ، ސްކޫލަށްދާން ބޭނުން ނުވުމުގެ 05 މައްސަލައެއް ވެސް އެޕްރީލް މަހު ހުށަހަޅާފައިވެއެވެ. އަދި މިނޫންވެސް އެހެން ބާވަތުގެ 09 މައްސަލަ ރިޕޯޓްކުރެވިފައިވެއެވެ.
ކުދިންގެ އަޚްލާގީ މައްސަލަތަކާއި ގުޅިގެން އެޕްރީލް މަހު އެ ވުޒާރާއަށް އެންމެ ގިނައިން ހުށަހެޅިފައިވަނީ ފިރިހެން ކުދިންގެ މައްސަލައެވެ. އެގޮތުން ހިމެނެނީ، ފިރިހެންކުދިންގެ 16 މައްސަލައަކާއި އަންހެން ކުދިންގެ 6 މައްސަލައެކެވެ.
އޭޕްރީލް މަހު ދައުލަތުގެ ބެލުމުގެ ދަށަށް 4 ކުދިން ނެގިފައިވާއިރު، މި އަހަރުގެ އޭޕްރީލް މަހާ ހަމައަށް ދައުލަތުގެ ބެލުމުގެ ދަށުގައި ތިބީ ޖުމްލަ 146 ކުދިންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
