އެމެރިކާގެ އެމްބަސީއެއް ހުޅުވުމަށް މަޝްވަރާކުރަން އެމެރިކާގެ ސްޓޭޓް ޑިޕާޓްމެންޓްގެ ސެކްރެޓަރީ ރާއްޖެއަށް
ރާއްޖޭގައި އެމެރިކާގެ ދާއިމީ އެމްބަސީއެއް ހުޅުވުމާއި ބެހޭގޮތުން މަޝްވަރާކުރުމަށް އެމެރިކާގެ ސްޓޭޓް ޑިޕާޓްމެންޓްގެ ސައުތު އެންޑް ސެންޓްރަލް އޭޝިއަން އެފެއާސްގެ އެސިސްޓެންޓް ސެކްރެޓަރީ ޑޮނަލްޑް ލޫ ރާއްޖެ ވަޑައިގަތުމަށް ހަމަޖެހިއްޖެއެވެ.
އެމެރިކާގެ ސްޓޭޓް ޑިޕާޓްމެންޓް އިން ނެރުނު ނޫސް ބަޔާނެއްގައި ބުނީ މިމަހުގެ 26 އިން 31 ޑޮނަލްޑް ލޫ އިންޑިއާ އާއި ރާއްޖެއަށް ދަތުރު ކުރެއްވުމަށް ހަމަޖެހިފައިވާ ކަމަށެވެ.
ޑޮނަލްޑް ލޫ ގެ މިދަތުރުފުޅުގައި ރާއްޖެ ވަޑައިގެން، އެބޭފުޅާ އާއި އެ ބޭފުޅާގެ އަރިހުގައި ވަޑައިގަންނަވާ އެމެރިކާގެ ވަފުދު ރާއްޖޭގެ އޮފިޝަލުންނާ ބައްދަލުކުރުމަށް ވަނީ ހަމަޖެހިފައެވެ. މި ބައްދަލުވުންތަކުގައި، ދެ ގައުމުން ގުޅިގެން ކުރާ މަސައްކަތްތައް އިތުރުކުރުމާ ގުޅޭ ގޮތުން މަޝްވަރާކޮށް، ރާއްޖޭގައި އެމެރިކާގެ ދާއިމީ އެމްބަސީއެއް އެޅުން އަވަސްކުރުމާއި ބެހޭގޮތުން ވާހަކަ ދެއްކުމަށް ވަނީ ހަމަޖެހިފައެވެ.
މީގެ އިތުރުންވެސް ރާއްޖޭގެ މަދަނީ ޖަމިއްޔާގެ މެންބަރުންނާއި މަތީ ތައުލީމުގެ ދާއިރާގެ އޮފިޝަލުންނާއި މި ވަފުދުން ބައްދަލުކުރާނެ ކަމަށް ވެސް އެމެރިކާގެ ސްޓޭޓް ޑިޕާޓްމެންޓުން މައުލޫމާތު ދެއެވެ.
ނިއު ދިއްލީގައި އޮންނަ އިންޑިއާ-ޔޫއެސް ފޯރަމްގައި އެމެރިކާގެ ވަފުދުގައި އިސްކޮށް ހުންނަވާ ޑޮނަލްޑް ލޫ އިންޑިއާއަށް ކުރައްވާ ދަތުރުފުޅު ވަނީ އިއްޔެ ފައްޓަވާފައެވެ. މި ވަފުދު އިންޑިއާގެ އިންޑިއާ ސަރުކާރުގެ އޮފިޝަލުންނާއި ޕްރައިވެޓް ސެކްޓާގެ މެންބަރުންނާއި ތައުލީމީ ދާއިރާއާއި މީޑިއާއާ ބައްދަލުކޮށް، ދެ ގައުމުން ގުޅިގެން ކުރެވޭނެ މަސައްކަތްތަކާ ގުޅޭ ގޮތުން މަޝްވަރާ ކުރާނެ ކަމަށް ވެސް އެމެރިކާގެ ސްޓޭޓް ޑިޕާޓްމެންޓުން މައުލޫމާތު ދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
