ބޮޑުތަކުރުފާނުމަގު ފުޅާކުރާ ސަރަހައްދު ހިއްކުމުގެ މަސައްކަތް 90 އިންސައްތަ ނިމިއްޖެ
ލިޔުންތެރިޔާ
އަބްދުﷲ ހުސައިން
މާލޭ ބޮޑުތަކުރުފާނު އެމްއެމްއޭ ކުރިމައްޗާ ދިމާލު ހަތަރު ލޭނަށް ފުޅާކުރާ ސަރަހައްދުގެ ބިން ހިއްކުމުގެ މަސައްކަތް ނިމުމަކަށް އަތުވެއްޖެއެވެ.
އެމްޓީސީސީން ބުނީ އެތަނުގެ ބިން ހިއްކުމުގެ މަސައްކަތް 90 އިންސައްތަ ނިމިފައިވާކަމަށެވެ. އެގޮތުން މިހާރު އެ ސަރަހައްދު ޝީޓްޕައިލްތައް ވަރުގަދަ ކުރުމުގެ ގޮތުން ޖަހާ އެންކަރ ބްލޮކްތައް ޖެހުމުގެ މަސައްކަތް ނިމިފައިވާކަން އެމްޓީސީސީން ވަނީ ބުނެފައެވެ. އެމްޓީސީސީން ބުނީ 132 މީޓަރު ސަރަހައްދެއްގައި ޝީޓްޕައިލްކުރުމުގެ މަސައްކަތް ނިމިފައިވާކަމަށެވެ.
އެމްޓީސީސީން ބުނީ މި މަސައްކަތް ކަނޑައެޅިފައިވާ ތާވަލާއެއްގޮތަށް ކުރިއަށްދާކަމަށެވެ. އެގޮތުން އެމްޓީސީސީން ވަނީ މި މަޝްރޫޢުގެ ފުރަތަމަ ފިޔަވަހި ރޯދައަށް ނިންމުމަށް އަމާޒުހިފާފައެވެ.
ބޮޑުތަކުރުފާނުމަގު އުތުރު ފަރާތުން މަގު ފުޅާކޮށް ތަރައްގީ ކުރުމުގެ މަޝްރޫއުގެ އަމަލީ މަސައްކަތް އެމްޓީސީސީން ފަށާފައިވަނީ، ހުސްވި އޮގަސްޓްމަހުގެ 21 ވަނަ ދުވަހުއެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ މިއަހަރުގެ އޭޕްރިލްމަހުގެ ތެރޭގައެވެ.
މި މަޝްރޫއަކީ ދިވެހި ދައުލަތުގެ ބަޖެޓުން ހަރަދުކޮށްގެން، މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާއިން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ ހަވާލުކޮށްފައިވާ މަޝްރޫއު އެކެވެ. އެ ކުންފުންޏަށް މި މަސައްކަތް ހަވާލުކޮށްފައި ވަނީ 144,509,024.16 ރުފިޔާ އަށެވެ. މި މަސައްކަތް 455 ދުވަސްތެރޭ ނިންމަން ޖެހެއެވެ.
މިމަޝްރޫއުގެދަށުން ކުރުމަށްހަމަޖެހިފައިވާ މައިގަނޑު މަސައްކަތްތަކަކީ ބޮޑުތަކުރުފާނުމަގު އުތުރުފަރާތުން ފުޅާކޮށް ހަތަރު ލޭނަށް މަގުހެދުމާއި 830 މީޓަރުގެ މަގުގައި ތާރު އެޅުމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
