ސުންނަތަށް އީމާން ނުވާ މީހާ ޤުރްއާނަށް ވެސް އީމާންވާކަމުގައެއް ނުވާނެ: ޚުތުބާ

ރަސޫލާ ﷺ ގެ ސުންނަތަަށް އީމާންނުވާ މީހާ ޤުރުއާންނަށްވެސް އީމާންވާ ކަމުގައި ނުވާ ކަމަށް މިއަދުގެ ހުކުރު ޚުތުބާގައި ބުނެފިއެވެ.

އިސްލާމީ ޝަރީޢަތުގައި ސުންނަތުގެ މަޤާމު މައުޟޫއަށް އަލިއަޅުވާލައި މިއަދު އިއްވި ހުކުރު ޚުތުބާގައި ބުނީ، އިންސާނުން ދުނިޔޭގައި އުޅުމަށް މާތް الله ޚިޔާރުކުރައްވައިފައިވާ މަގަކީ އިސްލާމް ދީންކަމުގައެވެ. އަދި އެކަލާނގެ ޙަޟުރަތުން މީސްތަކުންނާ ހަމައަށް މި ދީން އައިސްފައިވަނީ، ކީރިތި ރަސޫލާ محمّد ﷺ މެދުވެރިކުރައްވައި ކަމަށެވެ.

ޝައްކެއްނެތް ގޮތުގައި އެކަލޭގެފާނަށް ބާވައިލެއްވުނު މި ދީން އެކުލެވިގެންވަނީ މައިގަނޑު ދެ މަސްދަރުގެ މައްޗަށެވެ. އެއީ، ކީރިތި ޤުރްއާނާއި މާތް ނަބިއްޔާ ﷺގެ އަގުމާތްވި ސުންނަތެވެ. އެހެންކަމުން، މާތް اللهއަށް ކިޔަމަންވުމަށް ކުރައްވައިފައިވާ އަމުރުފުޅާ ވިދިގެން ރަސޫލާ ﷺއަށް ކިޔަމަންވުމަށް، ކީރިތި ޤުރްއާނުގައި އެކަލާނގެވަނީ އަމުރުކުރައްވައިފައެވެ. އަދި އެކަލާނގެއަށް އުރެދުމެކޭ އެއްފަދައިން ރަސޫލާ ﷺއަށް ކިޔަމަންނުވުމުން މުއުމިނުން ކުރާ ހެޔޮ ޢަމަލުތައް ބާޠިލުވާނޭކަން ވެސް ވަނީ އަންގަވައިފައެވެ.

ޚުތުބާ

މާތް الله ވަޙީކުރައްވައިފައި ވެއެވެ.

"އޭ إيمانވެއްޖެ މީސްތަކުންނޭވެ! ތިޔަބައިމީހުން اللهއަށް ކިޔަމަންވާށެވެ! އަދި رسولއާއަށް ކިޔަމަންވާށެވެ! އަދި ތިޔަބައިމީހުންގެ عملތައް ތިޔަބައިމީހުން باطل ނުކުރާހުށިކަމެވެ!"

ޚުތުބާގައި ބުނި ގޮތުގައި މި އާޔަތުން ދޭހަވަނީ، اللهއާއި އެކަލާނގެ ރަސޫލާ ﷺއަށް ނުކިޔަމަންތެރިވުމަކީ މުއުމިނުން ކުރާ ހެޔޮ ޢަމަލުތައް ބާޠިލުވާނޭ ކަމެއްކަމެވެ.

އެކަލާނގެ ވަޙީކުރައްވައިފައި ވެއެވެ.

"އަދި رسولއާ ތިޔަބައިމީހުންނަށް ގެނެސްދެއްވި ކޮންމެ އެއްޗެއްގައި، ފަހެ، ތިޔަބައިމީހުން ހިފާށެވެ! އަދި އެކަލޭގެފާނު ތިޔަބައިމީހުންނަށް ނަހީކުރެއްވި ކޮންމެ ކަމަކުން، ފަހެ، ތިޔަބައިމީހުން ދުރުވެގަންނާށެވެ!"

އެހެންކަމުން އަހަރެމެންނަށް އެނގި ކަށަވަރުވާ ކަމަކީ، ރަސޫލާ ﷺއަށް ކިޔަމަންނުވާ މީހާ މާތް اللهއަށް ކިޔަމަންވާ މީހަކުކަމުގައި ނުވާނޭކަމެވެ.

ޚުތުބާ

ޚުތުބާގައި އިތުރަށް ބުނި ގޮތުގައި، ސުންނަތާ ނުލައި ދީނުގެ ޙުކުމްތައް ނޭނގޭނޭކަން އަހަރެމެން ދަންނާން ޖެހޭނެއެވެ. އަދި ނަމާދު އަދާކުރާންވީ ގޮތް އެނގެނީ ކީރިތި ރަސޫލާގެ ސުންނަތުން ކަމަށާ ޙައްޖުގެ އަޅުކަން އަދާކުރާންވީ ގޮތް ވެސް ދަސްކޮށްދެއްވާފައިވަނީ ކީރިތި ރަސޫލާ ﷺ ކަން ފާހަގަކޮށްފައިވެއެވެ.

އެހެންކަމުން، ކީރިތި ޤުރްއާނާއި ސުންނަތް ވަކިނުކުރެވޭނެ ކަމަށާއި، ސުންނަތަށް އިންންކާރުކުރާ މީހުންނާ މެދު ރައްކާތެރިވެ ތިބުމަށް ކީރިތި ރަސޫލާ އިރުޝާދު ދެއްވާފައިވާ ކަމަށް ޚުތުބާގައި ބުންޏެވެ. އަދި ކީރިތި ޤުރްއާނާއި ކީރިތި ރަސޫލާގެ ސުންނަތުގައި ހިފަހައްޓައިގެން ތިބުމަށް ވަނީ ނަޞޭޙަތްތެރުވެފައެވެ.