މިފަހަރު ކިއު ހެދީ ސުޕްރީމް ކޯޓް ކައިރީގަ

ރިޔާސީ އިންތިހާބު ބާތިލް ކުރުމަށް ރައީސް ޔާމިން ހުށަހެޅުއްވި ދުސްތޫރީ މައްސަލަަަައިގަ މިއަދު މެންދުރު 1:00 އަށް ތާވަލްކުރެވިފައިވާ އަޑު އެހުމަށް ވަދުމަށް ހެނދުނު 8:00 ފެށިގެން ސުޕްރީމް ކޯޓު ދަށުގައި ކިއު ހަދަން ފަށައިފިއެވެ.

ސަރުކާރަށް ނިސްބަތްވެ ވަޑަައިގަންނަވާ ގިނަ އަދަދެއްގެ ބޭފުޅުންނާއި އިދިކޮޅު ޕާޓީތަކައް ނިސްބަތްވާ ބޭފުޅުންގެ އިތުރުން އާއްމު ރައްޔިތުންގެ ތެރެއިންވެސް ގިނަ އަދަދެއްގެ ބަޔަކު މިވަގުތުވެސް ކިއުގައި އެބަތިއްބެވިއެވެ. މީގެ ތެރޭގައި މިނިސްޓަރުންވެސް ހިމެނެވެ.

ސުޕްރީމް ކޯޓުގައި އޮތް އަޑު އެހުމަކަށް ވަނުމަށް ނަންނޯޓް ކުރުން އޮންނަނީ އަޑުއެހުން ފެށުމުގެ 1 ގަޑިއިރު ކުރިންނެވެ. އެހެންކަމުން މި މައްސަލައިގެ އަޑު އެހުމަށް ނަންނޯޓް ކުރަން ފެށިފައިވަނީ މިއަދު 12:00 ގައެވެ. ނަމަވެސް ޖާގައިދެ ދަތިކަމާއިހުރެ ކިއުގައި ތިއްބެވި ހުރިހާ ބޭފުޅުންނަށް އަޑުއެހުމަކަށް ނުވަދެވޭނެއެވެ.

ސްޕުރީމް ކޯޓު ހުންނަ ސަރަހައްދަކީ އެއްވުން މަނާ ސަރަހައްދެއް ކަމުގައި ވީ ނަމަވެސް މިވަގުތު އެތަނަށް އެއްވެ ތިއްބެވި ބޭފުޅުންނަކީ އެތަނަށް ހަމަނުޖެހުން އުފެއްދުމަށް ވަޑައިގެން ތިއްބެވި ބޭފުޅުންކަމަށް ނުވާތީ ފުލުހުން އަދި ސިފަައިންވެެސް އެތަނުން މީހުން ދުރުކޮށްފައެއް ނުވެއެވެ. ނަމަވެސް ސިފައިން އަދި ފުލުހުން ދަނީ އެ ސަރަހައްދުގައި ފޯރި މަރަމުންނެވެ.

ނިމިދިޔަ ސެޕްޓެންބަރު މަހުގެ 23 ވަނަ ދުވަހު ބޭއްވި ރިޔާސީ އިންތިހާބުން ރައީސް ޔާމީން ނާކާމިޔާބު ވުމުން އެކަން ގަބޫލު ކުރައްވާ އިއުލާން ކުރެއްވުމަށްފަހު އިންތިހާބަގައި މައްސަލަތަކެއް އެބަހުރިކަމަށް ވިދާޅުވެ އިންތިހާބާއި ގުޅޭ ދުސްތޫރީ މައްސަލައެށް ސުޕްރީމް ކޯޓަށް ވެއްދީ ނިމިގެން ދިޔަ ހަފްތާގެ ތެރޭގައެވެ.