ރޮނާލްޑޯގެ ހެޓްރިކާއެކު ރިއޯ އަތުން އަލް ނަސްރަށް ފަސޭހަ މޮޅެއް

ކުރިއަށް އޮތް ސީޒަނަށް ތައްޔާރުވުމުގެ ގޮތުން ސައުދީ ޕްރޮފެޝަނަލް ލީގުގެ އަލް ނަސްރުން މިހާރު ޕޯޗުގައި ކުރިއަށްގެންދާ ފަރިތަކުރުންތަކުގެ ތެރެއިން، ބުރާސްފަތި ދުވަހުގެ ރޭ ޕޯޗުގަލްގެ ރިއޯ އަވޭ އާއި ދެކޮޅަށް ކުޅުނު އެކުވެރިކަމުގެ މެޗު ފަސޭހަކަމާއެކު 4-0 ގެ ނަތީޖާއަކުން އަލް ނަސްރުން ކާމިޔާބުކޮށްފިއެވެ.

މެޗުގެ ފުރަތަަމަ ހާފުގައި މޮޅަށްކުޅެ އަލް ނަސްރުން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 15 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޑިފެންޑަރު މުހައްމަދު ސިމިކަން އެވެ. އަދި އެޓީމުން ލީޑު ފުޅާކުރި ލަނޑު ފުރަތަމަ ހާފުގެ 44 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ އެވެ.

މީގެ އިތުރުން ވެސް މިހާފުގައި އަލް ނަސްރުން ލަނޑުޖަހާނެ ގިނަ ފުރުސަތުތަކެއް ތަނަވަސްކުރި ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.

މެޗުގެ ދެވަނަ ހާފުގައި އަލް ނަސްރުން އެޓީމުގެ އެޓޭކުތައް އިތުރަށް ވަރުގަދަކުރިއިރު، މެޗުގެ 61 ވަނަ މިނެޓިގައި އެޓީމަށް ވަނީ ޕެނަލްޓީއެއް ވެސް ލިބިފައެވެ. ނަމަވެސް އެޓީމުގެ ސެނަގޯލް ފޯވާޑް ސަޑިއޯ މާނޭ ކުރިއަށް ފޮނުވާލި ޕެނަލްޓީ ރިއޯ އަވޭގެ ކީޕަރު ވަނީ ދިފާއުކޮށްފައެވެ.

ނަމަވެސް އޭގެ ދެމިނެޓް ފަހުން ރޮނާލްޑޯ ވަނީ އަލް ނަސްރުގެ ތިންވަނަ ލަނޑު ކާމިޔާބުކޮށްފައެވެ. އަދި އޭގެ ފަސް މިނެޓް ފަހުން އެޓީމަށް ލިބުނު ޕެނަލްޓީއެއްގައި ރޮނާލްޑޯ ވަނީ އަލަ ނަސްރުގެ ހަތަރުވަނަ ލަނޑު ކާމިޔާބުކޮށް މިމެޗުގައި އޭނާގެ ހެޓްރިކް ފުރިހަމަ ކޮށްފައެވެ. އަދި މިއީ އުމުރުން 40 އަހަރު ފުރުނު ފަހުން ރޮނާލްޑޯ ކާމިޔާބުކުރި ފުރަތަމަ ހެޓްރިކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.