ނަޝީދު ވިދާޅުވިގޮތަށް ތޮއްޑޫގައި ހައްދާ ފަޅޯ ޔޫރަޕަށް އެކްސްޕޯޓު ކުރެވޭނެތަ ؟

އއ ތޮއްޑޫގައި ބޭއްވި ޖަލްސާއެއްގައި ވާހަކަ ދައްކަވަމުން ކުރީގެ ރައީސް ވަރަށް މޮޅު ވާހަކަފުޅެއް ވިދާޅުވިއެވެ. އެއީ އެރަށުގައި ހައްދާ ފަޅޯ، ދަޅު ބަންދުކޮށް ޔޫރަޕަށް އެކްސްޕޯޓު ކުރާވާހަކައެވެ.

އެމަނިކުފާނު ވިދާޅުވި ގޮތުގައި، އެ ރަށަށް އަންނަ ގެސްޓުންނަށްވެސް އެ ރަށުގައި ހައްދާ ފަޅޯވަރަށް މީރެވެ. އަދި ފަޅޯ މާލޭ ބާޒާރަށް ނުފޮނުވައި ޔޫރަޕުގެ ބާޒާރަށް ފޮނުވާށޭ ވެސް ގެސްޓުން ބުނާކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު އެ ވާހަކަ ވިދާޅުވުމުން ޖަލްސާ ބަލަން ގޮސް ތިބިމީހުން އުފަޅުން އަތްޖެހިއެވެ. އެމަނިކުފާނު ވިދާޅުވިގޮތުގައި، ފަޅޯ އެކްސްޕޯޓު ކުރެވެން އޮތީ އެކަމަކު އެމްޑީޕީއަށް މަޖިލީސް މެޖޯރިޓީ ދީގެންނެވެ. އެ ނޫންގޮތަކަށް އެކަން ވާކަށް ނެތެވެ.

ފަޅޯ އެކްސްޕޯޓު ކުރާނަމޭ ބުނީމަ އަޑު އަހާލަން ފަސޭހައެވެ. މަސް ވެސް އެކްސް ޕޯޓު ކުރަނީ ވިއްޔާއެވެ. ފަޅޯ ނުކުރެވެންވީ ކީއްވެހެއްޔެވެ؟

ފުރަތަމަ ކަމަކަށް އެއްވެސް އެއްޗެއް ފައިދާ ހުރި މިންވަރަކަށް އެކްސްޕޯޓު ކުރެވޭނީ އެ ގިނަ އަދަދަކަށް އުފެއްދިގެންނެވެ. އޭގެ ބޭނުމަކީ އުފައްދަން ކުރާ ޙަރަދު ވީހާވެސް ކުޑަ ކުރުމެވެ. މިސާލަކަށް 1000 ރުފިޔާ ޙަރަދު ކޮށްގެން 1000 ފަޅޯ ހެއްދޭނަމަ ޙަރަދުވަރަށް ވެސް ކުޑަވެއެވެ. ދުރު ގައުމަކަށް ދަޅުގައި ބަންދުކޮށް އެކްސްޕޯޓު ކުރެވޭނީ އުފައްދަން ކުރާ ޙަރަދު ވަރަށް ބޮޑުތަން ކުޑަ ކުރެވިގެންނެވެ. އެކަން ކުރެވޭނީ ވީހާވެސް ގިނައިން އުފެއްދިގެންނެވެ. އެކަމަށް އިނގިރޭސި ބަހުން ކިޔަނީ އެކޮނޮމީސް އޮފް ސްކޭލްއެވެ.

ތޮއްޑޫގައި މިހާރު ފަޅޯ ހެއްދޭވަރާއި ތޮއްޑޫގެ ބިމުގެ ސައިޒަށް ބަލާއިރު، މި އަދަދަށް ފަޅޯ އެއް ނެހެއްދޭނެއެވެ. މުޅި ތޮއްޑޫގެ ދަނޑުބިންތަކުގައި ހަމައެކަނި ފަޅޯ ހައްދައިގެންވެސް އެ އަދަކަށް ފަޅޯ ނެހެއްދޭނެއެވެ. އަދި އެގޮތަށް އެކަންކޮށްފިނަމަ ދެން ހައްދާ އެހެނިހެން ބާވަތްތަށް ހައްދާނެ ބިމެއް ނުހުންނާނެއެވެ. މިސާލަކަށް ކަރާ އަދި ބަރަބޯ ފަދަ މޭވަތަކެވެ.

ރާއްޖެއިން ފަޅޯ ޔޫރަޕަށް ބޭރުކުރާނަމަ، ވާދަ ކުރަން މިޖެހެނީ ބްރެޒިލް، އަދި އިންޑިޔާ ފަދަ ޤައުމުތަކާއެވެ. މިހާރު ޔޫރަޕަށް އެންމެ ގިނައިން ފަޅޯ އެތެރެ ކުރަނީ ބްރެޒިލް އިންނެވެ. ބްރެޒިލް އަކީ މުޅި ދުނިޔޭގަވެސް ދެވަނައަށް އެންމެ ގިނައިން ފަޅޯ އުފައްދާ ގައުމެވެ. ޔޫރަޕުގެ ގައުމުތަކުގެ ތެރެއިން އެންމެ ގިނައިން ފަޅޯ އިމްޕޯޓު ކުރަނީ ޖަރުމަނާއި ނެދަރލޭންޑްސް އިންނެވެ. މި ދެ ގައުމަށް އެތެރެ ކުރާ ހުރިހާ ފަޅޮލެއް އެތެރެ ކުރަނީ ބްރެޒިލްއިންނެވެ. މިގޮތަށް އެތެރެ ކުރާ ފަޅޯ ޔޫރަޕާއި އަދި އެހެނިހެން ބައެއް ގައުމުތަކަށް އަލު އެކްސްޕޯޓުވެސް ކުރެއެވެ. މިގޮތުން ޔޫރަޕުން ދިވެހިރާއްޖެއަށްވެސް ކޮންމެވެސް ވަރަކަށް އެކްސްޕޯޓުކުރެއެވެ.

ކަސްޓަމްސްގެ ތަފާސް ހިސާބުތަށް ދައްކާގޮތުން ރާއްޖެއަކީ ގިނަ އަދަދަކަށް ފަޅޯ އިމްޕޯޓު ކުރާ ގައުމެކެވެ. މިގޮތުން އެންމެގިނައިން އިމްޕޯޓު ކުރަނީ ލަންކާއިންނެވެ. ދެވަނައަށް ތައިލޭންޑުން އަދި ތިންވަނައަށް އިންޑިޔާއިންނެވެ. އަހަރެއްގެ ތެރޭގައި ރާއްޖެއަށް ޖުމްލަ ގޮތެއްގައި 200 ވަރަކަށް ޓަނު އެތެރެކުރެއެވެ. އެހާވަރަށް އެތެރެ ކުރާ ސަބަބަކީ ރާއްޖޭގައި އެ ހާވަރަށް ފަޅޯ ހެއްދޭނެ ގާބިލުކަން ނެތީމައެވެ. އަމިއްލަ ގައުމަށް ބޭނުންވާވަރަށްވެސް ނު އުފެއްދޭ އެއްޗެއް ޔޫރަޕަށް އެކްސްޕޯޓު ކުރާނަމޭ ބުނީމަ ޤަބޫލު ކުރެވޭނީ ކިހިނެއް ހެއްޔެވެ ؟

ބިމުގެ ދަތިކަމުގެ އިތުރަށް ދެން ރާއްޖެއަށް ކުރިމަތިވާނެ ދައްޗަކީ ދަނޑުވެރިކަން ކުރާނެ މީހުން ހޯދުމުގެ ދައްޗެވެ. ދަނޑުވެރިކަމަކީ އޭގެ ޒާތުގައި އިނގިރޭސި ބަހުން ބުނާނަމަ "ލޭބަރ އިންޓެންސިވެ" މަސައްކަތެކެވެ. އޭގެ މާނައަކީ އެންމެ ބޮޑު ޙަރަދެއް ހިނގާނީ މަސައްކަތް ކުރާ މީހުންނަށެވެ. މިފަދަ މަސައްކަތް މިހާރު ރާއްޖޭގައި ކުރުވަނީ ކުޑަ މުސާރައެއްދީ ބިދޭސީ މަސައްކަތްތެރިންލައްވައެވެ. ދަނޑުވެރިކަން މިހާރުވެސް ކޮންމެވެސް ވަރަކަށް ރާއްޖޭގައި ކުރެވެނީ މިފަދައިން ކުޑަ އުޖޫރައަށް މަސައްކަތް ކުރާނެ ބިދޭސީން ލިބޭތީއެވެ. ދިވެހިން މި މަސައްކަތުގައި ނޫޅޭ ވާހަކައެއް ނޫނެވެ. ނަމަވަސް ދަނޑުވެރިކަން ކުރުމުގައި މައިގަނޑުގޮތެއްގައި މިހާރު ހަރަކާތްތެރިވަނީ ބިދޭސީންނެވެ. އެމްޑީޕީގެ އެޖެންޑާ19 ވައުދުނާމަ ބުނާގޮތުން، އެމްޑީޕީގެ އަމާޒަކީ ބިދޭސީންގެ މުސާރަވެސް މަތިކުރުމެވެ. އޭގެ މާނައަކީ އެންމެ އާދައިގެ މަސަތްކަތު މީހާއަށްވެސް ދެވޭނެ އެންމެ ކުޑަ އުޖޫރައެއް ޤާނޫނަކުން ކަނޑައެޅޭނެއެވެ. މިހެންވެއްޖެނަމަ އަނެއްކާވެސް މަސައްކަތުގެ އަގު (ލޭބަރ ކޮސްޓް) އުފުލޭނެއެވެ. އޭގެ ނަތީޖާއަކަށް ވާނީ، ދަނޑުވެރިކަން ފަދަ ލޭބަރ އިންޓެންސިވް ދާއިރާތަކާއި ކުދި ވިޔަފާރިތަށް ފުނޑިގެންދިއުމެވެ. މިހެންކަމުން ފަޅޯ ހައްދާ ވައުދާއި، އެންމެ ކުޑަ އުޖޫރަ ކަނޑައަޅާ ވައުދާއި ފުށޫވެސް އެބައަރައެވެ.

ކުރުކޮށް ބުނަނީނަމަ، ރާއްޖެއިން ބޭރަށް ފަޅޯ އެކްސްޕޯޓު ކުރަން، ފަޅޯ ހައްދަން ބޭނުންވާ ބިން، އަދި މަސަތްކަތު މީހުންނެއްވެސް ރާއްޖެއަކު ނެތެވެ. ރައީސް ނަޝީދަށް މިކަން ނޭނގެނީކަމެއް ނޫނީ ގަސްދުގައި އޮޅުވާލަނީ ކަމެއް ނޭނގެއެވެ. އެކަމަކު އިޤްތިސާދީ ނަޒަރަކުން ވިސްނާނަމަ ޔޫރަޕަށް ފަޅޯ އެކްސްޕޯޓު ކުރުމަކީ ކުރެވޭނެކަމެއްނޫނެވެ.