ފަސޭހަކަމާއެކު ކުޑަފުށި ބަލިކޮށް ކޯރާ ކޯރާ ފުރަތަމަ ފަހަރަށް ފައިނަލަށް

"ރާބަދި ޗެލެންޖް 2024" ގެ ސެމީ ފައިނަލް ފުރަތަމަ މެޗުގައި ކޯރާ ކޯރާ މޯލްޑިވްސް އާއި ކުޑަފުށި ވާދަކުރި މެޗު ފަސޭހަކަމާއެކު 6-2 ގެ ތަފާތުބޮޑު ނަތީޖާއަކުން ކާމިޔާބުކޮށް ކޯރާ ކޯރާ އިން ފުރަތަމަ ފަހަރަށް މުބާރާތުގެ ފައިނަލުން ޖާގަ ހޯދައިފިއެވެ.

މުޅި މުބާރާތުގައި ވެސް ތަފާތު މޮޅު ކުޅުމެއް ދައްކަމުން އަންނަ ކޯރާ ކޯރާ މޯލްޑިވްސް އިން މުބާރާތުގެ ސެމީ ފައިނަލުން ޖާގަ ހޯދީ ކުއާޓާ ފައިނަލުގައި ފަސޭހަކަމާއެކު 7-1 ގެ ތަފާތުބޮޑު ނަތީޖާއަކުން ދަ ސްޓޭންޑާޑއ ބަލިކުރުމަށްފަހު އެވެ.

ކުޑަފުށި ސެމީ ފައިނަލުން ޖާގަ ހޯދީ ކުއާޓާ ފައިނަލުގައި މިއަހަރުގެ މުބާރާތުގައި ވަރުގަދަކޮށް ފެނުނު މާމުނަގައު ފަސޭހަކަމާއެކު 7-2 ގެ ތަފާތުބޮޑު ނަތީޖާއަކުން ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ކޯރާ ކޯރާ މޯލްޑިވްސްގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 5-1 ގެ ބޮޑު ލީޑަކާއެކު ކޯރާ ކޯރާ ކުރީގައި އޮވެގެންނެވެ. ނަމަވެސް ދެވަނަ ހާފުގައި ކުޑަފުށިން ވަނީ އެޓީމުގެ ކުޅުން ރަނގަޅުކޮށް ވާދަވެރި ކުޅުމެއް ދައްކައިދީފައެވެ. އަދި މިހާފުގައި ދެޓީމުން ކުރެ ކޮންމެ ޓީމަކުން ވެސް ވަނީ އެއްލަނޑު ކާމިޔާބުކޮށްފައެވެ.

އެގޮތުން މިމެޗުގައި ކޯރާ ކޯރާ މޯލްޑިވްސްގެ އަލީ ސަމާލް ދެލަނޑު ކާމިޔާބުކުރިއިރު، އެޓީމުގެ އަލީ މުހައްމަދު، އަހުމަދު މުނައްވަރު، މުހައްމަދު އިސާމްގެ އިތުރުން މޫސާ މުޒާހް މުހައްމަދު މިއިން ކޮންމެ ކުޅުންތެރިއެއް ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ކުޑަފުށިން ކާމިޔާބުކުރި ދެލަނޑަކީ ކޯރާ ކޯރާ މޯލްޑިވްސްގެ އަލީ މުހައްމަދު އަދި އަހުމަދު މުނައްވަރު މި ދެ ކުޅުންތެރިންގެ އެތުން ބައިކޮޅަށް ވަން ދެލަނޑެވެ.  އަދި މިމެޗުގެ މޭން އިފް ދަ މެޗަކަށް ހޮވިފައިވަނީ ކޯރާ ކޯރާ މޯލްޑިވްސްގެ އަލީ ސަމާލް އެވެ.

މީދޫ ޖަމްޢިއްޔަތުއް ޞަލާޙުގެ ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަ ރިސޯޓް ފުޓްސަލް ޗެލެންޖުގައި މިއަހަރުގެ 14 ޓީމެއް ބައިވެރިވެފައިވާއިރު މުބާރާތް ކުރިއަށް ދަނީ ބައިވެރިވި 14 ޓީމު ހަތަރު ގުރޫޕަކަށް ބަހާލައިގެންނެވެ.

އެގޮތުން ގުރޫޕް އެކެއް އަދި ދޭއްގައި ހަތަރު ޓީމު ހިމެނޭ އިރު އަނެއް ދެ ގުރޫޕުގައި ހިމެނެނީ ތިން ޓީމެވެ. އަދި މުބާރާތުގެ ކުއާޓާ ފައިނަލް މެޗުތައްނިމުނުއިރު، ސެމީ ފައިނަލުން ޖާގަ ހޯދާފައި ވަނީ ޖޯލި ބީއިންގެ އިތުރުން ކޯރާ ކޯރާ، ކުޑަފުށި އަދި ދިގަލި މޯލްޑިވްސް އެވެ.