ދިވެހި ސިފައިންނަށް ހެލިކަޕްޓަރ ނުދުއްވޭނެ ކަމަށް ބުނުމަކީ ޖޯކެއް: އުމަރު
ދިވެހި އަސްކަރިއްޔާގެ ސިފައިންނަށް ހެލިކޮޕްޓަރު ނުދުއްވޭނެ ކަމަށް ބުނާ ވާހަކަ އަކީ ޖޯކެއް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އަވަށްޓެރި އިންޑިޔާގެ ހެލިކޮޕްޓަރުތަކެއް އޮޕަރޭޓް ކުރުމަށް ރާޢްޖޭގައި އިންޑިޔާގެ ސިފައިން ތިބޭ މައްސަލައިގައި ވަރަށް ބޮޑަށް ފާޑުވިދާޅުވަމުން ގެންދަވާ އުމަރު މިހެން ވިދާޅުވެފައި ވަނީ ފޭސްބުކްގައި ކުރެއްވި ޕޯސްޓެއްގައެވެ.
އުމަރު ވިދާޅުވި ގޮތުގައި މީގެ ސާޅީސް ފަސް އަހަރު ކުރިން، ދިވެހިރާއްޖޭގެ ދެވަނަ ޖުމްހޫރިއްޔާގެ ފުރަތަމަ ރައީސް އަލްމަރްޙޫމް އިބްރާހީމް ނާސިރުގެ ވެރިކަމުގައި ދިވެހި ސިފައިން ވަނީ މަތިންދާ ބޯޓާއި ހެލިކޮޕްޓަރު ދުއްވާފައި ކަމަށެވެ..
އޭރު ދިވެހި އަސްކަރިއްޔާގައި މަތިންދާ ބޯޓް ދުއްވާ ސެކްޝަނެއް ގާއިމްކޮށްފައި އޮތްކަން ފާހަގަކުރައްވައި އުމަރު ވިދާޅުވީ އެތަކެތި ބެލެހެއްޓީ ވެސް ހަމަ ދިވެހި ސިފައިން އަމިއްލައަށް ކަމަށެވެ.
އުމަރު ވިދާޅުވި ގޮތުގައި ރައީސް ނާސިރުގެ ވެރިކަމުގައި ދިވެހި ސަރުކާރުން ކުދި މަތިންދާބޯޓުތަކާއި ހެލިކޮޕްޓަރުތައް ގަނެފައިވާ ކަމަށާއި އަދި އެތަކެތި ދުއްވުމަށް ސިފައިން ތަމްރީން ވެސް ކުރި ކަމަށެވެ.
އެގޮތުން ސިފައިން ތަމްރީނު ކުރުމަށް ލަންކާގެ ރިޓަޔަރޑް ޕައިލެޓުން ރާއްޖެ ގެނައި ކަމަށް އުމަރު ވަނީ ވިދާޅުވެފައެވެ.
އުމަރު ވިދާޅުވި ގޮތުގައި ލަންކާގެ ޕައިލެޓުންގެ އެހީތެރިކަމާއި އެކު ދިވެހި ސިފައިން ތަމްރީން ކުރުމަށް ޕައިޕާ ސެނެކާ ބްރޭންޑްގެ ދެ އެއާކްރާފްޓް، ޗެރޯކީ ބްރޭންޑްގެ އެއާކްރާފްޓެއް،ސެސްނާ 172 ބްރޭންޑުގެ އެއާކްރާފްޓެއް، ބެލް 47ޖޭ ބްރޭންޑުގެ ދެ ހެލިކޮޕްޓަރު އަދި ސްކައިވޭން ބްރޭންޑުގެ އެއާކްރާފްޓެއް ބޭނުންކުރި ކަމަށެވެ.
އުމަރު ވިދާޅުވެފައިވާ ގޮތުގައި އޭރު ތަމްރީން ކުރި ޕައިލެޓުންނާއި ސަރުކާރުން ގަނެފައިވާ މަތިންދާބޯޓުތަކާއި ހެލިކޮޕަޓަރުތައް 1992 ވަނަ އަހަރު އެއާ މޯލްޑިވްސްގެ ދަށަށް ބަދަލުކުރީ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
