ދަ އަރައިވަލް އޭއާރުއާރުސީ ފުޓްސަލް ކަޕް 2024 މާދަމާ ފަށަނީ

އެއާރޕޯޓް ރެޕްސް ރެކްރިއޭޝަން ކުލަބުގެ ފަރާތުން އިންތިޒާމުކޮށްގެން ބާއްވާ "ދަ އަރައިވަލް އޭއާރުއާރުސީ ފުޓްސަލް ކަޕް 2024" ފެށުމައްޓަކައި އެންމެ ފަހުގެ ތައްޔާރުވެފައިވާކަމަށް އެކުލަބުން ބުނެފިއެވެ.

މާދަމާ ފެށުމަށް ހަމަޖެހިފައިވާ މިމުބާރާތާއި ބެހޭގޮތުން ވޮއިސް ސްޕޯޓްސް އަށް މައުލުމާތު ދެއްވަމުން އެއާރޕޯޓް ރެޕްސް ރެކްރިއޭޝަން ކުލަބުގެ ރައީސް ރިޒާން އިބްރާހިމް ވިދާޅުވީ މި މުބާރާތަކީ ރިސޯޓް ރެޕުންނާއި ޓްރަވަލް އެޖެންސީތަކާއި ގުޅުން ބަދަހިކޮށް، އެކުވެރިކަމާއި އެއްބައިވަންތަކަން އާލާކުރުމުގެ އިތުރުން ކުޅިވަރުގެ ތެރެއިން ދުޅަހެއޮ މުޖުތަމައެއް ބިނާކުރުމުގެ މަގުސަދުގައި މިދިޔަ އަހަރު ބާއްވަން ފެށި މުބާރާތެއް ކަމަށެވެ.

2024 ޖޫން 01-15 އަށް ކުރިއަށް ގެންދާ މިއަހަރުގެ މުބާރާތުގައި ޖުމްލަ 16 ޓީމަކުން ބައިވެރިވެފައިވާއިރު، އޭގެ ތެރޭގައި ހިމެނެނީ ފިރިހެން 12 ޓީމާއި އަންހެން ހަތަރު ޓީމެވެ. އަދި ދެ ޑިވިޝަނަކަށް ކުރިއަށްގެންދާ މިމުބާރާތުގެ ފިރިހެން ޑިވިޝަން ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމު ކުއާޓާ ފައިނަލަށް ހޮވޭއިރު، ތިން ގުރޫޕުން ތިންވަނަ ހޯދާ ތިން ޓީމުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް ކުއާޓާގެ ފުރުސަތު ލިބިގެންދާނެއެވެ.

މުބާރާތުގެ އަންހެން ޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗުކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ.

މިއަހަރުގެ މުބާރާތުގެ ޓައިޓަލް ސްޕޮންސަރ އަކީ ދަ އެރައިވަލް ޓްރެވަލް ޓެބްލޮއިޑް އެވެ. އަދި މުބާރާތުގެ ގޯލްޑް ސްޕޮންސަރ އަކަށް އަލްޝާލީ މެރިން މޯލްޑިވްސް ހަމަޖައްސާފައިވާއިރު، މުބާރާތުގެ ޑިޖިޓަލް ޕާޓްނަރަކީ ދިރާގެވެ.

މިމުބާރާތުގެ ކިޓްސް ޕާޓްނަރަކަށް މެނީ މޯލްޑިވްސް ހަމަޖައްސާފައިވާއިރު، މީޑިއާ ޕާޓްނަރަކީ ވޮއިސް ސްޕޯޓްސް އެވެ. އަދި މުބާރާތުގެ ހުރިހާ މެޗެއް ވޮއިސް އަދި އާރުއާރުސީ ފޭސްބުކް ޕޭޖުން ލައިވް ކުރުމަށް ވަނީ ހަމަޖެހިފައެވެ.