ރޮހިންޔާ ރެފިއުޖީން ޗިކާގޯގައި ދިރިއުޅުން އާރާސްތު ކުރަނީ
ޗިކާގޯއަކީ ގިނަ އަދަދެއްގެ ރޮހިންޔާ ރެފިއުޖީން އުޅޭތަނެކެވެ. އެގޮތުން 1600 އަށްވުރެ ގިނަ އަދަދެއްގެ ރޮހިންޔާ ރެފިއުޖީން އެތާގައި އުޅޭއިރު އެމީހުންނަކީ މެލޭޝިޔާގައި އުޅުމަށްފަހު ޗިކާގޯއަށް ހިޖުރަކުރި މީހުންނެވެ.
އެމީހުން މެލޭޝިއާއަށް ހިކުރަކޮށްފައިވަނީ 1990 -2000 ވަނަ އަހަރުގެ ނިޔަލަށް ރޮހިންޔާގެ މުސްލިމުންނާއި މެދު ހިންގި ލާއިންސާނީ ޖަރީމާތަކަށް ކެތްނުވެގެންނެވެ.
ރޮހިންޔާގައި އުޅޭ މަދު މުސްލިމުންނާއި މެދު ޒަމާނުއްސުރެ ލާއިންސާނީ އަމަލުތައް ހިންގަމުން އަންނައިރު، އެމީހުންނަށް ދޭންޖެހޭ އެންމެ އަސާސީ ޚިދުމަތްވެސް މިޔަންމާގެ ސަރުކާރުން ފޯރުކޮށް ނުދެއެވެ.
މިޔަންމާގެ ސަރުކާރުން ގަބޫލުކުރާ ގޮތުގައި ރޮހިންޔާ މުސްލިމުންނަކީ އެއީ ބަނގުލަދޭޝްއިން މިޔަންމާއަށް ހުއްދަނެތި ގާނޫނާއި ޚިލާފަށް އެތެރެވެގެން އުޅޭ ބައެކެވެ.
ޗިކާގޯއަށް ހިޖުރަކުރި ރޮހިންޔާ ދަރިކޮޅުގެ މީހުންނަށް ޚާއްސަކޮށްގެން "ދަ ރޮހިންޔާ ކަލްޗަރަލް ސެންޓަރ އޮފް ޗިކާގޯ" ނަމުގައި 2016 ވަނަ އަހަރު ކަލްޗަރަލް ސެންޓަރެއް ހުޅުވާފައިވެއެވެ.
އެތަނަނީ 2013 ވަނަ އަހަރު އެމެރިކާގައި ވަޒަންވެރިވި ނާސިރު ޒަކަރިޔާ ކިޔާމީހަކު ހުޅުވި ތަނެކެވެ.
އެތަނުން ޗިކާގޯގައި އުޅޭ މިޔަންމާގެ މުސްލިމުންނަށް އިނގިރޭސި ކުލާސްތަކާއި، ގްރުއާން ކުލާސްތަކާއި، ކޮމްޕިއުޓަރ ޓްރައިނިންގެ އިތުރުން ކުޅިވަރު ކުޅުމުގެ މަގުވެސް ފަހިކޮށްދެއެވެ.
މީގެ އިތުރުންވެސް އެޖަމިއްޔާ އިން ޗިކާގޯގައި ދިރިއުޅޭ ރޮހިންޔާ މުސްލިމުންގެ ދިރިއުޅުން އާރާސްތުކުރުމަށް ގިނަ ގުނަ މަސައްކަތްތަކެއް ކޮށްދެއެވެ.
ފާއިތުވި އަހަރުތަކުގައިވެސް މިޔަންމާއިން އެގައުމުގައި ދިރިއުޅޭ ރޮހިންޔާ ދަރިކޮޅުގެ މީހުންނާއި، ދޭތެރޭ ވަރަށް އިހާނެތިކޮށް އަމަލުކޮށްފައެވެ. އެ އަނިޔާތަކަށް ކެތްނުވެގެން އެފަރާތްތަކުން ވަނީ އަވައްޓެރި ބަނގުލަދޭޝްއަށާއި، އިންޑިއާއަށް ހިޖުރަކޮށްފައެވެ. އަދި އެތަންތަނުގައި އެރައްޔިތުން ދިރިއުޅެމުންދަނީ ވަރަށް ދަތިހާލުގައި ކަމަށް އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ވަނީ ހާމަކޮށްފެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
