ކްރޮއޭޝިއާ އަތުން މޮޅުވެ އިނގިރޭސިން ފެންވަރު ދައްކާލައިފި

ވަރލްޑްކަޕް ފުޓްބޯޅަ މުބާރާތުގެ ގްރޫޕް އެލްގައި އިނގިރޭސިވިލާތާއި ކްރޮއޭޝިއާ ބައްދަލުކުރި މެޗް އިނގިރޭސިވިލާތުން ކާމިޔާބުކޮށް އެޓީމްގެ ފެންވަރު ދައްކާލައިފިއެވެ.

ކްރޮއޭޝިއާގެ މައްޗަށް މިމެޗްގައި އިނގިރޭސިން ކުރި ހޯދީ 4-2 ގެ ނަތީޖާއިންނެވެ. ތޯމަސް ޓުޗެލްގެ އިރުޝާދުގެ ދަށުން ކުޅުނު މިމެޗްގައި އިނގިރޭސިންގެ ފަރާތުން ރީތި ފުޓްބޯޅައެއް ފެނިގެންދިޔައިރު، އެޓީމްގެ ހަމަލާތައްވެސް ފެނުނީ ވަރުގަދަކޮށެވެ.

ޓެކްސަސްގައި ކުޅުނު މި މެޗުގައި އިނގިރޭސިންނަށް ގޯލް ހުޅުވާލަދިނީ، 12 ވަނަ މިނެޓްގެ ތެރޭގައި ކެޕްޓަން ހެރީ ކޭން އެވެ. މިއީ ޕެނަލްޓީއަކުން ކާމިޔާބުކުރި ލަނޑެކެވެ. އިނގިރޭސިން ލީޑް ނަގާފައިވަނިކޮށް ކްރޮއޭޓުން ވަނީ 36 ވަނަ މިނެޓް ތެރޭގައި ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ. މި ލަނޑު ޖަހައިދިނީ، މާޓިން ބަޓޫރީނާ އެވެ. މިއީ އިނގިރޭސި ޓީމްގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި ކާމިޔާބުކުރި ލަނޑެކެވެ.

ފުރަތަމަ ހާފް ނިމުމުގެ ކުރިން ކެޕްޓަން ހެރީ ކޭން ލަނޑެއް ކާމިޔާބުކޮށް ލީޑް ނަގާފައިވަނިކޮށް، ކްރޮއޭޓުން ވަނީ ފުރަތަމަ ހާފް ނިމުމުކުރިން އަނެއްކާވެސް މެޗްގެ ނަތީޖާ ހަމަހަމަކޮށްފައެވެ. ފުރަތަމަ ހާފްގެ އިތުރުވަގުތުގެ ކުޅުމުގެ ތެރޭގައި މި ލަނޑު ކާމިޔާބުކޮށްދިނީ މޫސާ އެވެ.

ދެވަނަ ހާފްގައި އިނގިރޭސިން ވަނީ ކުރިއަށްވުރެ ކުޅުން ރަނގަޅުކޮށް ކްރޮއޭޝިއާގެ ޑިފެންސްލައިނަށް ބާރުބޮޑުކޮށްފައެވެ. ނަތީޖާއަކަށް ވެގެންދިޔައީ، 47 ވަނަ މިނެޓް ތެރޭގައި ބެލިންހަމް ލަނޑެއް ޖެހުމެވެ. އަދި ދެވަނަ ހާފްގައި ބަދަލު ކުޅުންތެރިންގެ ގޮތުގައި ކުޅެން ނުކުތް ބުކާޔޯ ސަކާ އާއި މާކަސް ރަޝްފޯޑް ގުޅިގެން އުފެއްދި ހަމަލާއަކުން ރަޝްފޯޑް ވަނީ ހަތަރުވަނަ ލަނޑު ކާމިޔާބުކޮށް، އިނގިރޭސިންނަށް ހަމަޖެހުމެއް ގެނެސްދީފައެވެ.

މެޗަށްފަހު ވާހަކަދައްކަމުން އިނގިރޭސި ކޯޗު ތޯމަސް ޓުޗެލް ބުނީ، ދުނިޔޭގެ ފެންފަރުގެ ޓީމަކާ ވާދަކޮށް އޭނާގެ ކުޅުންތެރިން ދެއްކި ހިތްވަރާއި މޮޅު ކުޅުމަށް ތައުރީފް ހައްގު ކަމަށެވެ. އަދި ފުރަތަމަ ހާފަށްވުރެ ދެވަނަ ހާފްގައި ކުޅުން ރަނގަޅުވެގެން ދިއުމަކީ ވަރަށް ރަނގަޅު ފާލެއްކަމަށްވެސް އޭނާ ފާހަގަކުރިއެވެ.