100 ރުފިޔާ ބޮޑުވެގެން ޝަކުވާ ކުރަނީ މަދުބަޔެއް: ޓެކްސީ ޑްރައިވަރުން
މާލެއާއި ހުޅުމާލެއާއި ދެމެެދު ކުރާ ދަތުރުތަކަށް 100ރުފިޔާ ނެގުމުން، އެ އަގު ބޮޑުވެގެން ޝަކުވާ ކުރަނީ އާންމުންގެ ތެރެއިން މަދު ބަޔެއްކަމަށް ޓެކްސީ ދުއްވާ ފަރާތްތަކުން ބުނެފިއެވެ.
ބައެއް ޓެކްސީ ޑްރައިވަރުން މިހެން ބުނެފައިވަނީ ޓެކްސީގެ ޚިދުމަތާ ގުޅޭގޮތުން ޓްރާންސްޕޯޓް އޮތޯރިޓީން، ދަރުބާރުގޭގައި ރޭ ބޭއްވި ފޯރަމްގައި ވާހަކަދައްކަމުންނެވެ.
ޓެކްސީ ޑްރައިވަރުން ބުނީ ކޮޅަކަށް ސަތޭކަ ރުފިޔާ ނެގުމުން ޝަކުވާ ކުރަނީ މަދުބަޔެއްކަމަށާއި ބައެއް އާންމުންގެ ފަރާތްތަކުން އަމިއްލައަށް ދަތުރުނިންމާފައި 150 ރުފިޔާވެސް ދީފައިވާކަމަށެވެ.
ޓެކްސީ ޑްރައިވަރުން ބުނާގޮތުގައި 100 ރުފިޔާ އަކީ ދަތުރަކަށް ބޮޑު އަަދަދެއް ނޫނެވެ. ސަބަބަކީ ދިރިއުޅުމުގެ ޚަރަދާއި ތަކެތީގެ އަގު ބޮޑުވުމެވެ. އެގޮތުން ގެދޮރުގެ ކުއްޔާއި ދިރިއުޅުމުގެ ޚަރަދުގެ އިތުރުން ކާރުގެ މަރާމާތާއި އެހެނިހެން ޚަރަދުތައް އެތައް ގުނައަކަށް ބޮޑުވެފައިވާ ކަމަށް ޑްރައިވަރުން ރޭ ވަނީ ބުނެފައެވެ.
ރޭގެ ފޯރަމްގައި ވާހަކަ ދެއްކި ބައެއް ޑްރައިވަރުން ވަނީ މާލޭގައި މިހާރު ކުރާ ދަތުރުތަކަށް ނަގާ 25 ރުފިޔާއަކީވެސް މާ ކުޑަ އަގެއްކަމަށް ބުނެފައެވެ. އަދި ހުރިހާ ހަރަދެއް ކެނޑުމަށްފަހު އެކަށީގެންވާ އާމްދަނީއެއް ނުލިބޭކަމަށް އެ ފަރާތްތަކުން ވަނީ ބުނެފައެވެ. ރޭ ބައެއް އާންމުންގެ ފަރާތްތަކުން ވަނީ ޓެކްސީގެ ހިދުމަތާއި ބެހޭ ގޮތުން ޝަކުވާތައް ބަންޑުންކޮށްލާފައެވެ.
އެގޮތުން ދަތުރުވެެރިންނާއި މެދު ބޭއަދަބީ ގޮތްތަކަށް އަމަލުކުރުމާއި، ހުއްޓަންވީ ތަންތަން ނޫން އެހެން ތަންތަނަށް ހުއްޓުވާފައި މީހުން ބޭލުން ފަދަ ކަންކަން ވަނީ ފާހަގަކޮށްފައެވެ.
ރޭގެ ފޯރަމް ނިމުނަސް، ޓެކްސީގެ އަގުތަކާ ގުޅޭގޮތުން ޚިޔާލު ހުށަހެޅުމުގެ ފުރުސަތު އަންނަ އާދިއްތަ ދުވަހުގެ ނިޔަލަށް އޮންނާނެ އެވެ. އެގޮތުން އީމެއިލް އާއި ފޯނު އަދި ލިޔުމުން ވެސް ޓްރާންސްޕޯޓް މިނިސްޓްރީއަށް ޚިޔާލު ހުށަހެޅޭނެ ކަމަށް މިނިސްޓްރީން މައުލޫމާތުދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
