18 އަހަރަށް ފަހު މިޑުލްސްބަރާ އިން ޗެލްސީ ބަލިކޮށްފި

އިގިރޭސި ލީގުކަޕް ސެމީގެ ފުރަތަަމަ ލެގުގައި އަންގާރަދުވަހުގެ ރޭ އަމިއްލަ ދަނޑުގައި 1-0 ގެ ނަތީޖާއަކުން މިޑުލްސްބަރާ އިން ޗެލްސީ ބަލިކޮށްފި އެވެ.

މިއީ ފާއިތުވެދިޔަ 18 އަހަރުގެ ތެރޭގައި މިދެޓީމު ކުޅުނު 10 މެޗުގެ ތެރެއިިން ޗެލްސީ ބަލިވި ފުރަތަަމަ މެޗެވެ. ޗެލްސީ އެންމެ ފަހުން މިޑުލްސްބަރާ އަތުން ބަލިވެފައި ވަނީ 2006 ވަނަ އަހަރުގެ އޮގަސްޓު މަހުގެ 24 ވަނަ ދުވަހު ރަށުން ބޭރުގައި 2-1 ގެ ނަތީޖާއަކުންނެވެ.

މިމެޗަށް ނުކުތްއިރު އަނިޔާގެ ސަބަބުން މިޑުލްސްބަރާގެ ސީނިއާ ޓީމުގެ 12 ކުލުންތެރިއަކާއި ނުލައި އެޓީމުން ފެށި އިރު، ފުރަތަަމަ ހާފުގެ 20 މިނެޓް ތެރޭގައި އެޓީމުގެ ދެ ކުޅުންތެރިއަކަށް އަނިޔާވެގެން ވަނީ ބަދަލުކޮށްފައެވެ.

މިޑުލްސްބަރާގެ ރިވާސައިޑް ސްޓޭޑިއަމްގައި ކުޅެވުނު މިމެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ ޗެލްސީ އިންނެވެ. އެގޮތުން މިހާފުގައި އެޓީމުގެ ޒުވާން މިޑްފިލްޑަރު ކޯލް ޕަލްމާ އަށް މެޗުގެ ލީޑު ނެގުމަށް ވަރަށް ހުސް ތިން ފުރުސަތު ލިބި ބޭނުން ނުކުރެވިފައި ވާއިރު،

މިޑުލްސްބަރާ އިން މެޗުގެ ލީޑު ހޯދީ ފުރަތަމަ ހާފުގެ 37 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އިގިރޭސި މިޑްފީލްޑަރު ހެޑެން ހެކްނީ އެވެ. މިއީ އެޓީމުން އުފެއްދި ކައުންޓާ އެޓޭކެއްގައި އެޓީމުގެ ފޯވާޑް ޖޯންސް ކޯލު ކުރިމައްޗަށް ހުރަސްކޮށްދިން ބޯޅައެއް ޗެލްސީގެ ގޯލު އޭރިޔާ ތެރޭގައި މުޅިން ހުސްކޮށް ހުރެ ތިރިތިރިން ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން މިޑުލްސްބަރާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޗެލްސީ އިން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރި އިރު މި ހާފުގައި ވެސް އެޓީމުން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން އެޓީމުގެ ކޯނޯ ގަލެގާރ ގެ އިތުރުން ނޯނީ މަޑޫކް އަށް ލިބުނު ހުސް ފުރުސަތުތައް ފާހަގަކޮށްލެވެއެވެ.

ނަމަވެސް މިހާފުގައި މިޑުލްސްބަރާގެ ފަރާތުން ވަނީ ޗެލްސީގެ އެޓޭކުތައް ހުއްޓުވުމުގައި މޮޅު ޑިފެންސިވް ކުޅުމެއް ފެނިގެން ގޮސްފައެވެ. މިއީ އެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން މިޑުލްސްބަރާ ކުރީގައި އޮވެގެންނެވެ.

މިއީ 2006 ވަނަ އަހަރުގެ ފަހުން މިދެޓީމު ކުޅުނު 10 މެޗުގެ ތެރެއިިން ޗެލްސީ ބަލިވި ފުރަތަަމަ މެޗެވެ. އަދި މި ދެމެދުގެ މެދުގައި ކުޅެވޭ ދެވަނަ ލެގުގެ މެޗު ކުޅުމަށް ހަމަޖެހިފައިވަނީ މިމަހުގެ 24 ވަނަ ދުވަހުގެ ރޭ ރާއްޖޭ ގަޑިން ދަންވަރު 1:00 ގައެވެ. އަދި މިމެޗު ކުޅުމަށް ހަމަޖެހިފައިވަނީ ޗެލްސީގެ ސްޓެމްފޯޑް ބްރިޖުގައެވެ.

މުބާރާތުގެ ސެމީފައިނަލްގެ ދެވަނަ މެޗުގެ ފުރަތަަމަ ލެގުގައި މިރޭ ދަންވަރު 1:00 ގައި ލިވިޕޫލުގެ ދަނޑުގައި އެޓީމުން ނުކުންނާނީ ފުލަމް އާއި ދެކޮޅަށެވެ.