އަމިއްލަ ދަނޑުގައި ވެނަޒުއޭލާ އިން ބްރެޒިލް މޮޅުވިޔަނުދީ ހިފަހައްޓައިފި

ދެކޮނު އެމެރިކާ ސަރަހައްދުގެ ވޯލްޑްކަޕް ކޮލިފައިންގައި ރޭ އަމިއްލަ ދަނޑުގައި ބްރެޒިލް އާއި ދެކޮޅަށް ވެނަޒުއޭލާ އިން ކުޅުނު މެޗު 1-1 ގެ ނަތީޖާއަކުން ދެޓީމު އެއްވަރުވެއްޖެއެވެ.

ވޯލްޑްކަޕް ކޮލިފައިންގައި ބްރެޒިލް އެންމެ ފަހުން ކުޅުނު މެޗުގައި ޕެރޫ އަތުން 4-0 ގެ ނަތީޖާއަކުން މޮޅުވެފައިވާއިރު، ވެނަޒުއޭލާ އެންމެ ފަހުން ކުޅުނު މެޗުގައި ޕެރަގުއޭ އަތުން 2-1 ގެ ނަތީޖާއަކުން އެޓީމު ވަނީ ބަލިވެފައެވެ. އަދި މިދެޓީމު އެންމެ ފަހުން ކުޅުނު މެޗު ނިމިފައިވަނީ ވެސް 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން މިހާފުގައި ވެނަޒުއޭލާގެ ޕެނަލްޓީ އޭރިއާ ތެރެއިން ލިބުނު ފުރުސަތެއްގައި ވިނިޝިއަސް ފޮނުވާލި ހަމަލާ ގޯލުގެ އަރިމަތީ ދަނޑިއަށް އަމާޒުވިއިރު، ބްރެޒިލް އިން މެޗުގެ ލީޑުހޯދީ ފުރަތަމަ ހާފުގެ 43 ވަނަ މިނެޓުގައެވެ.

މިލަނޑު އެޓިމަށް ކާމިޔާބުކޮށްދިނީ ބާސެލޯނާގެ ފޯވާޑް ރަފީނިހާ އެވެ. މިއީ ވެނަޒުއޭލާގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އެނާ ކާމިޔާބުކޮށްދިން ލަނޑެކެވެ. އަދި މިބޯޅަ ގޯލަށް ވަނީ އަރިމަތީ ދަނޑިގައި ވެސް ޖެހިފައެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބްރެޒިލް ކުރީގައި އޮވެގެންނެވެ.

މެޗުގެ ދެވަނަ ހާފު ވެނަޒުއޭލާ އިން ފެށި ބަދަލަކާއެކުގައެވެ. އަދި ދެވަނަ ހާފު ފެށިގެން ފުރަތަމަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނިކުތް ޒުވާން މިޑްފީލްޑަރު ޓެލަސްކޯ ސެގަވިއާ އެވެ.

މީގެ އިތުރުން ދެވަނަ ހާފުގެ 62 ވަނަ މިނެޓުގައި ދެވަނަ ފަހަރަށް މެޗުގެ ލީޑުހޯދުމަށް ބްރެޒިލްއަށް ޕެނަލްޓީއެއް ލިބުނު ނަމަވެސް ރެއާލް މެޑްރިޑްގެ ފޯވާޑް ވިނީޝިއަސް ޖޫނިއަރ ކުރިއަށް ފޮނުވާލި ޕެނަލްޓީ ވެނަޒުއޭލާގެ ކީޕަރު ވަނީ ދިފާއުކޮށްފައެވެ. އަދި ދެވަނަ ފަހަރަށް ލިބުނު ފުރުސަތުގައި މުޅި ހުސްކޮށްހުރެ ވިނިޝިއަސް ފޮނުވާލި ބޯޅަ ދިޔައީ ގޯލާއި އަމާޒުނުވެ ދަނޑިކައިރިން ބޭރަށެވެ.

ދެވަނަ ހާފުގެ 89 ވަނަ މިނެޓުގައި ވެނަޒުއޭލާގެ ޑިފެންޑަރު އެލެގްޒެންޑަރ ގޮންޒާލޭޒް ކުޅުމުން ބޭރުގައި ވިނިޝިއަސްއަށް ހަމަލާދިނުނުން މެޗުގެ ރެފްރީ ވަނީ އޭނާއަށް ސީދާ ރަތްކާޑެއްދައްކައި ދަނޑުން ފޮނުވާލާފައެވެ. އަދި މިއާއެކު މެޗުގެ ބާކިބައި އެޓީމުން ފުރިހަމަކުރީ އެއްކުޅުންތެރިއަކު މަދުކޮށެވެ.

މިނަތީޖާއެކު ކޮލިފައިންގައި ކުޅުނު 11 މެޗުން ބްރެޒިލްއަށް 17 ޕޮއިންޓް ލިބިފައިވާއިރު، އެޓީމު މިވަގުތު އޮތީ ޕޮއިންޓް ތާވަލުގެ ތިންވަނައިގައެވެ. އަދި މިމެޗުން ލިބުނު އެއްޕޮއިންޓާއެކު 11 މެޗުން ވެނަޒުއޭލާއަށް 12 ޕޮއިންޓް ލިބިފައިވާއިރު، އެޓީމު މިވަގުތު އޮތީ ތާވަލުގެ ހަތްވަނައިގައެވެ.