ލަންކާގެ "ސްނައިޕާ" އަށް ބޮޑެތި އަނިޔާތަކެއް ދިން ކަމުގެ ތުހުމަތު

ރައީސް ޔާމީނު އަވަހާރަ ކޮށްލަން ރާއްޖެ އައުމުގެ ތުހުމަތުގައި ބަންދު ކޮށްފައިވާ ލަހިރު މަޑޫޝަންކަރު ނަމަކަށް ކިޔާ ސްރީލަންކާ މީހާ އަށް ރާއްޖޭގައި ބޮޑެތި އަނިޔާތަކެއް ދީފައިވާ ކަމަށް "ޕްރިޒަނާ އިން ޕެރަޑައިސް" ގެ ނަމުގައި އެމްނެސްޓީން އާންމުކޮށްފައިވާ ރިޕޯޓެއްގައި ތުހުމަތު ކޮށްފި އެވެ.

މި ރިޕޯޓްގައި ތުހުމަތު ކޮއްފައިވާ ގޮތުން މަޑޫޝަންކަރު އަށް ތަހުގީގުގައި ދިން އަނިޔާ ތަކުގެ ސަބަބުން އެއް ކަންފަތުގެ އަޑުއިވުން ވަގުތީގޮތުން ގެއްލުނެވެ.

މީގެއިތރުން ތަހުގީގުގައި އޭނާގެ ގައިގައި ކޭބަލަކުން ތެޅި ކަމަށާއި މޫނަށް ޕިންތަކެއް ހެރި ކަމަށް ވެސް ރިޕޯޓުގައި ތުހުމަތު ކޮށްފައިވެއެވެ.

އަދި އޭނާ ހައްޔަރުކުރިތާ ފަސް ދުވަސް ފަހުން ފުލުހުންގެ މައި މަރުކަޒަށް ގެންގޮސް، ހޭ ނެތެންދެން އޭނާގެ ގައިގައި ތެޅި ކަމަށް އެ ރިޕޯޓްގައިވެއެވެ.

އަނިޔާތަކުގެ ތަފުސީލަށް ފަހު ރިޕޯޓުގައި ބުނެފައި ވަނީ އެ ކަންތައްްތަކާ މެދު އެމްނެސްޓީން ކަންބޮޑުވާ ކަމަށެެވެ.

މި ރިޕޯޓް އެކުލަވާލާފައިވާ އެވަނީ އޭނާގެ ވަކީލާއި އާއިލާ އިން ދިން މައުލޫމާތުގެ މައްޗަށް ކަމަށްވެއެވެ.

އެމްނެސްޓީން ވަނީ ފުލުހުންނަށާއި ކަރެކްޝަނަލް ސާވިސް އަށް ވަނީ މަޑޫޝަންކަރުގެ ބަންދުގެ ހާލަތު ބަދަލު ކޮށްދިނުމަށް ގޮވާލައިފަ އެވެ.

އޭނާ އަށް އިންސާފުވެރި ޝަރީއަތެއް ލިބިދިނުމަށް ޕްރޮސެކިއުޓާ ޖެނެރަލްގެ އޮފީހަށާއި ކްރިމިނަލް ކޯޓަށާއި ޖުޑިޝަލް ސާވިސް ކޮމިޝަނަށް އެމްނެސްޓީން ވަނީ ގޮވާލާފައިވެ އެވެ.

"މި ތުހުމަތުތައް ތަހުގީގުކުރުމަށް އެމްނެސްޓީ އިންޓަނޭޝަނަލް އިން ދިވެހި ސަރުކާރަށާއި ހިއުމަން ރައިޓްސް ކޮމިޝަން އޮފް މޯލްޑިވްސް އަށް ގޮވާލަމެވެ،" ރިޕޯޓުގައިވެ އެވެ.

އެމްނެސްޓީގެ މި ރިޕޯޓާ ގުޅޭ ގޮތުން ފުލުހުންގެ ބަހެއް އަދިވަނީ ލިބޭގޮތްނުވެފައެވެ.

0%0%0%

0 ކޮމެންޓް

ނަން

ކޮމެންޓް

Comment