"ޤައުމިއްޔަތު" މާއްދާ ފުރަތަމަ ފަށަނީ ގްރޭޑް 4 އަށް: މިނިސްޓަރު
މި ސަރުކާރުން ވަޢުދުވެފައިވާ ފަދައިން ޤައުމިއްޔަތު ވަކިމާއްދާއެއްގެ ގޮތުގައި އެންމެ ފުރަތަމަ ކިޔަވައިދޭން ފަށާނީ ގްރޭޑް ހަތަރެއްގެ ދަރިވަރުންނަށް ޕައިލެޓް ޕްރޮގްރާމެއްގެ ގޮތުގައި ކަމަށް ތަޢުލީމާއި ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވެފައިވަނީ ދައުލިތުގެ މީޑިއާ ޕީއެސްއެމް ނިވުސްއަށް ދެއްވި ޙާއްޞަ ބަސްދީގަތުމެއްގައެވެ.
މި ޕްރޮގްރާމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ "ޤައުމިއްޔަތު" މާއްދާ ރަސްމީކޮށް މަންހަޖުގައި ހިމެނުމުގެ ކުރިން ޕައިލެޓް ޕްރޮގްރާމެއް ކުރިއަށް ގެންދިޔުމަށް ނިންމަވާފައިވާކަމަށެވެ. އެގޮތުން 3 ހަފްތާއެއްހާ ދުވަހުގެ ތެރޭ ގްރޭޑް 4 ގެ ދަރިވަރުންނަށް އެ މާއްދާ ޕައިލެޓްކޮށް ކިޔަވައިދޭން ފަށްޓަވާނެކަމަށް ވަޒީރު ވިދާޅުވިއެވެ. އަދި މިހާރު ޕައިލެޓް ޕްރޮގްރާމް ފެށުމަށް ކުރަންޖެހޭ މަސައްކަތްތައް ނިމިފައިވާކަން ފާހަގަކުރައްވާ، ވަޒީރު ވިދާޅުވީ ޕައިލެޓްކޮށް ކިޔަވައިދޭން ފެށުމުގެ ކުރިން މިހާރު ކިޔަވައިދެމުންދާ މާއްދާތަކުގައި ޤައުމިއްޔަތުގެ ބަހާތަށް ހުރި މިންވަރު ދެނެގަނެވިފައިވާކަމަށެވެ.
"މާއްދާތަކުގައި ޤައުމިއްޔަތުގެ ބަހާތައް ހުރި މިންވަރު ވަނީ ދެނެގަނެވިފައި. އައު މާއްދާއެއް ވުޖޫދުކުރުމަށްޓަކައި ކުރަންޖެހޭ ބައެއް މަސައްކަތްތައްވެސް މިހާރު ވަނީ ކޮށްފައި. ޕައިލެޓް ޕްރޮގްރާމްގެ ނަތީޖާއަށް ބެލުމަށްފަހު ރަސްމީކޮށް މަންހަޖުގައި ހިމަނާނަން." އެ ޕްރޮގްރާމުގައި މިނިސްޓަރ ޝަފީޢު ވިދާޅުވިއެވެ.
މިނިސްޓަރ ވިދާޅުވި ގޮތުގައި ތަޢުލީމުގެ ޤައުމީ މަންހަޖުގައި ޤައުމިއްޔަތުގެ ނަމުގައި މާއްދާއެއް ތަޢާރަފްކޮށް މިމާއްދާ ކިޔަވައިދިނުމުގެ މަޤްސަދަކީ ދިވެހި ޤައުމިއްޔަތުގެ ރުކުންތަކާއި އަގުތަކަށް އިސްކަންދީ ޤައުމިއްޔަތަށް ލޯބިކުރާ އަދި ޤައުމިއްޔަތުގެ ބަހާތަކަށް އަހުލުވެރިވެފައިވާ ޖީލެއް ބިނާކުރުމެވެ.
ދަރިވަރުންގެ ހިތްތަކުގައި ޤައުމިއްޔަތު އާލާކޮށް ، ޤައުމަށް ލޯބި ޖެއްސުމުގެ މަޤްޞަދުގައި ހުރިހާ ސްކޫލެއްގައިވެސް މިހާރު ގެންދަނި ކޮންމެ ދުވަހަކުވެސް ކޮންމެ ދަންފަޅިއެއްގެ ކިޔެވުން ފެށުމުގެ ކުރިން އެސެމްބުލީ ބާއްވާ އެސެމްބުލީތަކުގައި ޤައުމީ ސަލާމް ކިޔަމުންނެވެ. އަދި އޭގެ ތެރެއިން ދެ އެސެމްބުލީއެއް ޙާއްޞަކޮށް އެ އެސެމްބުލީތަކުގައި ދަރިވަރުންގެ ހިތްތަކުގައި ޤައުމިއްޔަތުގެ ސިފަ އެކުލެވޭ ފަދަ ތަފާތު ހަރަކާތްތައް ހިންގަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
