އައްޑޫ މުޒާހަރާ: މަސްފެކްޓްރީގެ މިސްކިތުންވެސް ކަރަންޓް ކަނޑާލި!

އައްޑޫ ފިޝަރީޒް ކޮންޕްލެކްސް (އޭއެފްސީ)ގައި މަސްވެރިން ކުރަމުންދާ މުޒާހަރާގެ ތެރެއިން، މަސްފެކްޓްރީގެ ކަރަންޓް ކަނޑާލި އިރު، އެތަނުގައި ހުންނަ މިސްކިތުންވެސް ކަރަންޓް ކަނޑާލައި މުވައްޒަފުންނަށް ދަތި ކުރުމުގެ ފިޔަވަޅުތަކެއް މުޒާހަރާގެ ބައިވެރިން އަޅާފައިވާކަން ހާމަވެއްޖެއެވެ.

މަސްވެރިންނަށް ދޭންޖެހޭ ލާރި ދިނުން ލަސްވާތީ، އައްޑޫގައި މަސްވެރިން ކުރަމުންދާ މުޒާހަރާއާއި ގުޅިގެން އޭއެފްސީގެ އޮޕަރޭޝަން ވަގުތީ ގޮތުންވަނީ ހުއްޓިފައެވެ.

އަދި އެތަނުގައި ދިވެހިންނާއި ބިދޭސީން ހިމެނޭހެން 100 އަށްވުރެގިނަ މުވައްޒަފުން މަސައްކަތް ކުރަމުން އަންނައިރު މުވައްޒަފުންނަށް ދަތި ކުރުމުގެ ފިޔަވަޅުތައް އަޅަމުންދާކަން މިފްކޯއިން ވަނީ ފާހަގަކޮށްފައެވެ.

އެގޮތުން މިފްކޯއިން ބުނީ، އެކޮމޮޑޭޝަން، އެޑްމިން ބިލްޑިންގ އަދި ކެފޭއިން ކަރަންޓް ކަނޑާލާފައި ބެހެއްޓުމަށް މުޒާހަރާގެ ބައިވެރިން ޑިމާންޑް ކުރަމުންދާ ކަމަށާ، ރޭގައި ފުލުހުންގެ އެދުމަށް އޭއެފްސީއަށް ކަރަންޓް ދިން ނަމަވެސް، ކަރަންޓް ދިނުމާއެކު މަސްލަހަތު ގެއްލި، ތަނާއި މުދަލަށާއި، ތަނުގެ މުވައްޒަފުންނަށް އެކަމުގެ ސަބަބުން ގެއްލުން ވެދާނެ ކަމަށް ގަބޫލުކުރެވުން ކަރަންޓް ކަނޑާލަން ޖެހުނު ކަމަށެވެ.

އަދި، އިއްޔެގެ މުޒާހަރާގައި ތިބި މަސްވެރިން ސްޓާފް ކެންޓީން ލޮކް ކޮށްފައި ހުއްޓާ ކުޑަދޮރުން ވަދެ ތަނުގައި ހުރި ފުޑް ސަޕްލައިޒް ބޭނުން ކޮށްފައިވާ ކަމަށާ އެކޮމޮޑޭޝަން ބްލޮކްގައި ކަރަންޓް ކަނޑާލުމުގެ ސަބަބުން ރެއިން ފެށިގެން އޭއެފްސީ މުވައްޒަފުން ނިދަނީ ބޭރުގައި ސަތަރި އަޅައިގެންކަމަށް މިފްކޯއިން ބުނެފައިވެއެވެ.

ކެއުން ބުއިމާއި ފާޚާނާ ކުރުންފަދަ، ޒަރޫރީ ބޭނުންތައް މުވައްޒަފުންނަށް ވަނީ ނުފުއްދިފައި. އިއްޔެ 14:40 އިން 17:09 އަށް ސައިޓްގެ އެއްވެސް ގޮތަކަށް ކަރަންޓް ނެތި ޕަވަރ އޮފް ކުރެވި ސިސްޓަމް ޝަޓްޑައުން ކުރެވިފައި ވަނީ. 17:09 އިން މިއަދުގެ މިވަގުތާއި ހަމައަށް، މަސްވެރިންގެ ޑިމާންޑްގެ ސަބަބުން އެކޮމޮޑޭޝަން ބްލޮކްސް، އެޑްމިން ބްލޮކްސް، މިސްކިތް، ކެފޭ އިން ވަނީ ކަރަންޓް ކަނޑާލެވިފައި.

މިފްކޯ

މަސްވެރިންނަށް ދޫ ނުކުރެވި ހުރި ފައިސާ ދޫކުރުމަށް މަސްވެރިން ޑިމާންޑް ކުރަމުންދާއިރު، ޢީދު ބަންދާއި ދިމާކޮށް 46 މިލިއަން ރުފިތާ މަސްވެރިންނަށް މިފްކޯއިން ވަނީ ދޫކޮށްފައެވެ. މިފްކޯއިން ބުނީ، އޮޑިވެރިންނަށް ނުދެއްކި ހުރި ހުރިހާ ފައިސާ، ވޭހާވެސް އަވަހަށް ދެއްކޭތޯ ސަރުކާރާއި ވާހަކަ ދައްކައިގެން މަސައްކަތް ކުރަމުންދާ ކަމަށެވެ.

އެހެން ކަމުން، މިފްކޯއިން ވަނީ، މަސްވެރިން ކުރިއަށް ގެންދާ އިހްތިޖާޖު ވޭހާވެސް ސުލްހަވެރިކޮށް ގެންދިޔުމަށް އިލްތިމާސްކޮށްފައެވެ. ޚާއްސަކޮށް ތަނުގެ މުވައްޒަފުންނާއި، ކުންފުނީގެ މުދަލަށް ލިބިދާނެ ގެއްލުމަކީ މުޅި ސިނާއަތަށްވެސް ލިބޭނެ ގެއްލުމެއްކަން އެ ކުންފުނިން ފާހަގަކުރެއެވެ.

އަދި މުވައްޒަފުންގެ ޒަރޫރީ ބޭނުން ތަކަށް އުނިކަން އަންނަފަދަ ކަންކަން ނުކުރުމަށް އިލްތިމާސް ކުރަމުން މިފްކޯއިން ވަނީ މުވައްޒަފުންގެ ހައްގުގައި ކުރަންޖެހުނު ކޮންމެ ކަމެއް ކަމާއިބެހޭ އިދާރާތަކާ ގުޅިގެން ކުރާނެ ކަމަށް ބުނެފައެވެ.