ކަސްޓަމްސް އޮފިސަރުންތަކެއްގެ ރިޝްވަތާއި، ހިޔާނާތުގެ މައްސަލަތަކެއް!
ލިޔުންތެރިޔާ
އަބްދުﷲ ހުސައިން
މޯލްޑިވްސް ކަސްޓަމްސް ސާވިސްގެ އޮފިސަރުންތަކެއްގެ އެކައުންޓްތަކުގައި 400 މިލިއަނެއްހާ ރުފިޔާ ދައުރުކުރި މައްސަލައެއް ފެންމަތިވެއްޖެއެވެ.
ވޮއިސްއަށް މައުލޫމާތު ލިބިފައިވާ ގޮތުގައި ހިޔާނާތުގެ މި މުއާމަލާތުގައި ކަސްޓަމްސްގެ އެކި ރޭންކުތަކަށް ނިސްބަތްވާ އޮފިސަރުން ހިމެނެއެވެ. މިކަމާ ގުޅޭގޮތުން ފުލުހުންގެ އިދާރާއިުން ބުނެފައިވަނީ، މޯލްޑިވްސް ކަސްޓަމްސް ސާވިސްގެ އޮފިސަރުންތަކަކަށް ތުހުމަތުކުރެވޭ މަނީ ލޯންޑަރިން، ހިޔާނާތް އަދި ރިޝްވަތުގެ މައްސަލައެއް ފުލުހުންގެ ސަމާލުކަމަށް އައިސްފައިވާކަމަށެވެ. އެގޮތުން މިއަހަރުގެ އޮގަސްޓްމަހުގެ 19 ވަނަ ދުވަހު އެ މައްސަލައިގެ ތަހުގީގު ފަށާފައިވާކަން ފުލުހުން ބުންޏެވެ.
ވޮއިސްއަށް މައުލޫމާތު ލިބިފައިވާ ގޮތުގައި ހިޔާނާތުގެ މި މައްސަލާގައި ކަސްޓަމްސްގެ 20 ވަރަކަށް އޮފިސަރުން ޝާމިލްވެއެވެ. ކަސްޓަމްސް އޮފިސަރުންގެ މި ހިޔާނާތުގެ މައްސަލާގައި ކަސްޓަމްސްގެ ފަރާތުން އަދި ވަކި އެއްޗެކޭ ނުބުނެއެވެ. ކަސްޓަމްސް ސާވިސްގެ ބައެއް މުއައްޒަފުންގެ ތެރޭގައި ކޮރަޕްޝަނާ ރިޝްވަތުގެ މައްސަލަތަށް އުޅޭވާހަކައަކީ އާއްމުންގެ ތެރޭގައިވެސް ދެކެވޭ ވާހަކައެކެވެ.
މީގެ އިތުރުން ރައްޔިތުން މަޖިލީހުގެ ނައިބުރައީސް އަހުމަދު ނާޒިމްވެސް ވަނީ އެފަދަ މޭރުމަކުން ވާހަކަދައްކަވާފައެވެ. މަޖިލީހުގެ ތަޅުމަށް ހުށަހެޅި މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލަށް ވާހަކަދައްކަވަމުން ނާޒިމް ވަނީ ޔުނީފޯމް އެޅި މުއައްސަސާތަކަށް އިތުބާރުކުރެވެން ނެތްކަމަށާއި، މަސްތުވާތަކެތި ރާއްޖެއަށް އެތެރެވުމުގައި ކަސްޓަމްސްގެ އިހުމާލު އުޅޭކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
